MAT 11
11
Yaya ka a la karandenilu kelaya Isa ma
1Nba, Isa banda lalilikan woilu fɔla a la karanden tan ni fila yɛ tuma mɛn na, a bɔra ye ka wa Yahudiya la soilu kɔndɔ ka mɔɔilu karan, ka ii kawandi.
2Awa, ka Yaya to kaso la, Ɲenematɔmɔnin na kɛwaliilu fɔra a ɲana. Wo rɔ, a ka a la karanden doilu kelaya Isa ma. 3Ii wara Isa maɲininka ko: «Alla kɛtɔ mɔɔ mɛn nanala, wo ye ile le ri wa, wa an ye mɔɔ gbɛrɛ makɔnɔ?» 4Isa ka ii jabi: «Ai ye mɛnilu mɛnna, a ni ai ye mɛnilu yenna, ai ye wa woilu fɔ Yaya yɛ. 5Ko ɲa fuyenilu ɲa ra laka, nambarailu ra taama koɲuma, kunatɔilu ra kɛndɛya, tologbedenilu tolo ra laka, suilu ra wuli ka bɔ saya rɔ, kibaro ɲuma ra lase bolokolonilu ma. 6Sɛwa ye wo tii yɛ mɛn tɛ bilala fili rɔ n na ko rɔ!»
Isa ka Yaya ko fɔ mɔɔilu yɛ
7Yaya la keladenilu watɔla, Isa kumara jama yɛ Yaya la ko rɔ. A ka a fɔ ko: «Ai wara nfen dagbɛ diya wula kɔndɔ? Ai ka bin gbansan de ragbɛ wa, fɔɲɔ ye mɛn namaala? Wo kuma tɛ! 8Ai wara nfen dagbɛ diya wo rɔ? Faanin dagbɛlɛn tii wa? Wo kuma tɛ. Mɛnilu ye faanin dagbɛlɛn donna, woilu ye sɔrɔnna mansabolon kɔndɔ. 9Ai wara nfen dagbɛ diya? Ii ma wa nabi do ragbɛ wa? N di a fɔ ai yɛ ko nabi le tɛrɛ. Kɔni ale ka bon nabi ri paaɔn! 10A la ko sɛbɛni Alla la kitabu kɔndɔ ko:
‹A ragbɛ, n di n na keladen nawa i ɲɛrɔ.
Wo ri i la sila rabɛn i yɛ.› #11.10 Maliki suran 3 kuma diya 1
11«N di tuɲa fɔ ai yɛ: muso si ma den sɔrɔn fɔlɔ mɛn ka bon Yaya ri. Wo bɛɛ ni a ta, mɛn ka doo a tɔ bɛɛ ri Harijeene Mansaya rɔ, wo tii ka bon Yaya ri. 12Ka bɔ Yaya la kawandili kɛ waati ma haan ka na se bi ma, mɔɔilu ye Harijeene Mansaya kɛlɛla fanka la. Mɔɔ fadinmailu ye a ɲininna ka a mira, 13baa sani Yaya ye nala, nabiilu bɛɛ ni Musa la sariya ka Harijeene Mansaya ko fɔ. 14Ni ai sɔnda ka la a la, Nabi Eli tɔɔ mɛn ko fɔra ko a ri na ikɔ, Yaya le wo ri. 15Tolo ye mɛn ma, wo tii ye a tolo malɔ kuma wo la.
16«N ye bi mɔɔilu lala nfen ma? Ii bɔni denninilu la, mɛnilu siini lɔfɛ rɔ. Ii ye a fɔla ii duɲɔɔnilu yɛ ko:
17‹A ragbɛ. An ka fule fɔ ai yɛ,
kɔni ai ma sɔn ka dɔn kɛ.
An ka saya donkili la ai yɛ,
kɔni ai ma kasi.›
18«Baa Yaya nara, a ma dɔɔnnin kɛ, a ma minnin kɛ. Wo rɔ, mɔɔilu ka a fɔ ko jinatɔ le a ri. 19Mɔɔ Dencɛ fanan nara. A ye dɔɔnnin kɛla, a ye minnin kɛla. Wo rɔ, ai ka a fɔ ko wo ye noma ni dolominna le ri. Ko a ka a duɲɔɔnilu kɛ niisankɔmiralailu ni kojuukɛlailu le ri. Kɔni famunyali ri jo sɔrɔn a kɛwaliilu fