Hechos 12

Ni jaꞌni ña Herodes jin Jacobo, te ni jasi de Pedro vekaa

1Te kuia yun ni jinkondee rey Herodes ni tatnuni de ja ni ka kakuiko de sava ñayiu ka skuaꞌa ja saꞌa ndevaꞌa ña de. 2Te ni tatnuni de ja ni ka jaꞌni Jacobo, ñani Juan, jin in yuchi kani. 3Su nuu ni jini de ja ni ka junkuaan ini ñayiu judio, te suni ni tatnuni de ja ni ka kakuiko tuku de Pedro. Te saa ni kuu kiuu viko pascua ja ka jaa ñayiu judio xtaa vixin ja tu na levadura yiꞌi. 4Te nuu ni kakuiko Herodes Pedro, te ni jasi ña de vekaa. Te ni jani de kuun yukun soldado ja kuun kuun de in in yukun ja na vi kondee ña de, chi ni ndakani ini de ja keneꞌe ña de nuu ñayiu ñuu ndee nuu na yaꞌa viko pascua yun. 5Te yun guaa ka ndee guaꞌa ña soldado jin Pedro ini vekaa yun, su ñayiu ka skuaꞌa, chi vi ni ini kuiti ka ndakuatui nuu ia Dios ja jaꞌa de.

Ni skaku niꞌnu ña ia Dios jin Pedro vekaa

6Te nuu jakuaa saa ni ndakani ini Herodes ja kiuu tnee keneꞌe ña de jin Pedro nuu ñayiu ñuu. Te jakuaa yun ni kixin Pedro neꞌu uu soldado nuꞌni de jin uu cadena, te sava ka soldado yun ka jito guaꞌa de yeꞌe vekaa yun. 7Te vi sanaa ni ni jino in ia jinokuechi nuu Jitoꞌo, te ni yeꞌe niꞌnu in ñuꞌu ini vekaa yun, te ni skanda ya xiin Pedro ja ni xndoto ña ya, te jiñaꞌa ya:

―Ndakoo ñama.

Te vi ore saa ni junkuei cadena ndikin ndaꞌa de. 8Te jiñaꞌa ka ia jinokuechi yun:

―Ndakuꞌni chii ron, te ndachiꞌi ndijan ron.

Te ni ndakuꞌni Pedro chii de vi ni ndachiꞌi de ndijan de. Te jiñaꞌa tuku ya:

―Kakondii soo suꞌnu ron, te kondikin ña, kiꞌon ―jiñaꞌa ya.

9Te ni ndee de ndikin de ia yun, su tu ni jinkuiꞌnu ini de a jandaa kuu ja saꞌa ia jinokuechi yun, chi ndakani ini de ja suaꞌa ni ni skuni ña jin de. 10Su ni ka yaꞌa de yeꞌe xtnañuꞌu nuu ka oo tee ka jito yun vi yeꞌe kuu uu nuu ka oo sava ka tee ka jito yun, te nuu ni kentakuei de yeꞌe kuu kaa ja kuaꞌan ichi kayi, te ni ndanune ni maa, te ni kekuei de ja ni ka yaꞌa de in kayi. Yun te ni xndoo ña ia jinokuechi yun jin de. 11Yun te ni ndikuiꞌnu ndaa ini Pedro, te ni ndakani ini de:

―Vitna te jinkuiꞌnu ndaa inio ja Jitoꞌo ni tetniuu in ia jinokuechi nuu ya ja ni skaku niꞌnu ña ya nuu ndaꞌa Herodes vi ni kakuo nuu ndiꞌi jakueꞌe ka kaꞌan ñayiu ñuo judio ja vi saꞌa ñai.

12Te nuu ni kutnuni ini Pedro ja ni kee de vekaa yun, te kuaꞌan de ja ni jino de veꞌe María, siꞌi Juan, ja suni nani de Marcos, nuu ka otutu kuaꞌa ñayiu ka ndakuatu. 13Te nuu ni kana Pedro yeꞌe yun, te ni kee in suchi siꞌi lule nani Rode ja kondiaꞌi na in kana. 14Te nuu ni ndakuni ja Pedro kuu ja kana, te vi ja kusii ndevaꞌa ini. Te tu ni junei yeꞌe yun, chi suaꞌa ni jinoi ni junkaxtnoꞌi, te jiñaꞌi:

―Pedro kuu tee kana yeꞌe yaꞌa.

