MAT 22
22
Kɔɲɔ dɔɔnninba kuma kɔrɔlama
1Nba, Isa ka kuma kɔrɔlama dogbɛrɛilu fɔ ii yɛ ikɔ tuun. A ka a fɔ ko: 2«Harijeene Mansaya ye ikomin mansacɛ, mɛn ka dɔɔnninba rabɛn a dencɛ la kɔɲɔ ko rɔ. 3Mansacɛ tun ka dɔɔnnin ko fɔ mɔɔ mɛnilu yɛ, a ka a la jɔncɛilu lɔ woilu kilila dɔɔnnin diya. Kɔni mɔɔ woilu tun tɛ a fɛ ka na. 4Mansacɛ ka jɔn gbɛrɛilu lawa ikɔ tuun. A ka a fɔ ko: ‹Ai ye a fɔ mɔɔ kilini woilu yɛ ko «n da dɔɔnninba rabɛn. Ko torailu ra faa, a ni nisi tɔlɔninilu. Ko a bɛɛ ra mɔ. Ko ai ye na dɔɔnnin diya.»› 5Kɔni mɔɔ mɛnilu kilini, woilu si ma mansa la kilikan jate. Do bɔra ka wa a la sɛnɛ rɔ. Do bɔra ka wa a la julaya kɛ diya. 6Tɔilu ka mansacɛ la jɔnilu mira, ka ii tɔrɔ kosɛbɛ, ka ii faa.
7«Mansacɛ mɔnɛra wo rɔ. A ka a la kɛlɛdenilu lawa mɔɔfaala woilu kanma. Kɛlɛdenilu ka ii bɛɛ faa, ka ii la so janin. 8Mansacɛ ka a fɔ a la jɔnilu yɛ ko: ‹Kɔɲɔ dɔɔnninba ra rabɛn. Kɔni mɛnilu kilini tɛrɛ, woilu si tɛrɛ ma daha wo ye ii kili. 9Wo le rɔ, ai ye wa sila ba fara diyailu la. Ai wa mɔɔ mɔɔ tɛrɛn ye, ai ye ii bɛɛ kili ko ii ye na kɔɲɔ dɔɔnnin diya.› 10Jɔnilu wulira ka wa sila dailu la. Ii ka mɔɔ mɛnilu tɛrɛn ye, ii ka woilu bɛɛ kili dɔɔnnin diya, mɔɔ juuilu ni mɔɔ ɲumailu bɛɛ. Wo rɔ, kɔɲɔ dɔɔnninba tɛrɛ ye bon mɛn kɔndɔ, wo fara mɔɔ kiliniilu la.
11«Mansacɛ donda bon kɔndɔ ko a ri a ɲa la mɔɔ kiliniilu kan. A ka cɛɛ do yen ye, kɔɲɔmalɔ faanin tɛ mɛn kan na. 12Mansacɛ ka a fɔ cɛɛ wo yɛ ko: ‹N duɲɔɔncɛ, a ye di? Kɔɲɔmalɔ faanin tɛ i kan na. I donda bon na yan wo rɔ di?› Cɛɛ ma foyi sɔrɔn ka a fɔ. 13Mansacɛ ka a fɔ baaradenilu yɛ ko: ‹Ai ye a senilu ni a boloilu sidi ka a lafili dibi rɔ kɔkan, yɔrɔ mɛn mɔɔilu ri kasi ka a ɲin macin.›» 14Isa ka kuma do la wo kan ko: «Mɔɔ siyaman kilini, kɔni mɛnilu suwandini, woilu ma siya.»
Niisankɔ bɔ ko
15Wo kɔ rɔ, Farisilu bɔra ye ka wa i ɲɔɔn yen ka ɲa ɲinin Isa la ko ma. Ii ye a fɛ a ye kuma do fɔ, mɛn di kɛ a mira sababu ri. 16Ii ka ii la karanden doilu ni mansa Herodi kɔmɔɔ doilu lawa Isa ma. Woilu wara a fɔ Isa yɛ ko: «Karanmɔɔ, an ka a lɔn ko i ye tuɲa fɔla. Mɔɔilu ka kan ka Alla la sila taama ɲa mɛn, i ye ii karanna wo la tuɲa jɛrɛ jɛrɛ rɔ. I tɛ silanna mɔɔ si yɛ, i tɛ mɔɔ bɔla mɔɔ rɔ fanan. 17A ye di wo rɔ? Ka niisankɔ bɔ ka a di Rɔmu mansa Sesari ma, wo bɛnni an ma wa, wa wo bɛnni tɛ? I ye i la miriya fɔ an yɛ.»
18Kɔni Isa ka ii la miriyajuu lɔn. Wo rɔ, a ka a fɔ ii yɛ ko: «Ai jɛrɛmayuwailu, nfenna ai ye n kɔrɔbɔla? 19Ai ye niisankɔ sarala wodi gbanan mɛn na, ai ye wo do yiraka n na, n ye a ragbɛ.» Ii ka gbanan wo kelen di a ma. 20A ka ii maɲininka ko: «Yon munuɲa ni yon tɔɔ ye gbanan ɲin kan?» 21Ii ka a fɔ ko: «Rɔmu mansa Sesari.» Isa ka a fɔ ko: «Nba, ai ye mansa Sesari la fen di mansa Sesari ma. Ai ye Alla fanan ta di Alla ma.» 22Isa la jabili ka ii kabannakoya. Ii bɔra a fɛ ka wa.
