MAT 4
4
Ibulusa ka Isa kɔrɔbɔ
1Wo kɔ rɔ, Nii Sɛniman ka Isa ɲɛmira ka wa a ri wula kɔndɔ a kɔrɔbɔ kanma Ibulusa bolo. 2Isa ka tele binaani ni su binaani kɛ, a ye sun donna. Wo banni kɔ, kɔnkɔ ka a mira. 3Majuuwalila ka a madon a la, ka a fɔ a yɛ ko: «Ni ile le ye Alla Dencɛ ri, i ye a fɔ kabakurun woilu yɛ ko ii ye yɛlɛman ka kɛ buru ri.» 4Kɔni Isa ka a jabi: «A sɛbɛni Alla la kitabu kɔndɔ ko:
‹Mɔɔ tɛ se balola buru gbansan na.
Ɛɛn, mɔɔ mako ye Alla la kumailu fanan na ka balo,
kuma mɛnilu bɛɛ ye bɔla Alla da rɔ.›»#4.4 Wo sɛbɛni Sariyailu kitabu kɔndɔ suran 8 kuma diya 3
5Wo kɔ rɔ, Ibulusa ka Isa ta ka wa a ri Jerusalɛmu, ni a ye so sɛniman di. A ka a lalɔ Allabatobonba kun dɔ, 6ka a fɔ a yɛ ko: «Ni ile le ye Alla Dencɛ ri, i ye i juran ka bɔ yan, baa a sɛbɛni ko:
‹Alla ri a la mɛlɛkailu jamari i la ko rɔ.
Wo rɔ, ii ri i mira ii bolo la
sa i sen kana se kabakurun ma.›»
7Isa ka Ibulusa jabi: «A sɛbɛni fanan ko: ‹I kana i la Maari Alla kɔrɔbɔ.›»
8Wo kɔ rɔ, Setana wara a ri koyinkɛ jan ba do kan, ka dunuɲa mansaya bɛɛ yiraka a la, a ni ii la gbiliya. 9A ka a fɔ Isa yɛ ko: «Ni i sɔnda ka i ɲɔnkin n kɔrɔ ka n bato, n di woilu bɛɛ di i ma.» 10Isa ka a fɔ a yɛ ko: «I ye bɔ n kɔ Setana, baa a sɛbɛni ko: ‹I ye i la Maari Alla le bato ka baara kɛ ale kelen pe yɛ.›»
11Wo rɔ, Ibulusa bɔra a fɛ ka wa. Mɛlɛkailu nara ka Isa makoilu ɲa.
Isa ka kawandili kɛ Kalile mara rɔ
12Isa ka a mɛn tuma mɛn na ko Yaya ra mira ka a bila kaso la, a ka a kɔsɛ ka wa Kalile mara rɔ. 13Kɔni a ma a sii Nasarɛti so kɔndɔ. A wara Kapɛrinahumu so le kɔndɔ ka a sii ye. So wo ye Kalile dalaba dala, Sabulɔn mara ni Nafitali mara rɔ. 14Wo kɛra sa Alla la kuma ri kanbali, a ka mɛn don a la Nabi Esayi da rɔ ko:
15«Sabulɔn mara ni Nafitali mara,
mɛnilu ye Kalile dalaba fan fɛ
Juridɛn Ba telebe rɔ,
Kalile mara kɔnin, siya gbɛrɛ mɔɔ siini yɔrɔ mɛn.
16Mɔɔ mɛnilu siini tɛrɛ dibi rɔ ye,
woilu ka kɛnɛ ba do yen.
Mɛnilu siini tɛrɛ saya dibi rɔ,
kɛnɛya bɔra woilu ma.»#4.16 Wo sɛbɛni Esayi la kitabu kɔndɔ suran 9 kuma diya 1-2
17Awa, kɛbi waati wo la, Isa ka kawandili damira ka a fɔ ko: «Ai ye tubi, baa Harijeene Mansaya ra se.»
Isa ka mɔɔ doilu kili
18Lon do rɔ, Isa tɛrɛ ye taamana Kalile Dala dafɛ. A ka nakelenɲɔɔma fila yen. Woilu ye Simɔn di (a ye fɔla mɛn ma ko Piyɛri) a ni Andere. Woilu tɛrɛ ye jɔɔ filila ji rɔ, baa ii ye jɛɛmiralailu le ri. 19Isa ka a fɔ ii yɛ ko: «Ai ye na ai bila n kɔ. Ai ye jɛɛ ɲininna, kɔni n di ai karan mɔɔilu ɲininna.» 20Ii ka ii la jɔɔilu to ye i kɔrɔ ka ii bila Isa kɔ.
21Isa taminni yɔrɔ wo la dɔɔni, A ka badenma fila yen mɛn ye na ni fa la. Woilu tɛrɛ ye Sebede dencɛ Yakuba a ni Yuhana ri. Ii ni ii fa siini tɛrɛ ye ii la jɔɔilu rabɛnna kulun kɔndɔ. Isa ka Yakuba ni Yuhana kili. 22Ii ka ii bila Isa kɔ i kɔrɔ, ka ii fa ni kulun to ii kɔ.
Isa tɔɔ bɔra Kalile mara rɔ
23Isa tɛrɛ ye Kalile mara fan bɛɛ rataamala. A tɛrɛ ye mɔɔilu karanna ii la salibonilu la, ka Harijeene Mansaya kibaro ɲuma lase, ka mɔɔilu lakɛndɛya ka ii bɔ ii la jankarɔ rɔ a ni ka ii lakɛndɛya ka ii bɔ ii la fɛɛmaya bɛɛ rɔ. 24Isa tɔɔ bɔra Siri jamana yɔrɔ bɛɛ rɔ. Mɔɔilu tɛrɛ ye nala jankarɔtoilu bɛɛ ri a ma. Jankarɔ su siyaman tɛrɛ ye woilu kan. Mɛnilu tɔrɔni kojuuya farikɔrɔ dimin na, ii nara woilu ri, a ni jinatɔilu ni kirikirimasatɔilu ni kɔrɔngbɔilu. A ka woilu bɛɛ lakɛndɛya. 25Mɔɔ siyaman ba bilani tɛrɛ a kɔ. Ii bɔni tɛrɛ Kalile mara rɔ, a ni Dekapɔli mara ni Jerusalɛmu so ni Jude mara ni Juridɛn Ba kɔfɛla.
Currently Selected:
MAT 4: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
