San Mateo 21

Ni ndiuu Jesús na kuinio in rey ja ni kundee maa Jerusalén

1Te nuu ni ka kuyatni Jesús Jerusalén, te ni jinokuei ya ñuu Betfagé yatni yuku nani Olivos, te ni tetniuu ya uu tee ka skuaꞌa jin ya. 2Te jiñaꞌa ya:

͏―͏Kuaꞌankuei ni ñuu luluu ja kaa ichi nuu ni suaꞌa, te yun vi junkuꞌun ni in mentu siꞌi nuꞌni ti jin in mentu luluu, te vi ndajin ni ti, te kikuei ni jin ti. 3Te nuu na in kaꞌan, te vi kuñaꞌa ni suaꞌa: “Maa Jitoꞌo jiniuꞌu ti, su vini ndatetniuu ya ti” vi kuñaꞌa ni ͏―͏jiñaꞌa ya.

4Te saa ni kuu ndiꞌi yaꞌa, nagua skunkuu tnoꞌo ni kaꞌan tee ni ndakani tnoꞌo maa Dios ndee janaꞌa nuu tee de nuu tutu ii:

5Vi kuñaꞌa ni nuu ñayiu ñuu Sión:

“Vi kondiaꞌa, chi yaꞌa vaji ndaꞌu vaji kee rey ron,

yoso de in mentu, in mentu luluu,

seꞌe mentu siꞌi kiti jiso”.

6Yun te ni jaꞌankuei tee ka skuaꞌa jin ya, te ni ka saꞌa de nagua ni tatnuni ya. 7Ni kekuei de jin mentu siꞌi yun vi seꞌe ti, te ni ka sonee de saꞌun de yata ti, te ni ka koso Jesús ti. 8Te ka oo kuaꞌa ndevaꞌa ñayiu yun, te savai ka skai saꞌuin ini ichi yun, te savai ka jaꞌnde ndaꞌa yutnu kuii yun, te ka tanduei ini ichi yun. 9Te ñayiu ka yoxnoꞌo vi ñayiu ka intandikin ka kana jai:

͏―͏¡Kaꞌnu kuu maa ni, ndikin tata ndee David! ¡Na taꞌu na ndetu ia vaji jin jakaꞌnu maa Jitoꞌo Dios ja kotatnuni ya! Kaꞌnu kuu maa ni ja vaji ni ndee sukun.

10Te nuu ni kiuu ya maa Jerusalén, te ndiꞌi ñayiu ñuu yun ni ka kuvaa, te ni ka jikan tnoꞌo tnaꞌi:

͏―͏¿Na in kuu tee yaꞌa?

11Te ka jiñaꞌa sava ñayiu:

͏―͏Tee yaꞌa kuu Jesús, tee ndakani tnoꞌo maa ia Dios, tee ñuu Nazaret ja tnii Galilea ͏―͏ka jiñaꞌi.

Ni ndasavii Jesús maa veñuꞌu kaꞌnu

12Te ni kiuu Jesús nuu veñuꞌu maa ia Dios, te ni keneꞌe ya ndiꞌi ñayiu ka xiko vi ñayiu ka kiꞌin nuu veñuꞌu yun, te ni xndonso ya mesa ñayiu ka sama xuꞌun vi tei nuu ka nukoo ñayiu ka xiko sata. 13Te jiñaꞌa ya:

͏―͏Yoso nuu tutu ii: “Veꞌe rin, chi veꞌe nuu ka ndakuatu ñayiu konani”, kachi ia Dios. Su maa ni, chi ka saꞌa ni na kuinio in yau kava kuiꞌna ͏―͏jiñaꞌa ya.

14Yun te ni jinokuei ñayiu ka ndesi nduchi nuu vi ñayiu ka kuꞌu siꞌin nuu oo ya veñuꞌu yun, te ni ndasaꞌa ña ya. 15Su nuu ni ka jini tee ka kuu nijaꞌnu nuu sutu vi tee ka kaxtnoꞌo Ley Moisés, ndiꞌi javii javaꞌa saꞌa ya, vi ja ka kana suchi kueli nuu veñuꞌu yun, ka jiñaꞌi: “¡Kaꞌnu kuu maa ni, ndikin tata ndee David!”, te ni ka kiti ini de.

16Te ka jiñaꞌa de nuu ya:

͏―͏¿A nini ni ja ka kaꞌan suchi kueli yun?

Te jiñaꞌa Jesús:

͏―͏Nini san. ¿Su a tu ka kaꞌu saꞌun maa ni nuu tutu ii nuu kaꞌan suaꞌa: “Ni saꞌa vaꞌa ni yuꞌu suchi kueli vi yuꞌu suchi ka jaxin ja vi katai yaa ja ka ndakuantaꞌui nuu ni”?, kachi tutu ii ͏―͏jiñaꞌa ya.

17Yun te ni xndoo ña ya, te ni kee ya kuaꞌan ya ñuu Betania, te yun ni ndoo ya jakuaa yun.

