San Mateo 17

Ni ndasama naxa kaa Jesús

1Nuu ni yaꞌa iñu kiuu, te ni jaka ña Jesús jin Pedro vi Jacobo vi ñani de Juan, te kuaꞌankuei ya in yuku sukun. 2Te yun ni ndasama ya jin nuu tee yun, chi ni ndayeꞌe nuu ya na kuinio nikandii, te ni nduyaa saꞌun niꞌnu ya na kuinio nuu yeꞌe tajan. 3Te sanaa ni ka ndatuu Moisés vi Elías ka ndatnoꞌo jin ya. 4Yun te jiñaꞌa Pedro nuu Jesús:

͏―͏Jitoꞌo san, nase guaꞌa kuu ja yaꞌa ka oo san. Te nuu ja kuini ni, te na vi saꞌa san uni veꞌe kuii yaꞌa, in koo maa ni, vi in koo Moisés, vi inka koo Elías.

5Te vi nini kaꞌan de, te ni yeꞌe in viko, te ni chisaꞌu ña jin de, te ni ka jini soꞌo de in tnoꞌo kaꞌan nuu viko yun, te jiñaꞌa:

͏―͏Suchiaꞌa kuu seꞌe maa rin ja kutoo ndevaꞌa rin, te kusii ini rin jin. Te vi konini tnoꞌo kaꞌin ͏―͏jiñaꞌa tnoꞌo yun.

6Su nuu ni ka jini soꞌo tee ka skuaꞌa yun, te ni ka chindei de nuu de ndee nuu ñuꞌu, chi ni ka yuꞌu ndevaꞌa de. 7Yun te ni kuyatni Jesús nuu ka oo de, te ni tnii ña ya, te jiñaꞌa ya:

͏―͏Vi ndakoo ni, ma vi yuꞌu ni.

8Te nuu ni ka ndaneꞌe nuu de, te tu nagua ni ka jini ka de, chi maintnoꞌo ni ka maa Jesús.

9Te nuu manukuei ya nuu yuku yun, te ni tatnuni Jesús, te jiñaꞌa ya:

͏―͏Ma vi kokaꞌan saꞌun ni nuu ni in ñayiu ja siun ni ka jini ni vi guaa ndee na ndateku sein ja kuu san Seꞌe Teyii neꞌu ndiyi ͏―͏jiñaꞌa ya.

10Yun te ni ka jikan tnoꞌo ña tee ka skuaꞌa jin ya, te ka jiñaꞌa de:

͏―͏¿Nau ja ka kaꞌan tee ka kaxtnoꞌo Ley Moisés ja vi nini kuu ja xtnañuꞌu ka Elías ndii, te saa kii Kristu? ͏―͏ka jiñaꞌa de.

11Yun te jiñaꞌa Jesús:

͏―͏Ja ndaa ja xtnañuꞌu ka Elías ndii, te suu de ndasavaꞌa ndiꞌi. 12Su kaꞌan san ja Elías, chi ja ni kii de, te tu ni ka ndakuni ña ñayiu ja suu de kuu. Chi saa suaꞌa ndevaꞌa ndetnuni ni ka saꞌa ña jin de, nagua ka kuini mai. Te suni saa vi saꞌa ña de jin sein ja kuu san Seꞌe Teyii, chi tnaꞌa san kuaꞌa tnundoꞌo nuu ndaꞌa de ͏―͏jiñaꞌa ya.

13Yun te saa ni ka jinkuiꞌnu ini tee ka skuaꞌa jin ya ja siki Juan, tee ni oskuandute, kaꞌan ya.

Ni ndasaꞌa Jesús in suchi yii kuꞌu kueꞌe jiyiꞌi

14Nuu ni ndentakuei ya nuu ka oo kuaꞌa ñayiu, te ni jintnaꞌa ña in tee jin Jesús, te ni jinkuiin jiti de nuu ya, te jiñaꞌa de:

15͏―͏Jitoꞌo san, kundaꞌu ini ni seyii san, chi kuꞌi kueꞌe jiyiꞌi, te kaꞌu ndevaꞌa saꞌa ña, chi kuaꞌa jichi kei nuu ñuꞌu vi nuu ndute. 16Te ni kisiaꞌa san jin nuu tee ka skuaꞌa jin ni, su tu ni kuu vi ndasaꞌa ña de jin ͏―͏jiñaꞌa de.

