San Juan 4

Ni ka ndatnoꞌo Jesús jin in ñaꞌa ñuu Samaria

1Te nuu ni jini Jitoꞌo Jesús ja ni ka onini tee ka kuu fariseo ja ka kaꞌan ñayiu: “Mavikaya ka tee ka skuaꞌa jin Jesús vi kuaꞌa ka ñayiu skuandute de saa Juan”, ka jiñaꞌi, 2visi masu maa ya ni skuandute ñayiu, chi tee ka skuaꞌa jin ya ni ka skuandute ña. 3Yun te ni ndekuei ya ñuu ja tnii Judea, te kuanoꞌokuei ya inka jichi Galilea.

4Te ja noꞌokuei ya ñuu yun, chi nini kuu ja vi yaꞌa ya ñuu Samaria. 5Te ni jinokuei ya in ñuu nani Sicar, ja tnii Samaria, nuu ñundeꞌi ndi Jacob ja ni jiñaꞌa de nuu seꞌe de José ndee janaꞌa. 6Te yun oo in poso ndute ja ni savaꞌa ndi Jacob. Yun te ni junkoo Jesús yuꞌu poso yun, chi ni kutnuu ya ja ni ka jika ya. Te ja oo ndee sau nduu. 7Te ni jino in ñaꞌa Samaria ja tau ña ndute, te jiñaꞌa Jesús:

―Kuni mani ña ni joo ndute ni na koꞌo san, vi kuaꞌa ―jiñaꞌa ya.

8Chi kuaꞌankuei tee ka skuaꞌa jin ya maa ini ñuu ja vi kuaan de nagua vi kaa de jin ya.

9Te jiñaꞌa ñaꞌa Samaria yun:

―¿Nau ja saa nuu sein ja kuu san in ñaꞌa Samaria jikan ni ndute koꞌo ni, te tee judio kuu ni, vi kuaꞌa? ―jiñaꞌa ña, chi tu ni ka ondeka tnaꞌa vaꞌa ñayiu judio jin ñayiu Samaria.

10Yun te jiñaꞌa Jesús:

―Nuu ja suaꞌa te kuni ni ja skutaꞌu ña ia Dios, te na in kuu tee ja kachi nuu ni: “Kuni mani ña ni joo ndute ni na koꞌo san”, te kakan maa ni ndute nuu san, te taa san ndute taa ja koteku ni ―jiñaꞌa ya.

11Te jiñaꞌa ñasiꞌi yun:

―Kuaꞌa, tu nagua nee ni ja tau ni ndute, te poso yaꞌa, chi kunu, ¿te ndenu niꞌi ni ndute taa ja koteku san? 12¿Axi kaꞌnu ka ni saa ndi tata jaꞌnuo Jacob, ja ni xndendoo de poso ndute yaꞌa nuu ni ojiꞌi maa de ndute vi ni ka ojiꞌi seꞌe de vi kiti de? ―jiñaꞌa ña.

13Yun te jiñaꞌa Jesús:

―Nani kuu ñayiu ja ka jiꞌi ndute yaꞌa, te vi jiokuiin vi koyichi kai. 14Su ndia ñayiu vi koꞌo ndute ja kuñaꞌa maa san, chi ma vi koyichi kai, chi saa suaꞌa ndute ja kuñaꞌa san yun junkoo in nuu kaꞌnu de ini anu ñayiu, te jinonta nuu de ja koxteku ña de nikuii nikani ―jiñaꞌa ya.

15Te jiñaꞌa ñasiꞌi yun:

―Taa ni joo ndute jian na koꞌo san, vi kuaꞌa, nagua ja ma koyichi ka san, te ni ma kokii ka san yaꞌa ja kotau ka san de ―jiñaꞌa ña.

16Te jiñaꞌa Jesús:

―Kuaꞌan ni manukana ni yii ni, te kikuei ni yaꞌa ―jiñaꞌa ya.

17Yun te jiñaꞌa ñasiꞌi yun:

―Tu na yii san.

Te jiñaꞌa Jesús:

―Vatuka kaꞌan ni ja tu na yii ni, 18chi ja ni kuu uꞌun yii ni oo, te tee oo jin ni vitna, chi masu yii ni kuu de, te kaꞌan ndaa ndija ni ―jiñaꞌa ya.

