Luka 12

Vëgjacvë di psemati

1Astumsëna, kënd ômënjjë ara adunac tu un bilok, kit këllka un allant, Jezus ahurhji tas ll'u grastë ma ninti a dishepujllu a lluj: “Vëgjacvë di psematli a farisenjllu, kë sent munafic. 2Nu ari cëva amvëlitë ci nu us'i zdëvëlastë, sh cëva askumtë ci nu us'i ja di hëbari. 3Tiaca, cëdo ci avec xësë tu skutidhi us'i avdë tu llunjinë, sh ci avec xhudukatë ku ushëli nkisi us'i avdë dit çatii.”

Nu v'i aspërac

4“Ôspëcje a njej! Mini us v'i xëk: Nu v'i aspërac di acej ci vatëmë trupu, ma, ma nëpoj nu pot s'fakë içcëva ma mullt. 5Ja, kaj lipseshti s'avec frikë: acell ci dupi môrti ari forcë s'v'i aminë tu pisë. Ashë, ashë ma v'i xëc, di aist s'avec frikë. 6A nu s'vind cinci puj ti doj prax? Sh ku-tutë-aca Dumëxë nu agërshështi içvërr di nësh. 7Sh perjë dit kap sënt tuc misurac. Tiaca nu v'i aspërac! Voj hjic ma skungj di mullc puj”.

Spunec ti Hristollu

8“Mini us v'i xëk kë kajcëdo ci us spunë ti mini dininti a ômënjllu, sh Hjiju a Omu us spunë ti nës dininti a ëngjëllu a Dumëxë. 9Ma kaj m'i faci asha dininti a ômënjllu, shi Hjiju a Omu us'u fakë asha acell dininti a ëngjëllu a Dumëxë. 10Kaj greshti kondra ti Hjiju a Omu us'i hërxjastë, ma acell ci us o-ngrakë Sëmtul Duh, nu us'i hërxjastë.

11Kënd s'vi pëtrakë pit sinagogi, dininti a ma mërëllu, ako nu v'i stinahorsic kë kum us zburrac shi ci us xëcec. 12Sëmtul Duh us v'i mvjacë kë ci us xëcec ako”.

Meselea ti avutu fërë minti

13Tu acell qëro un om i'j xësi: “Mvëcëtor, xëj a fratënju tas s'u parcë malla sh avera a nôstë ku mini”. 14Ma Jezus i'j xësi “Kaj m'jari bëgatë anjia dhiqigor tas parc aca ci avec voj, more om?” 15Dapoja ll'u xësi: “S'avec mintja! Vëgjacvë di cëdo tamaqarllëqi ti averi, kë bana a omu nu s'i spinxurë di avera a lluj.” 16Astumsëna ll'u spusi unë meselei: “Agërrë a unuj avutu fecerë mullt. Ashë ell mindui: 17‘Ci s'fak kë nu am ju s'o-dun gërru?’ 18Dapoja xësi: ‘Ja ci us fak: Us l'i asparg hëmbarili a njeli shi us fak ndau ma mër. Ashë us adun tu nësi tut gërru. 19Shi us i'j xëk a sufulltu a njell: Aj mulltë averi ti mullc anj. Zdëkurmëti, mëkë, bja shi hërësjati!’ 20Ma Dumëxë i'j xësi: ‘Teveqele! Di torasjara us t'u ja sufulltu. Ma aceli ci adunash a kuj us j'a rrëmënë?’ 21Ashë pat acej ci o-dunë avera ti nësh, shi nu s'fak avuc dininti a Dumëxë”.

Llukërrë shi stinahorëli

22Jezus ll'u xësi a dishepujllu a lluj. “Nu v'i fëcec mërak ti bana a vostë kë ci us mëkac, niki ti trupu a vost, kë ci us vështec. 23Bana esti ma skumpë di pënia ci mëkac, shi trupu esti ma skump di stranjli. 24Mutric pujë! Ej niki sjamënë, niki adunë, nu ar niki qilar, niki hëmbari, shi ku-tutë-aca Dumëxë i'j hërreshti. Ma voj hjic ma skungj di pujë. 25Kaj di voj ku tutë yzmetja ci i'j faci ali sënëtati us putja s'o-vdagë sh nihjamë bana a lluj? 26Ma kë voj nu putec tas fëcec un lluk ahtënt njik ka aist, këce bëgac mërak ti allanti? 27Vëdec kum kresk lëluçëli. Eli niki llukraxë, niki orxë, ma mini us v'i xëk kë sh Solomon, ku tutë mushutjaca a lluj nu ara mvëskut ka vërrë di nësi.

