San Mateo 4

Ni jito tnuni ña Tachi jin Jesús

1Yun te ni jaka ña Espíritu jin Jesús ja kuaꞌan ya nuu ñuꞌu teꞌa, nagua ja koto tnuni ña Tachi. 2Te ni ondite ya uu xiko kiuu vi uu xiko jakuaa, yun te ni kokin ya. 3Te ni jino Tachi ja koto tnuni ña jin ya, te jiñaꞌa suaꞌa:

͏―͏Nuu ndija ron ja Seꞌe ia Dios kuu ron, te tatnuni nuu yuu yaꞌa ja na vi nduu xtaa ͏―͏jiñaꞌa.

4Yun te jiñaꞌa ya suaꞌa:

͏―͏Yoso nuu tutu ii ja masu maintnoꞌo xtaa kuu ja koteku ñayiu, chi suni ndiꞌi tnoꞌo kaꞌan ia Dios kuu ja tekui.

5Yun te ni jaka ña Tachi ja kuaꞌankuei ya ñuu ii Jerusalén, te ni skaa ña ndee nuu sukun siki veñuꞌu kaꞌnu. 6Yun te jiñaꞌa suaꞌa:

͏―͏Nuu ja ndija ron ja Seꞌe ia Dios kuu ron, te ndagua makee ndee nuu ñuꞌu, chi yoso nuu tutu ii, te kaꞌan suaꞌa: “Maa Dios tetniuu ia ka jinokuechi nuu ya ja vi koto ña jin ron, te vi kotnii ndaꞌa ron nagua ja ma kachi jaꞌa ron jin ni in yuu”, ͏―͏jiñaꞌa.

7Yun te jiñaꞌa tuku Jesús:

͏―͏Suni yoso nuu tutu ii ja ma koto tnuni ron Jitoꞌo ron Dios.

8Yun te ni jaka tuku ña Tachi yun jin ya in yuku sukun sukun, te ni xneꞌe ndikuiti ñuu ka oo nii ñuyiu nuu ka tatnuni ñayiu kuika vi ndikuiti ja sii ini oo ñuyiu yaꞌa. 9Yun te jiñaꞌa suaꞌa:

͏―͏Ndiꞌi yaꞌa taa rin nuu ron nuu ja junkuiin jiti ron nuu rin, te chiñuꞌu ña ron ͏―͏jiñaꞌa.

10Yun te jiñaꞌa Jesús suaꞌa:

͏―͏Kuaꞌan, vi Tachi, chi yoso nuu tutu ii ja maintnoꞌo Jitoꞌo ron Dios kuu ia chiñuꞌu ron, te kunukuechi ron nuu maintnoꞌo ya.

11Yun te ni xndoo ña Tachi, te kuaꞌan. Te ni kekuei ia ka jinokuechi nuu maa ia Dios, te ni ka chituu ña jin Jesús.

Ni kejaꞌa Jesús kaxtnoꞌo ya tnoꞌo ia Dios nuu ñayiu ñuu Galilea

12Te nuu ni jini soꞌo Jesús ja ni ndesi Juan vekaa, te ni ndajiokuiin ya Galilea. 13Su ni xndoo ya ñuu ya Nazaret, te ni jaꞌan ya ja koo ya ñuu Capernaúm, yatni yuꞌu ndute mar nuu ka oo tatatnoꞌo Zabulón jin Neftalí. 14Saa nagua ja na skunkuu tnoꞌo ni kaꞌan Isaías, tee ni ndakani tnoꞌo ia Dios ndee janaꞌa nuu jiñaꞌa de suaꞌa:

15Ñuu nuu ka oo tatatnoꞌo Zabulón vi tatatnoꞌo Neftalí,

ichi ja kuaꞌan ndute mar inka jioo yute Jordán

ja kuu Galilea nuu ka oo ñayiu sava ka tatatnoꞌo,

16ñayiu ka oo nuu nee, te vi kuni ja yeꞌe niꞌnu.

Chi ndiꞌi ñayiu ka saꞌa jakueꞌe ja ka oi nuu kati ja vi kui,

vi kuni ja ndayeꞌe niꞌnu in ñuꞌu ja tetniuu maa ia Dios,

ni kaꞌan de suaꞌa.

17Te ndee kiuu yun ni jinkondee Jesús kaxtnoꞌo ya, te jiñaꞌa ya suaꞌa:

͏―͏Vi ndatnaꞌu ini ni, te kiukuei ni ichi ia Dios, chi oo yatni ja tatnuni ya.

Ni kana Jesús kuun tee ka tau chiaka

18Te jika Jesús yatni yuꞌu ndute mar Galilea, te ni jini ya uu ñani, in de kuu Simón ja suni nani de Pedro, vi inka de nani Andrés. Te ka oo de ka skee de ñunu de nuu ndute mar yun, chi tee ka tau chiaka ka kuu de. 19Te jiñaꞌa ya suaꞌa:

͏―͏Neꞌekuei ni vi kondikin ña ni, te na kaxtnoꞌo san ja vi kokuu ni tee vi tau ñayiu nuu ichi kueꞌe, nagua ka tau ni chiaka.

20Te vini ni ka xndoo tee yun ñunu de, te ni ka jata ndikin ña de jin ya.

21Te nuu ni ka yaꞌa de jin ya yun, te ni jini ya uu ka ñani, in de kuu Jacobo, te inka de kuu Juan, seꞌe Zebedeo, te ka oo de jin yua de nuu barco ka ndakiku de ñunu de. Te ni kana ña ya jin nduu de ja vi kondikin ña de. 22Te vini ni ka xndoo tee yun yua de nuu barco yun, te kuaꞌankuei de jin ya.

Ni kaxtnoꞌo Jesús nuu kuaꞌa ñayiu vi ni ndasaꞌa ya ñayiu ka kuꞌu

23Yun te kuaꞌan Jesús ja ni jika nuu ya nii Galilea ja kaxtnoꞌo ya taka veꞌe nuu ka skuaꞌa ja kuu veꞌe ii sinagoga ja ka oo in in ñuu yun. Te ni kaxtnoꞌo ya tnoꞌo vaꞌa naxa tatnuni ia Dios, te ni ndasaꞌa ya ndiꞌi ñayiu ka kuꞌu kueꞌe vi ndiꞌi ja ka jatui. 24Yun te ni jitenuu ndiꞌi jakaꞌnu ni saꞌa ya nii ñuu ja tnii Siria. Te ni kikuei jin ñayiu ka kuꞌu ndinuu nuu kueꞌe na kuinio ñayiu ka jatu ka janiꞌni vi ñayiu ka ñuꞌu ña tachi, vi ñayiu ka jiꞌi yiꞌi vi ñayiu ka ndutuchiin ja ña kuu vi kaka, te ni ndasaꞌa ña ya. 25Te ni ka jata ndikin ña kuaꞌa ndevaꞌa ñayiu Galilea vi saa ni ñayiu Decápolis, vi ñayiu Jerusalén, saa ni ñayiu Judea vi ñayiu ka oo jioo yute Jordán jin Jesús.

Currently Selected:

San Mateo 4: xtnNTplus

Highlight

Copy