17Yun te jiñaꞌa Jesús:

͏―͏Tatatnoꞌo kueꞌe ja tu ka kandija, ¿nasaa ka kiuu kuu ja koo san jin ni? ¿Nasaa ka kiuu guaa kuandee ini san jin ni? Vi kisiaꞌa ni jin yaꞌa nuu saa ͏―͏jiñaꞌa ya.

18Te ni kuxeen Jesús nuu tachi, te ni kana ña jin suchi kuꞌu yun, te vi ore saa ni nduvaꞌi.

19Yun te saa ni ka nutnaꞌa ña tee ka skuaꞌa jin ya, te ni ka jikan tnoꞌo siin ña de:

͏―͏¿Nau ja tu ni kuu vi tau sein tachi yun? ͏―͏ka jiñaꞌa de.

20Te jiñaꞌa Jesús:

͏―͏Saa chi tu ka kandija guaꞌa ni. Chi kaꞌan ndaa ndija san ja nuu na vi kandija ni visi ja in taꞌu luluu nagua luluu in ndikin yuku stancia, te vi kuñaꞌa ni nuu tinduu yaꞌa: “Kujioo te ndayaꞌa ron ndee yun”, te vitna ñuꞌni ndayaꞌa kiꞌin. Chi tu na in tniuu kachio ja ma kuu vi saꞌa ni. 21Su in tachi kaa siun, chi ma kee saꞌun kiꞌin nuu ja ma konditeo vi ma ndakuatuo ͏―͏jiñaꞌa ya.

Ni kaxtnoꞌo tuku Jesús inka jichi ja kuu ya

22Te nuu ka otutu de Galilea, te jiñaꞌa Jesús:

͏―͏Sein, ja kuu san Seꞌe Teyii, chi vi sinotuu ña jin san nuu ndaꞌa ñayiu 23te vi kaꞌni ña, su nuu uni kiuu, te ndateku san neꞌu ndiyi ͏―͏jiñaꞌa ya.

Te ni ka kusuchi ndevaꞌa ini de ja siun ni kaꞌan ya.

Ni ka jikan tnoꞌo ña tee ka xtutu xuꞌun impuestu jin Pedro

24Te nuu ni ndentakuei Jesús jin tee ka skuaꞌa jin ya ñuu Capernaúm, te ni jaꞌankuei tee ka xtutu xuꞌun impuestu ja vi kuantniuu nuu veñuꞌu nuu oo Pedro, te ka jiñaꞌa de:

͏―͏¿A tu tniuyaꞌu mastru ni xuꞌun impuestu ja vi kuantniuu nuu veñuꞌu? ͏―͏ka jiñaꞌa de.

25͏―͏Tniuyaꞌu de ͏―͏jiñaꞌa Pedro.

Su nuu ni ndiuu de veꞌe, te xtnañuꞌu ka maa Jesús jiñaꞌa:

͏―͏¿Naxa kaꞌan tna maa ni, vi Simón Pedro? ¿Na xiin nuu ka jikan tee ka kuu rey ñuyiu yaꞌa xuꞌun impuestu vi xuꞌun ja vi kuantniuu maa de nuu ñuu? ¿A nuu seꞌe maa de axi nuu sava ka ñayiu?

26Yun te jiñaꞌa Pedro:

͏―͏Nuu sava ka ñayiu.

Te jiñaꞌa Jesús:

͏―͏Nuu saa te seꞌe de, chi tu na tniui ja vi tniuyaꞌui. 27Su ja ma vi nduxii ini de jion, te kuaꞌan ni yuꞌu ndute mar, te skee ni kaa tikanchu ni, te chiaka xtnañuꞌu ja tau ni, tnii ni ti, te kune ni yuꞌu ti, te yun ndaniꞌi ni in xuꞌun ja kenta ja tniuyaꞌu ni impuestu nduo ͏―͏jiñaꞌa ya.

Currently Selected:

San Mateo 17: xtnNTplus

Highlight

Copy