19Te jiñaꞌa ñasiꞌi yun:

―Kuaꞌa, na tnoꞌo kaꞌan san ja tee ndakani tnoꞌo ia Dios kuu ni. 20Te tata jaꞌnu san, ñayiu Samaria, chi siun ni ni okikuei nuu yuku yaꞌa ja ni ka ochiñuꞌi ia Dios, te maa ni ja ka kuu ni ñayiu judio, chi ka kaꞌan ni ja Jerusalén kuu nuu kuini ja chiñuꞌo ia Dios ―jiñaꞌa ña.

21Te jiñaꞌa Jesús:

―Kandija ni, vi kuaꞌa, ja ja vaji ore ja vi chiñuꞌu maa ni Tata Dios, su ma kokuu nuu yuku yaꞌa ni Jerusalén. 22Maa ni, chi ka chiñuꞌu ni ia tu ka jini ni. Su sein, chi ka chiñuꞌu san ia ka jini san, chi neꞌu ñayiu judio vaji ia skaku niꞌnu ña. 23Su ja vaji ore te vitna kuu nuu vi chiñuꞌu ndaa ndija ñayiu Tata Dios jin Espíritu ya, chi suni nduku Tata Dios ñayiu ja vi ndee ini ndee anui vi chiñuꞌi ya. 24Dios, chi Espíritu kuu ya, te ñayiu ja ka chiñuꞌu ya kuini ja vi chiñuꞌu ndai ya jin Espíritu ya ja oo ini anui ―jiñaꞌa ya.

25Te jiñaꞌa ñasiꞌi yun:

―Ja jini san ja kii Mesías, ia tetniuu Dios, ja nani ya Kristu. Te nuu na kenta ya, te kaxtnoꞌo ndiꞌi ya nani guaa kuu ―jiñaꞌa ña.

26Te jiñaꞌa Jesús:

―Su ia kaꞌan ni yun kuu maa san ja ka ndatnoꞌo jin ni ―jiñaꞌa ya.

27Te vi maa nuu saa ni ndajinokuei tee ka skuaꞌa jin Jesús, te vi ni ka saꞌu kuii kuiti ini de ja siun ni ka jini de ka ndatnoꞌo ya jin in ñasiꞌi, su ni in de ña ni ka jikan tnoꞌo ya: “¿Nagua jikan tnoꞌo ni?”, axi “¿nagua ka ndatnoꞌo ni jin ña?” 28Yun te ni xndendoo ñasiꞌi yun kiyi ña, te kuanoꞌo ña maa ñuu, te jiñaꞌa ña nuu ñayiu ñuu ña:

29―Neꞌekuei ni te vi kuni ni in tee ja vi ni kaꞌan ndiꞌi de nagua ni osaꞌa san. ¿A masu tee yaꞌa kuu Kristu, ia tetniuu Dios? ―jiñaꞌa ña.

30Yun te ni kekuei ñayiu ñuu yun, te kuaꞌankuei nuu oo Jesús. 31Te vi nini ka kuu saa, te ka jiñaꞌa tee ka skuaꞌa jin Jesús:

―Mastru, kaa ni xtaa ―ka jiñaꞌa de.

32Te jiñaꞌa Jesús:

―Nevaꞌa maa san in ja kaa san, in ja tu ka jini ni ―jiñaꞌa ya.

33Yun te ka ndatnoꞌo tnaꞌa tee ka skuaꞌa jin ya:

―¿A na in kisiaꞌa ja kaa de? ―ka kachi de.

34Te jiñaꞌa Jesús:

―Ja kaa san kuu ja saꞌa san nagua kuini maa ia ni tetniuu ña jin san, te na xndiꞌi san tniuu ja ni tenuu ña ya. 35Chi ka kachi maa ni: “Jaꞌni ña kuun ka yoo ja vi ndaxtutuo ja ni ka jituo nuu ñundeꞌio”. Vatuka, su sein, chi kaꞌan san: “Vi ndanenuu ni te vi kondiaꞌa ni nuu ñundeꞌi ja vi vivii ja makuaan ja ka jitu ni ja vi ndaxtutu ni nuu ñuꞌu yun”. 36Te ñayiu ndaxtutu nuu ñundeꞌi, chi niꞌi yaꞌui, te yaꞌui yun kuu ja ndaxtutui ja kee nuu ñundeꞌi nagua ja kotekui nikuii nikani, saa nagua ja suni ñayiu jitu nuu ñundeꞌi jin ñayiu ndaxtutu, inuu ni na vi kokusii ini. 37Chi saa te kee ndaa ja ka kaꞌan ñayiu: “In ñayiu jitu nuu ñundeꞌi, te inkai kuu ja ndaxtutu”. 38Te tetniuu ña san ja vi ndaxtutu ni nuu tu ni ka jitu maa ni, chi inka ñayiu ni ka jitu, te vi ndaxtutu maa ni nagua ni ka jitu ñayiu yun ―jiñaꞌa ya.