Sadusiilu ka ɲininkali kɛ Isa kun
23Wo lon kelen, Sadusiilu nara Isa tɛrɛn. Sadusiilu ye a fɔla ko mɔɔ si tɛ wulila ka bɔ saya rɔ. Awa, wo doilu nara ka Isa maɲininka ko: 24«Karanmɔɔ, Nabi Musa ka a fɔ ko ni i kɔrɔcɛ sara ka a muso densɔrɔnbali to ye, i ye muso wo ta sa a ri den sɔrɔn i kɔrɔcɛ yɛ. 25Awa, cɛɛ wɔrɔnwula tɛrɛ ye an wara rɔ yan, mɛnilu tɛrɛ ye cɛɛ kelen denilu ri. Kɔrɔmamɔɔ ka muso do furu. A sara ka a muso densɔrɔnbali to a kɔ. A dɔɔcɛ ka muso wo ta. 26Kɔni wo fanan sara, ka muso densɔrɔnbali to a kɔ. A kɛra wo ɲa le fɔɔ muso wo siira cɛɛ wɔrɔnwula woilu bɛɛ kun, kɔni a ma den sɔrɔn. 27Cɛɛ woilu bɛɛ sani kɔ, muso fanan sara. 28A ye di? Su lawuli lon, muso ri kɛ yon ta ri cɛɛ wɔrɔnwula woilu tɛma? Baa a siira ii kelen kelen na bɛɛ kun.»
29Isa ka ii jabi: «Ai filini, baa ai ma Alla la kitabu kɔrɔ famun. Ai ma foyi lɔn Alla la sebaya ko rɔ fanan! 30Baa suilu wa wuli saya kɔ, cɛɛ tɛna muso furula, muso fanan tɛna siila cɛɛ kun. Ii bɛɛ ri kɛ ikomin sankolo rɔ mɛlɛkailu. 31Su lawuli ko fan fɛ, Alla ka mɛn fɔ ai yɛ a la kitabu kɔndɔ, ai ra wo karan, ko di? 32A ka a fɔ ko: ‹N ye Iburahima Maari le ri, a ni Isiyaka ta, a ni Yakuba ta.› A tɛ suilu Maari ri. Ɛɛn de! A ye mɔɔ ɲenemailu Maari le ri.»
33Jama ka kuma wo mɛn tuma mɛn na, ii kabannakoyara a la karan ma.
Sariya mɛn gbɛlɛman tɔilu ri
34Farisilu ka a mɛn tuma mɛn na ko Isa ka Sadusiilu da bɔ a rɔ, woilu ka ii ladɛn ka wa Isa tɛrɛn. 35Sariya karanmɔɔ do tɛrɛ ye ii rɔ. Wo ka ɲininkali kɛ Isa kun a kɔrɔbɔ kanma. A ka a fɔ ko: 36«Karanmɔɔ, sariya ɲuman gbɛlɛman sariya tɔilu bɛɛ di?» 37Isa ka a fɔ a yɛ ko: «‹I ye i la Maari Alla kanin i jusukun bɛɛ la, a ni i sɔlɔmɛ bɛɛ la, a ni i miriya bɛɛ la.› 38Wo ye sariya fɔlɔ le ri, mɛn gbɛlɛman sariya tɔilu bɛɛ ri. 39Sariya mɛn tuunni wo la, wo fanan gbɛlɛman ikomin fɔlɔmanta. Ale le ɲin. ‹I ye i mɔɔɲɔɔ kanin ikomin i jɛrɛ.› 40Sariya bɛɛ ni nabiilu la karan bɛɛ sidini sariya fila wo le la.»
Ɲenematɔmɔnin ye mansa Dawuda la maari ri
41Ka Farisilu ladɛnnin to, Isa ka ɲininkali kɛ ii kun. 42A ka a fɔ ko: «A ye di? Ai ye ai mirila di Ɲenematɔmɔnin na ko rɔ? Yon dencɛ le a ri?» Ii ka Isa jabi: «Mansa Dawuda dencɛ le.» 43Isa ka a fɔ ii yɛ ko: «Kɔni Nii Sɛniman ka a kɛ, Dawuda jɛrɛ ka a fɔ Ɲenematɔmɔnin ma ko Maari. Wo kɛra di? Baa Dawuda ka a fɔ ko:
44‹Maari Alla ka a fɔ n na Maari yɛ ko:
«Na i sii n bolokinin fɛ,
haan n wa ban i juuilu bilala i sen kɔrɔ.»›
45«Awa, ni Dawuda jɛrɛ ye a fɔla a ma ko Maari ten, a don di se kɛla a dencɛ ri di?» 46Mɔɔ si ma se ka Isa jabi. Ka a ta wo lon ma, mɔɔ si ma sɔn ka ɲininkali kɛ a kun butun.
Currently Selected:
MAT 22: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
