Luka 18

Meselea ti mujera vedu shi dhiqigoru

1Dapoja Jezus ll'u spusi unë meselei, tas ll'u spunë ci lipseshti s'ij fakë duvai a Dumëxë totëna, ni agërshatë içvërrorë. 2Ell xësi “Tu unë kasabai ara un dhiqigor ci nu avja frikë di Dumëxë sh nu avja tinjii ti ômënj. 3Tu aca kasabai ara sh unë mujeri fёrë burbat, ci nëxja lla nës shi i'j xëcja: ‘Dënj ndreptjaca dininti acëlluj ci esti kondra ku mini!’ 4Pucën qëro ell nu vra, ma dapoja, s'mindui: ‘Mini nu am frikë di Dumëxë, sh nu am tinjii ti ômënj,

5ma, pedhis ci aistë mujeri ma nj'kadi pi zverkë, us j'u dau ndreptjaca, kë ajumtra ma vini totëna, us m'i fakë tas u qer tropu a njell.’” 6Sh Jezus xësi: “Avxat kë ci xësi dhiqigoru ci nu esti ndrept. 7Ma Dumëxë, nu us'u bagë ndreptjacë ti ma alepcje a lluj ci u kaft nôpti sh xuë. A us'i amënë tas ja xhutë? 8Mini us v'i xëk kë Ell us'u bagë ntrôrë ndreptjaca. Ma kënd s'jinë Hjiju a Omu, a us afllë ninga pistuseri tu aistë dunei?”

Meselea ti fariseu sh omu ci aduna xhelepja

9Acëllor ci u cënia sinia a llor ka ndrepc, shi s'arrëdja ku allanc, Jezus ll'u spusi aistë meselei: 10“Doj ômënj nesërë tu tempull tas s'i'j fakë duvai a Dumëxë. Un ara farise, sh allant aduna xhelepja. 11Fariseu stëtja pi çiçôri, fëcja duvai sh xhuduka: ‘Dumëxë, mini t'i efharistisest ci nu est ka allanc ômënj, fur, munafik, burbat ci faci llath ku mujera, iti ka aist om ci adunë xhelepja. 12Mini cën presëni, dau-or tu stëmënë, sh dau unë tu xaci përc di aceli ci jau.’ 13Ma omu ci aduna xhelepja stëtja dëparti shi nu avja nakërrë tas skulla oqjë kiti cerl, agudja qeptu sh xëcja: ‘Dumëxë, s'ic jinë krimë ti mini ci am faptë amartii!’” 14Mini us v'i xëk: “Aist om, nu fariseu, s'turrë akasë fapt ndrept di Dumëxë. Kë, acell ci allavdë sinia a lluj us'i apunë, sh kaj o-punë sinia a lluj, us'i anallcë”.

Jezus ll'u da rucënjli a cilëmanjllu

15Ndoj ômënj aducja cilëmanjjë lla Jezus, ci ell s'bëga mëna pi nësh, ma kënd i'j vëxurë dishepujë nu vra s'ja llësa. 16Astumsëna Jezus i'j llo cilëmanjjë aprôpja di nës, sh xësi: “Allësacij cilëmanjjë s'jinë lla mini, sh nu i'j turrac nëpoj, kë kratu a Dumëxë ll'u tukueshti acëllor ci sënt ka nësh. 17Mini ma v'i xëk, kë acell ci nu o-prôqë kratu a Dumëxë ka un cilëman, nu us intrë tu nës”.

Omu avut

18Un di ma marjë tu Judei u tërbë: “Mvëcëtor bun, ci prindi s'fak tas qërdhësest bana ti totëna?” 19Jezus i'j xësi: “Këce i'nj xëc bun? Içvërr nu esti bun, gôllë Dumëxëllu. 20Tini l'i shti mvëcëturëli a Dumëxë. Nu fë amartii ku mujera, nu vatëmë, nu furë, nu xë psemati, tinjisja tatëtu sh mëta”. 21Dapoja ell i'j xësi: “Tuti aisti l'am fapti di kënd aram nou.”

22Kënd avxë aistë, Jezus i'j xësi: “Gôllë unë gjeji nu ôj faptë: vindili tuti ci aj, dëllu acëllor ci nu ar, shi us aj mulltë tu cerl. Dapoja hajdi dupi mini!” 23Ma kënd l'i avxë aisti, a lluj i'j s'asparsi sënxili, kë ara mullt avut. 24Jezus u vëxu kë ell s'murzui, tiacë xësi: “Kit zori esti ti acej ci ar mulltë averi tas intrë tu kratu a Dumëxë.” 25Esti ma efkulla s'trakë unë gamilë tu guva a aku, dipi s'intrë un avut tu kratu a Dumëxë. 26Acej ci ma avxa u tërbarë: “Ma dapoja, kaj us pôtë tas skapë?” 27Jezus ll'u turrë: “Aca ci esti mullt ku zori ti ômënjjë, s'faci efkulla di Dumëxë”. 28Astumsëna Pjetru i'j xësi: “Ja, noj l'allësëm tuti ci avjam sh vinum dupi tini”. 29Sh'Jezus i'j xësi: “Darihënja ma v'i xëk, kë içvërr di acej ci ar allësatë kasili sh mujerrë, frac sh fumejë ti sebepja a kratu a Dumëxë, 30nu us arrëmënë ni llôtë mullt tu aist qëro sh us hërësjastë bana tu allantë dunei”.

Jezus paraxësi murera sh'injjara a lluj napoj

31Jezus j'adunë di-unë-parti dojspërxacëjë sh llu xësi: “Ma nëxem tu Jerusalem, sh tuti ci skërarë profecje ti Hjiju a Omu us'i fakë. 32Ell us'u parada lla paganëjë, ci us'i arrëdë,

us'u nxhurë, us'u skuqë, 33shi dupi bëteri us'u vatëmë, ma dupi tre xëli Ell us injjaxë.”

34Ej nu aduqirë cëva, kë aca ci ll'u xësi Jezus ara askumtë ti nësh sh nu aduqirë ci xësi.

Jezus vindëkë un orb

35Kënd Jezus ma s'i apurqa tu Jeriko, un orb stëtja marxëna di kali ku mëna tjasë sh këfta. 36Kënd avxë ci ma tërcja ndoj ômënj, tërbë ci ma s'fëcja. 37Ej i'j xësërë: “Ma treci Jezus di Nazaret”. 38Astumsëna ell gri ku bôci analltë: “Jezus, Hjij a David, sic jinë rrëu ti mini!” 39Acej ci tërcja dininti u ursirë tas këpsja, ma ell aurrë sh ma mullt: “Hjij a David, sic jinë krimë ti mini!” 40Jezus qinduri sh ll'u xësi s'ja ducja orbu. Kënd s'apurqë Ell u tërbë: 41“Ci vre s'fak ti tini?” Orbu xësi: “Domne, voj tas ved napoj!” 42Shi Jezus i'j xësi: “Vex napoj! Pistusera a ta t'i skëpë”. 43Alluj i'j s'i turrë di-unôrë vëdera, nesi dupi Jezus sh tut allëvda Dumëxë. Tuc acej ci u vëxurë, allëvdarë Dumëxë.

Currently Selected:

Luka 18: ARUM

Highlight

Copy