Luka 23

Hristollu dininti a Pilat

1Astumsëna parea di ômënj s'i skullë, o-dusërë Hristollu lla Pilat 2sh ahurhjirë tas spunia ti nës: “Okëcëm aist om ci skutja ômënjjë a noç di kala bunë. Ell nu j'allasë tas i'j pulltjastë xhelepja a Cezar, o-kjamë sinia a lluj ‘Hristo’ shi xëci kë esti vësëjë.” 3Astumsëna Pilat u tërbë: “Tini esht vësëjë a ômënjllu di Judei?” Hristollu j'u turrë: “Tini ishish ma xëc.” 4Dapoja Pilat ll'u xësi a prefcëllu shi a omënjllu: “Nu ma ved vërr steps lla aist om”. 5Ma ej xëcja: “Ell i'j skôllë ômënjjë pi çiçôri sh i'j mvjacë tu tutë Judea, di Galilea pën aô”.

Hristollu dininti a Herod

6Kënd avxë aistë, Pilat tërbë nakë ara galileas aist om. 7Kit llo di hëbari kë Hristollu vinia di biloku ju ma marrë ali qeverrii ara Herod, u pëtërku lla nës, pedhis ci Herod ara tu Jerusalem aceli xëli. 8Kënd u vëxu Hristollu, Herod s'hërësi mullt. Ell avja mullt qëro ci vra s'u vëdja, kë avja avxatë ti nës, shi vra tas u vëdja, kënd fëcja vërrë çudii. 9Ell u tërbë mullt, ma Hristollu nu i'j turrë xhuvapi. 10Ako ara sh ma mërjë a prefcëllu shi skribënjjë, ci u nxhura ku mulltë inati. 11Sh Herod ku andarcjë a lluj s'arrëdja ku Jezus. Dapoja j'amënarë pi numëri unë pelerinë skëpërôsë shi u pëtërkurë lla Pilat. 12Aca xuë Herod shi Pilat s'fecërë ôspic un-ku-allant, kë ma ninti ara tu hasmëllëqi.

Hristollu u dunuirë ku môrti

13Astumsëna Pilat adunë ma mërjë a prefcëllor, domnjë sh ômënjjë 14shi ll'u xësi: “Nj'avec adusë aist om, sh i'nj xëcec kë ell i'j skôti ômënjjë dit kali. Ja, mini u tërbaj dininti a vôstë, ma nu afllaj lla aist om stepsu ci ma nj'xëcec, 15niki Herod, kë ell u pëtërku lla noj. Aist nu ari faptë cëva tas u vëtëmëm.” 16-17Tjaca us u dunuest sh us'u sëlëgjest. 18Astumsëna ej aurrarë tuc dadun: “Vatëmu aist, sh sëlëgjë Baraba.” 19Baraba o-vja hjiptë tu hapsani ti unë katraullë ci ara faptë tu kasabai sh ti unë vëtëmari. 20Pilat, ci vra s'u sëlëgja Hristollu, i'j tërbë napoj ômënjjë, 21ma ej aurra sh xëcja: “Kurrfusicu, kurrfusicu!” 22Sh napoj, a treôra ell ll'u xësi: “Këce, ci steps ari faptë? Nu ma afll lla Nës vërr llath, tas u dunuest ku môrti, tjaca us'u vërjest sh us'u sëlëgjest”. 23Ma ej napoj ku bôci analltë këfta tas u kurrfusjastë. Aurrara a llor s'fëcja totëna sh ma vërtôsë. 24Astumsëna Pilat dedi apofasi tas u dunua. 25Sëlëgji omu ci avja këftatë, acell ci ara hjipt tu hapsani ti vëtëmari, sh ll'u dedi Hristollu kum vra ej.

Kurrfusera a Hristollu

26Kënd ma o-ducja ti kurrfuseri, llôrë unë farë di Simon di Kirena, ci ma vinia dit agur, sh i'j nkërkarë kërucja tas u cënia dupi Hristollu. 27Unë parei mari di ômënj nëxja dupi nës. Namësa di nësh, ara shi ndau mujer, ci agudja qeptu sh pëllnxja ti nës, 28ma Hristollu s'turrë kiti nësi, sh ll'u xësi: “Hjijili a Jerusalem, nu pëllnxec ti mini, ma pëllnxec ti voj sh ti cilëmanjjë a voç. 29Us jinë xëlili ci us xëkë: ‘Hara di mujerrë shterpi, hara di aceli ci nu amëntarë pote, sh sinu ci nu hërri.’