Ni xtau tniaꞌa Jesús tnu tichi iuu

18Te nuu matuu inka kiuu, te kuanoꞌo ya maa ñuu Jerusalén. Yun te ni kokin ya. 19Te ni jini ya in tnu tichi iuu ja oo yatni yuꞌu ichi yun, te ni jaꞌan ya nuu tnu, te tu nagua ni niꞌi saꞌun ya, chi nani ndaꞌa kuii tnu ka oo. Te jiñaꞌa ya nuu tnu tichi iuu yun:

͏―͏Vini in ka kiti vixin ma kuun nuu ron.

Te vi ore saa ni yichi tnu tichi iuu yun. 20Te ni ka jini tee ka skuaꞌa jin ya ja siun ni kuu, te ni ka sau kuii ini de, te ni ka jikan tnoꞌo ña de jin ya:

͏―͏¿Naxa ni saꞌa ni ja vi ñama kuiti ni yichi tnu tichi iuu yaꞌa? ͏―͏ka jiñaꞌa de.

21Te jiñaꞌa Jesús:

͏―͏Kaꞌan ndaa ndija san ja nuu ja vi kandija ni, te ma vi ndakani ini ni a saa axi ñaꞌa, te masu maintnoꞌo siki tnu tichi iuu yaꞌa kuu vi saꞌa ni, chi suni nuu ja vi kuñaꞌa ni nuu tinduu yaꞌa: “Kujioo te makee ndee nuu ndute mar yun”, te vi saa kokuu. 22Chi ndiꞌi nagua ka jikan ni nuu ia Dios nuu ka ndakuatu ni, nuu ja ka kandija ni, te ndiꞌi vi niꞌi ni ͏―͏jiñaꞌa ya.

Ndiso Jesús in tniuu kaꞌnu

23Yun te ni ndiuu Jesús nuu oo veñuꞌu. Te nini kaxtnoꞌo ya tnoꞌo ia Dios nuu ñayiu, te ni jinokuei tee ka kuu nijaꞌnu nuu sutu vi tee ka kuu nijaꞌnu ñuu yun nuu oo ya, te ka jiñaꞌa de:

͏―͏¿Na in tatnuni ja saꞌa ni tniuu yaꞌa, axi na in ni chitniuu ña ja saꞌa ni yaꞌa? ͏―͏ka jiñaꞌa de.

24Te jiñaꞌa Jesús:

͏―͏Suni sein na kakan tnoꞌo ña san in tnoꞌo jin ni. Te nuu ja vi kaꞌan ni, te suni kaꞌan san na in tatnuni ja saꞌa san tniuu yaꞌa. 25¿Na in ni tatnuni ja oskuandute Juan? ¿A maa ia Dios oo ndee andivi, axi ñayiu ñuyiu yaꞌa? ͏―͏jiñaꞌa ya.

Yun te ni ka jinkondee de ka tee tnaꞌa de, te ka kaꞌan de:

͏―͏Nuu ja vi kuñaꞌo ja ia Dios ni tatnuni, te kachi de: “¿Te nau ja tu ni ka kandija ni nuu saa?” 26Te nuu ja na vi kuñaꞌo ja ñayiu ñuyiu ni ka tatnuni, te ka yuꞌo ñayiu ñuo ja vi kiti ini nuo, chi ndiꞌi ka kandija ja Juan, chi tee ni ondakani tnoꞌo ia Dios ni okuu de ͏―͏ka kachi de.

27Te ka jiñaꞌa de nuu Jesús:

͏―͏Tu ka jini san.

Te jiñaꞌa ya:

͏―͏Nuu saa te suni sein ma kaxtnoꞌo san na in tatnuni ja saꞌa san tniuu yaꞌa ͏―͏jiñaꞌa ya.

Ni kaꞌan jioniꞌni Jesús ja jaꞌa uu seyii

28Yun te ni jikan tnoꞌo ña Jesús:

͏―͏¿Naxa ka kachi tna ni? Oo in tee nevaꞌa uu seyii de, te ni jino de nuu seꞌe xtnañuꞌu de, te jiñaꞌa de: “Kuaꞌan vitna, vi seyii, te satniuu ron nuu uva rin”. 29Te jiñaꞌa seyii de yun: “Tu kaꞌan san kiꞌin san”, jiñaꞌi. Su nuu kuee ka, te ni ndatnaꞌu ini, te kuaꞌin. 30Yun te ni jino de nuu inka seyii de yun, te inuu ni ni kaꞌan de jin suchi yun. Te jiñaꞌi: “Vatuka, vi jitoꞌo san, kiꞌin san”, jiñaꞌi. Su tu ni jaꞌin. 31¿Te ndee suchi yaꞌa ni saꞌa nagua kuini tatai? ͏―͏jiñaꞌa ya.

Te ka jiñaꞌa tee yun:

͏―͏Suchi xtnañuꞌu yun.

