MAT 28
28
Isa wulira
1Ɲɔɲɔ lon taminni kɔ, Lahadi lon sɔɔma da la jona, Mariyamu Makidalaka ni a tɔɔma Mariyamu wara kaburu ragbɛ diya. 2I kɔrɔ duukolo yɛrɛyɛrɛra fanka la, baa Maari la mɛlɛka do bɔra sankolo rɔ, ka na kabakurun bɔ kaburu da la, ka a sii kabakurun wo kan. 3A ye mɛlɛnmɛlɛnna ikomin sanfɛrɛn. A la duruki gbɛni pepe. 4Mɔɔ mɛnilu tɛrɛ ye kaburu lakɔrɔsila, woilu silanda mɛlɛka yɛ kojuuya fɔɔ ka be duu ma ka kɛ ikomin mɔɔ saniilu.
5Mɛlɛka ka a fɔ musoilu yɛ ko: «Ai kana silan. N ka a lɔn ko ai ye Isa le ɲininna, mɛn gbɔngbɔnni tɛrɛ jiri kan. 6A tɛ yan, baa a ra wuli ikomin a ka a fɔ ɲa mɛn ma. A su lani tɛrɛ yɔrɔ mɛn dɔ, ai ye na wo ragbɛ. 7Wo kɔ rɔ, ai borimantɔ ye wa a fɔ a la karandenilu yɛ ko a ra wuli ka bɔ saya rɔ. Ko a watɔ ai makɔnɔla Kalile, ai ri a yen ye. A ragbɛ. N nani mɛn fɔ kanma ai yɛ, wo le wo ri.»
8Musoilu ka ii kaliya ka bɔ kaburu da la ka wa. Ii silanni, kɔni sɛwa ba tɛrɛ ye ii la. Ii borimantɔ wara ka kibaro wo bɛɛ fɔ karandenilu yɛ. 9Ii watɔla, Isa barara bɔla ii ɲɛfɛ ka ii labɛn. A ka a fɔ ko: «N ye ai fola.» Ii ka ii madon a la, ka a sen mira ka a bato. 10Isa ka a fɔ ii yɛ ko: «Ai kana silan. Ai ye wa a fɔ n badenmailu yɛ ko ii ye wa Kalile. Ko ii ri n yen ye.»
Kaburu la kɔrɔsibailu ka dantɛɛli mɛn kɛ
11Ka musoilu to sila kan ka wa, kaburu kɔrɔsiba doilu wulira ka wa so kɔndɔ. Ko mɛnilu kɛni, ii wara wo bɛɛ fɔ sarakalasela kuntiilu yɛ. 12Sarakalasela kuntiilu ni mɔɔbakɔrɔilu wara i ɲɔɔn yen ka kuma wo ko rɔ. Ii ban mɛn kɛni kumala, ii ka wodi siyaman di kɛlɛdenilu ma, 13ka a fɔ ii yɛ ko: «Ai ye a fɔ mɔɔilu yɛ ko: ‹Ka an to sunɔɔ rɔ su rɔ, Isa la karandenilu nara ka a su ta ka wa a ri.› 14Ni ko ɲin fɔra mara kunnasiila yɛ, an di kuma a yɛ, ka wo kunko bɔ ai ma.» 15Kɛlɛdenilu ka wodi mira. A fɔra ii yɛ ɲa mɛn ma, ii wara wo kɛ. Wo rɔ, tariku wo ye fɔla Yahudiyailu tɛma hali bi.
Isa kumara karandenilu yɛ
16Awa, karanden tan ni kelen wara Kalile. Isa ka koyinkɛ mɛn ko fɔ ii yɛ, ii wara ye. 17Ii ka Isa yen ye tuma mɛn na, ii ka a bato, kɔni doilu sikara. 18Isa ka a madon ii la, ka a fɔ ii yɛ ko: «Se ra di n ma fen bɛɛ kan Harijeene rɔ, a ni duukolo kan. 19Wo le rɔ, ai ye wa mɔɔilu kɛ n na karandenilu ri siyailu bɛɛ tɛma. Ai ye ii sun ji rɔ Fa Alla tɔɔ ni Dencɛ tɔɔ ni Nii Sɛniman tɔɔ rɔ. 20N ka jamarili fen fen di ai ma, ai ye ii karan woilu la, sa ii ri woilu labato. Ai ɲa lɔ! N ye ai dafɛ tuma bɛɛ, fɔɔ ka wa se dunuɲa laban ma.»
Currently Selected:
MAT 28: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