30Astumsëna us ahurhjastë s'll'u xëkë a muncëllor:

‘Rrustunacvë pisti noj’

sh a lloku ‘Amvëlicnë!’

31Shi ma kë us fakë ashë ku lemu moj, ci us fakë ku uskatu?”

32Ej adusërë sh doj allc kriminelënj tas i'j kurrfusjastë dadun ku Hristollu. 33Kënd axhumsërë lla biloku ci s'akjëma “Kafka” kurrfusirë ako Hristollu sh doj allc, un di na ndrapta sh allant di na stënga. 34Dapoja Hristollu xësi: “Përinte, hërxjajë kë nu shti ci fak!” Ej amënarë shortë t'i përcari stranjli a lluj. 35Ômënjjë stëtja ako sh vëdja kum mërjë s'arrëdja sh xëcja: “Allanc i'j skëpë. Ma kë ell esti Hristollu a Dumëxë, Aleptu, as u skapë sh bana a lluj.” 36Sh andarcjë s'arrëdja. Ej vinërë, j'adusërë puskë 37sh i'j xësërë: “Ma esht vësëjë a judenjllu, skapë sinia a ta!” 38Pisti kapu a lluj ara skëratë: “Aist esti vësëjë a judenjllu.” 39Un di kriminelënjjë, kurrfusit tu këruci, ma u nxhura sh i'j xëcja: “Nu esht tini Hristollu? Skapë sinia a ta!” 40Ma allant u vërji sh i'j xësi: “Nu aj frikë di Dumëxë, tini ci ma strrax unë soji ka Ell? 41Noj hjim dunuic ku ndreptjacë, kë ma llom aca ci n'i tukueshti, ti aceli ci avem faptë, ma aist nu ari faptë içvërrë amartii”. 42Dapoja xësi: “Jezus, aduqati ti mini kënd s'nex tu kratu a tëll.” 43Hristollu i'j xësi: “Darihënja ma c'xëk, azë tini us esht ku mini tu parajsë”.

Murera a Hristollu

44Aprôpja di prrënx, un nor llaj amvëli lloku, pënd tu satja tre dupi prrënx. 45Sorrë s'amvëli sh perdja a tempullu s'dësëkë pi disa. 46Astumsëna Hristollu gri ku bôci analltë: “Përintële, tu mënjli a tëli ma o-llas sufulltu a njell.” Dupi aisti zbôrri, dedi sufullt. 47Kënd vëxu ci s'feci centurion allëvdë Dumëxe sh xësi: “Darihënja aist om ara ndrept”. 48Tuc ômënjjë ci ara adunac ako ti vëderi aistë gjëji, bëgarë ôrë ci s'feci, s'turrarë akasë, sh bëtja qeptu. 49Tuc kënëskucjë a lluj, dadun ku mujerrë ci o-vja ashtërratë di Galilei, stëtja dëparti sh vëdja aistë ci s'feci.

Ngurpara a Hristollu

50Ako tihjisi un om bun sh ndrept ku numa Jozef. Ell ara un di ômënjjë ali sinedri (kshillu), 51ma nu ara tu unë minti ku allanc ti aca ci fecërë. Jozef ara di Arimateja, unë kasabai ali Judei, sh ashtëptja kratu a Dumëxë. 52Ell nesi la Pilat, sh këftë trupu a Hristollu. 53Astumsëna u dupunë dit këruci, o-vërrti tu unë bukatë di lir, sh u bëgë tu unë grôpë zhdikisë tu unë shkëmbë, ju nu ara bëgat içvërr. 54Ara vinër, sh apëra sëmbëta. 55Mujerrë ci avja vinitë di Galilei ku Hristollu, o-shtërrarë dinëpoj Jozef. Eli u vëxurë grôpa, vëxurë sh kum ara bëgat trupu a Hristollu. 56Dapoja s'i turrarë sh fecërë etëmë untulemu ku njurizmë bunë sh ku mirë.

Currently Selected:

Luka 23: ARUM

Highlight

Copy