Yun te jiñaꞌa Jesús:

͏―͏Kaꞌan ndaa ndija san ja tee ka xtutu xuꞌun impuestu vi ñasiꞌi ka xiko maa, ka kuu ja kiukuei xna ka nuu tatnuni ia Dios saa in in maa ni. 32Chi ni kii Juan nuu maa ni, te ni kaxtnoꞌo de ichi ndaa, nagua kuini ia Dios, te tu ni ka kandija ni. Su tee ka xtutu xuꞌun impuestu vi ñaꞌa ka xiko maa, chi ni ka kandija. Su maa ni, chi visi ka ndiaꞌa ni yaꞌa, te tu ka ndatnaꞌu ini ni ja naxa vi kandija ni.

Ni kaꞌan jioniꞌi Jesús ja jaꞌa tee kueꞌe ndevaꞌa

33’Vi konini ni na kaꞌan san inka tnoꞌo jioniꞌi. Ni oo in tee nevaꞌa ñundeꞌi, te ni xtee de tnu uva de, te ni jasi de tnu vi ni savaꞌa de in nuu kokuꞌni de nduxi uva de, te ni saꞌa de in veꞌe sukun nuu vi koxnee sukun ñayiu, nagua kuu vi kokotoi ndiꞌi ja nevaꞌa de, te ni jiñaꞌa nuu de ñundeꞌi de nuu sava tee ja vi kokutu de, te vi tniuyaꞌu de ñundeꞌi yun, te ni kee de kuaꞌan jika de. 34Te nuu ni kuyatni kiuu ja ndututu uva yun, te ni tetniuu de tee ka jinokuechi nuu de ja vi nukiꞌin tee yun uva ja ndaniꞌi maa de nuu tee ka jitu ñundeꞌi yun. 35Su tee ka jitu ñundeꞌi yun, chi ni ka tnii de tee ka jinokuechi yun, te in de ni ka kani de, te inka de ni ka jaꞌni de, te inka de ni ka kuun ña de yuu. 36Yun te ni tetniuu tuku de kuaꞌa ka tee ka jinokuechi nuu de saa jaxtnañuꞌu, te inuu ni ka saꞌa ña de.

37’Te sandiꞌi, te ni tetniuu de seꞌe de, chi ni ndakani ini de: “Vi konee yiñuꞌu de nuu seyio”. 38Su tee ka jitu nuu ñundeꞌi yun, chi nuu ni ka jini de seyii tee xiin uva yun, te ni ka ndatnoꞌo tnaꞌa de: “Suchi yaꞌa kuu suchi saꞌa jajin uva yaꞌa. Na kiꞌinkueio te vi kaꞌnio jin, te na vi saꞌa jajin mao uva yaꞌa”, ka kachi de. 39Te ni ka kakuiko ña de jin, te ni ka keneꞌe ña de yuꞌu nuu oo uva yun, te ni ka jaꞌni ña de ͏―͏jiñaꞌa ya.

40Yun te jikan tnoꞌo ña ya:

͏―͏Te nuu na ndii maa jitoꞌo uva yun, ¿naxa saꞌa ña de jin tee ka jitu yun? ͏―͏jiñaꞌa ya.

41Yun te ka jiñaꞌa de:

͏―͏Ni ma kundaꞌu ini ña de, chi kaꞌni ña de jin tee kueꞌe ndevaꞌa yun, te kuñaꞌa nuu de ñundeꞌi de yun nuu sava ka tee ja vi kutu de, te vi ndakuñaꞌa de uva ja kokuu kuenta maa de, nagua yoo kee maa ti ͏―͏ka jiñaꞌa de.

42Te jiñaꞌa Jesús:

͏―͏¿A tu ka kaꞌu saꞌun ni nuu tutu ii nuu kaꞌan suaꞌa:

Kava ja ni ka skexiko tee ka saꞌa veꞌe,

ni nduu kava kaꞌnu ja yituu skina veꞌe,

te maa Jitoꞌo Dios ni saꞌa yun,

te vi ka saꞌu kuii kuiti inio ka ndiaꞌo?

Kachi tutu ii.

43’Te yun guaa kaꞌan san ja ndakindee ia Dios nuu tatnuni ya nuu ni, te kuñaꞌa ya nuu ñayiu ja vi satniui nagua kuini maa ya. 44Te na ñayiu kanakau siki kava yun, te vi kuechi kueli. Te na ñayiu xiin siki kanakau kava yun, te vi saꞌa yuchi ña ͏―͏jiñaꞌa Jesús.

45Te nuu ka onini tee ka kuu nijaꞌnu nuu sutu vi tee ka kuu fariseo ja kaꞌan jioniꞌi ya, te ni ka jinkuiꞌnu ini de ja siki maa de kaꞌan ya. 46Su nuu ni ka nduku de naxa vi kakuiko ña de, te ni ka yuꞌu de ja vi kiti ini ñayiu ñuu nuu de, chi ka kandijai ja in tee ndakani tnoꞌo maa ia Dios kuu ya.

Currently Selected:

San Mateo 21: xtnNTplus

Highlight

Copy