39Te kuaꞌa ñayiu ñuu Samaria yun ni ka kandija ña jin ya, jin tnoꞌo kaꞌan ñasiꞌi yun ja ndakani ña nuu jiñaꞌa ña suaꞌa: “Ni kaꞌan ndiꞌi de nuu san nagua ni osaꞌa san”, jiñaꞌa ña. 40Yun te ni jinokuei ñayiu ñuu Samaria nuu oo ya, te ni ka jikantaꞌui ja na kendoo ya vi koo ya jin ndee saa kiuu, te ni oo ya ñuu yun uu kiuu. 41Te kuaꞌa ndevaꞌa ka ñayiu ni ka kandija ya nuu ni ka onini tnoꞌo ni kaꞌan ya. 42Te ka jiñaꞌi nuu ñasiꞌi yun:

―Masu ka kandija ka san maintnoꞌo tnoꞌo ni ndakani ni, chi vi ni ka onini maa san, te ni ka jini ndaa san ja suu ia yaꞌa kuu Kristu, ia skaku niꞌnu ñayiu ñuyiu ―ka jiñaꞌi.

Ni ndasaꞌa Jesús seꞌe in tee netniuu nuu rey

43Te nuu ni yaꞌa nuu uu kiuu, te ni ndee Jesús ñuu yun, te kuanoꞌo ya ñuu ja tnii Galilea. 44Chi visi maa Jesús ja ni kaꞌan ja ni in tee ndakani tnoꞌo ia Dios, tu ka nee yiñuꞌu ñayiu ñuu maa de nuu de. 45Su nuu ni ndenta ya ñuu ja tnii Galilea, te ni ka jantaꞌu guaꞌa ña ñayiu ñuu yun jin ya, chi ja ni ka jini nui ndiꞌi ja ni saꞌa maa ya ñuu kaꞌnu Jerusalén nuu ni oo viko pascua, chi suni ni jaꞌankuei ñayiu yun nuu viko.

46Ni jaꞌan tuku Jesús inka jichi ñuu Caná ja tnii Galilea nuu ni ndasaꞌa ya ndute ja ni nduu vinu. Te yun ni oo in tee ñuu Capernaúm ja nee de tniuu kaꞌnu nuu rey, te oo in seꞌe de ja kuꞌi. 47Te nuu ni onini de ja ni ndajiokuiin Jesús ndee Judea, te kuanoꞌo ya Galilea, ni jaꞌan de nuu oo ya ja kakantaꞌu de nuu ya ja na ndenuu ya ñuu de ndasaꞌa ya seꞌe de, chi vi ja oi ja kui. 48Yun te jiñaꞌa Jesús:

―Nuu ja suaꞌa, te ma vi kuni ni seña vi jakaꞌnu saꞌa san, chi ma vi kandija ni ―jiñaꞌa ya.

49Te jiñaꞌa tee nee tniuu kaꞌnu nuu rey:

―Jitoꞌo, tanundaꞌa ni, kiꞌinkueio joo ama ka ja kuu seꞌe san ―jiñaꞌa de.

50Te jiñaꞌa Jesús:

―Kuanoꞌo ni, chi ja ni nduvaꞌa seꞌe ni ―jiñaꞌa ya.

Te ni kandija tee yun tnoꞌo ni kaꞌan Jesús nuu de, te kuanoꞌo de. 51Te nuu mandenuu de ñuu de, te ni ka nutnaꞌa ña tee ka jinokuechi nuu de, te ka jiñaꞌa de:

―Ni nduvaꞌa seꞌe ni, vi Jitoꞌo ―ka jiñaꞌa de.

52Yun te ni jikan tnoꞌo ña de:

―¿Na ore ni kejaꞌi ja ni nduvaꞌi?

Te ka jiñaꞌa de:

―Nuu ka in iku ni kee ña kiji jin ―ka jiñaꞌa de.

53Yun te ni jinkuiꞌnu ini de ja ore saa kuu nuu jiñaꞌa Jesús: “Ja ni nduvaꞌa seꞌe ni”, te ni ka kandija ndiꞌi de jin ñayiu veꞌe de. 54Te yaꞌa kuu tniuu kaꞌnu kuu uu ja ni saꞌa Jesús nuu ni ndajiokuiin ya Judea ja kuanoꞌo ya Galilea.

Currently Selected:

San Juan 4: xtnNTplus

Highlight

Copy