MAT 2
2
Lɔnninnailu ka Isa yɔrɔ ɲinin
1Isa sɔrɔnda Bɛtilɛhɛmu so kɔndɔ, ni a ye Jude mara rɔ. Wo tuma, mansa Herodi siini mansaya la. Isa sɔrɔnni kɔ, lɔnninna doilu bɔra telebɔ rɔ ka na Jerusalɛmu. 2Ii ka a maɲininka ko: «Yahudiyailu la mansa mɛn sɔrɔnda sisen, wo ye mi? Ka an to an wara telebɔ rɔ, an ka a lolo yen. An da na a bonya diya.» 3Kuma wo fɔra mansa Herodi yɛ tuma mɛn na, a kɔndafilira, a ni Jerusalɛmukailu bɛɛ. 4Mansa ka Isirayɛlikailu la sarakalaselailu bɛɛ ni sariya karanmɔɔilu bɛɛ ladɛn, ka ii maɲininka ko, «Ɲenematɔmɔnin ka kan ka sɔrɔn mi?» 5Ii ka a fɔ ko: «A ka kan ka sɔrɔn Bɛtilɛhɛmu le, ni a ye Jude mara rɔ, baa nabi do ka a sɛbɛ ko:
6‹Ile Bɛtilɛhɛmu, ile mɛn ye Jude mara rɔ,
i tɛ Jude mara soilu rɔ dɔɔmanni ri de!
Baa kuntii do ri bɔ i kɔndɔ,
mɛn di a janto n na jama Isirayɛlikailu#2.6 Wo sɛbɛni Mika la kitabu kɔndɔ suran 5 kuma diya 2 rɔ.›»
7Wo kɔ rɔ, Herodi ka lɔnninna woilu kili dokon dɔ ka ii maɲininka lolo bɔ waati ma. Ii tun ka a yen waati mɛn, ii ka wo fɔ a yɛ. 8Wo rɔ, a ka sila di ii ma ko ii ye wa Bɛtilɛhɛmu. A ka a fɔ ko: «Ai ye wa den yɔrɔ ɲinin koɲuma ye. Ai wa a yen, ai ye kela lawa n yɛ, sa n fanan di wa a bonya.» 9Herodi ka kuma wo fɔ ka ban tuma mɛn na, lɔnninnailu bɔra ye ka wa. Ka ii to sila kan, ii ka lolo kelen wo yen ii ɲɛfɛ, ii tun ka mɛn yen ii wara telebɔ rɔ. Den tɛrɛ ye yɔrɔ mɛn dɔ, lolo wo wara a lɔ yɔrɔ wo kun dɔ. 10Lɔnninnailu ka lolo yen tuma mɛn na, ii jusu sɛwara kosɛbɛ. 11Ii don mɛn kɛra bon na, ii ka den ni a na Mariyamu yen ye. Ii ka ii ɲɔnkin ka den bonya. Wo kɔ rɔ, ii ka ii la kankirailu da laka ka sɔlifen sankɔgbɛlɛnilu labɔ ka woilu di den ma. Ii ka sanin di a ma, a ni wusulan ni latikɔlɔn sumaduman mɛn tɔɔ ko muri. 12Wo kɔ rɔ, Alla ka a lasobi lɔnninnailu la sibo rɔ ko ii kana kɔsɛ Herodi wara butun. Wo rɔ, ii ka sila gbɛrɛ ta ka wa ii la jamana rɔ.
Yusufu ka Mariyamu ni Isa ta ka wa Misiran
13Nba, lɔnninnailu wani kɔ, Maari la mɛlɛka do ka a jɛrɛ yiraka Yusufu la sibo rɔ, ka a fɔ a yɛ ko: «I wuli ka den ni a na ta ka i bori ka wa Misiran jamana rɔ. I ye to ye fɔɔ n wa a fɔ i yɛ lon mɛn ko i ye na, baa Herodi kɛtɔ den yɔrɔ ɲininna a faa ko rɔ.» 14Wo rɔ, Yusufu wulira su rɔ, ka den ni a na ta ka wa Misiran. 15A tora Misiran fɔɔ ka Herodi sa. Wo kɛra ka Maari la kuma kanbali, a tun ka mɛn don a la nabi da rɔ ko: «N ka n dencɛ kili ko a ye bɔ Misiran.»#2.15 Wo sɛbɛni Hose la kitabu kɔndɔ suran 11 kuma diya 1
16Nba, Herodi ka a ɲayen tuma mɛn na ko lɔnninnailu ra a majuwaya, a jusu bɔra kojuuya. A ka mɔɔilu lawa Bɛtilɛhɛmu so kɔndɔ, a ni a mara yɔrɔ bɛɛ rɔ. Ko den cɛman mɛnilu si ma tamin san fila kan fɔlɔ, ii ye woilu bɛɛ faa. Herodi danda san fila dencɛilu ma ka a bɛn lɔnninnailu la lolo yen waati ma, ii tun ka mɛn fɔ a yɛ. 17Wo rɔ, Nabi Jeremiya tun ka mɛn fɔ, wo kanbalira ko:
18«Kan do bɔra Rama so kɔndɔ,
kasi mankan ba a ni jusumakasa mankan ba.
Rasɛli ye kasila a denilu la ko la.
A ma sɔn mɔɔ si ye a masabari, baa a denilu tɛ ye butun.»#2.18 Wo sɛbɛni Jeremiya la kitabu kɔndɔ suran 31 kuma diya 15
Yusufu bɔra Misiran ka a kɔsɛ Isirayɛlikailu la jamana rɔ
19Herodi sani kɔrɔ, Maari la mɛlɛka do ka a jɛrɛ yiraka Yusufu la sibo rɔ Misiran. 20Mɛlɛka ka a fɔ a yɛ ko: «I wuli ka den ni a na ta. Ai ye i kɔsɛ Isirayɛlikailu la jamana rɔ, baa mɔɔ mɛnilu tɛrɛ ye a ɲininna ka den faa, woilu ra sa.» 21Yusufu wulira wo le rɔ, ka den ni a na ta ka wa Isirayɛlikailu la jamana rɔ. 22Kɔni Yusufu ka a mɛn ko Arikilayosi le siini mansaya la Jude mara kun na a fa Herodi nɔ rɔ. Wo rɔ, a silanda ka wa Jude mara rɔ. Alla ka a lasobi sibo rɔ ko a ye wa Kalile mara rɔ. 23A wara a sii Nasarɛti so kɔndɔ. Wo kɛni sa Alla la kuma ri kanbali, a ka mɛn don a la nabiilu da rɔ ko mɔɔilu ri a fɔ Isa ma ko Nasarɛtika.
Currently Selected:
MAT 2: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