15Te ka jiñaꞌa ñayiu yun:

―Vaa nduu kueꞌe ron.

Su suchiun, chi vi ni ini kaꞌin ja ni ndakuni guaꞌi ja suu de kuu. Yun te ni ka kaꞌan ñayiu:

―Masu maa de kuu, chi vaa ia jito ña jin de kuu ―ka jiñaꞌi.

16Su Pedro, chi vi kana ni de yeꞌe yun, te nuu ni ka june ñayiu yeꞌe yun, te ni ka jini ñai, te vi ni ka saꞌu kuii kuiti ini. 17Su ni saꞌa seña de ndaꞌa de ja vi kasi yuꞌu ñayiu yun, te ni ndakani de naxa ni keneꞌe ña Jitoꞌo vekaa jin de, vi jiñaꞌa de:

―Vi kaxtnoꞌo ni tnoꞌo yaꞌa nuu Jacobo #12:17 Masu Jacobo ja ni jiꞌi, chi inka de kuu. vi nuu sava ka ñayiu ka kandija ―jiñaꞌa de.

Te ni kee de kuaꞌan de inka ñuu. 18Yun te nuu ni tuu suaꞌa, te ni ka kuvaa ndiꞌi soldado ka saꞌa niꞌi ka saꞌa ioo de, nau ja tu ni ka jini de ndenu kuaꞌan Pedro. 19Yun te ni tatnuni Herodes ja ni ka ndanduku Pedro, su tu ni ka ndaniꞌi ña de. Su nuu ni ndiꞌi ni xndichi de tee ka ojito vekaa yun, te ni tatnuni de ja ni ka jaꞌni ña jin ndiꞌi de. Te nuu ni yaꞌa ja siun ni kuu, te ni kee Herodes ñuu ja tnii Judea kuaꞌan de, te ni jino de ñuu Cesarea, te yun ni oo de.

Ni jiꞌi Herodes

20Te rey Herodes, chi kiti ini de nuu ñayiu ñuu Tiro vi ñayiu ñuu Sidón, su ja ni ka ndatnoꞌo tnaꞌi naxa vi kuñaꞌi nuu rey yun. Te ni ka kaꞌan ndaꞌui jin Blasto, in tee kuu kaꞌnu ka ja netniuu nuu rey, ja na chituu ña de vi kaꞌan de jin rey ja na koo jamani, chi ñayiu ñuu Tiro vi ñuu Sidón ka keꞌin ja vi kai nuu ñayiu ndiꞌi ñuu nuu tatnuni rey yun. 21Te ni jani rey yun in kiuu ni ndakana de ndiꞌi ñayiu, te ni ndekuiꞌnu de saꞌun vii ndevaꞌa niꞌnu de ja kuu de rey, te ni jinkoo de nuu mesa nuu tatnuni de, te ni kaꞌan de in tnoꞌo vii nuu ñayiu yun. 22Yun te ni ka jinkondee ñayiu ñuu yun ka kana jai:

―Masu in tee ñuyiu kuu tee kaꞌan yaꞌa, chi in chuꞌchi kuu ya ―ka jiñaꞌi.

23Te vi ore saa ni kee kueꞌe de, chi ni saꞌa ia jinokuechi nuu Jitoꞌo Dios ja ni ka jaa ña tindaku jin de, te ni jiꞌi de, chi tu ni chiñuꞌu de ia Dios.

24Su tnoꞌo vaꞌa Jitoꞌo Jesús, chi ni jika ni jitenuu nii nuu ñayiu taka ñuu.

25Te Bernabé vi Saulo, chi nuu ni ka xndiꞌi de tniuu ni ka saꞌa de Jerusalén, te ni ka ndajiokuiin de kuanoꞌokuei de Antioquía, te ni ka jaka de Juan, ja suni nani de Marcos.

Currently Selected:

Hechos 12: xtnNTplus

Highlight

Copy