28Ma kë Dumëxë mveshti jarba di këmp, ci azë esti sh mëni s'ja rrukë tu çërap, a nu us fakë ma mullt kështigë ti voj, ômënj ci nu pistusic? 29Sh voj nu bëgac stinahori kë ci us mëkac shi ci us bjec. 30Sënt paganëjë a shtëje dunei ci l'i kaft tuti aisti gjeji, ma Përintili a vost u shti kë tuti aisti lipsest ti voj. 31Këftac pisti tuti kratu a Dumëxë shi Ell us v'i l'i da sh aceli. 32Nu t'ja spari kupii njikë, kë a Përintëlu a vost j'arëseshti s'vu da avau kratu. 33Vindecu avera a vôstë shi dëdecu ti buniacë. Adunac ti voj avera ci nu us'i fakë veqi pote, sh adunac ti tu cerl averi ci nu us bitisjastë pote. Ako furru nu pôti s'ja prôqë, shi tenja nu pôti su mëkë. 34Kë ako ju esti avera a vôstë ako us hjibë sh inëma a vôstë.

Llukërtorjë bunj

35Strinxec ijëli a vôsti ti lluk, shi cënec llambadhili a vôsti aprasi. 36Fëcecvë ka acej ci ashtjaptë domësu a llor, ci s'i tôrrë di pi numtë, tas i'j zhdikidë usha kit s'da pi nësë.

37Hara di acej ysmeqar ci kënd jini domësu, i'j afllë zhdëpëtac. Shi ku tutë minti us v'i xëk kë ell us ll'u xëkë tas s'ja punë ti mëkari. Dapoja us jinë shi us ll'u fakë ysmeti.

38Ma kë us jinë namësa di nôpti iti dimjaca ni apëritë gjini, shi us i'j afllë zhdëpëtac, hara di nësh! 39S'u shtic kë ma s'u shtja domësu ali kasi kë tu ci sati us vinia furru, nu us o-llësa tas i'j fura kasa. 40S'hjic etëm, kë nu u shtic kë kënd us jinë Hjiju a Omu.”

41Pjetru i'j xësi: “Domne, aistë meselei u spunj ti noj ama ti tuc?” 42Astumsëna Jezus i'j xësi: “Kaj esti acell ysmeqar mintimen, shi ku besë, ci domësu a lluj ôri bëgatë pisti tuc ysmeqarjë allanc tas ll'u da ti mëkari tu satja ci lipseshti? 43Hara di acell ysmeqar ci kënd us jinë domësu us u afllë ashë pi lluk. 44Shi darihënja us v'i xëk, kë a shtëlluj yzmeqarru us j'u pistusjastë tutë avera a lluj. 45Ma kë aist ysmeqar mindueshti:

‘Domnu a njell ma s'ja mënë ti vineri’, shi ahurhjeshti s'batë ysmeqarjë allanc, mujer shi burbac, s'mëkë, s'bja shi si mbjatë, 46astumsëna domësu a shtëlluj ysmeqarru us jinë xua ci ell nu o-shtjaptë shi tu satja ci ell nu u shti, us'u tajë pi disa sh us'o-minë ako ju s'bagë acej ci nu pistusest. 47Acell ysmeqar ci u shti kë ci vra domësu a lluj, ma nu esti etëm s'fakë aca ci vra domësu, us'i batë mullt. 48Ma acell ci nu u shtja, shi feci steps greu, us'i batë ma pucën. Acelluj ci j'esti datë ma mullt, us i'j s'i kaftë ma mullt. Acelluj ci j'esti pistusitë mullt, us i'j s'i kaftë shi ma mullt.”

Jezus esti sebepi di përcari

49“Mini vinj tas aduk foku tu aistë dunei, sh kit mullt voj tas s'ja prindë! 50Am unë pëtëxari ci mezi o-shtjept tas mi pëtex. 51Naka vëhj minduic ci vinj tas aduk irini tu aistë dunei? Nu us aduk irini ma përcari. 52Di tora shi nëpoj ma kë tu unë kasë us hjibë cinci ish, us'i parcë tre kondra doj, sh doj kondra tre. 53Us'i parcë përintili di hjijësa shi hjiju di përintili, mësa di hjijësa shi hjija di mësa, sokra di mvjastë shi mvjasta di sokrë”.

Semnuli a qërollu

54Dapoja ll'u xësi ali mileti:

“Kënd vëdec norru ci s'i skôllë këtu skapërë sôrrë, voj di-unôrë xëcec kë us kadë plloji, shi ashë s'faci. 55Kënd vëdec ci sufllë vimtu di jugë, voj xëcec ci us fakë mulltë këllduri, shi ashë s'faci. 56Munafic! Aceli ci s'fak tu dunei shi tu cerl voj, shtic tas l'i aduqic, ma kum nu shtic tas aduqic qërollu ci noj ma bënëm?”

Afllu zborru ku nivrutu a tëll

57Këce nu mintuic ishish kaj esti ndreptjaca? 58Ma kë esht nqësit kala ti lla dhiqigoru dadun ku nivrutu a tëll, çukutjati tas t'i jaj di hëbari ku nës di kala, ci kënd s'nex lla dhiqigoru, ell s'nu t'i parada lla xhandarru shi ell s'ti hjigë tu hapsani. 59Mini us'ic xëk kë nu us esh di ako ni pulltitë pën di unë.

Currently Selected:

Luka 12: ARUM

Highlight

Copy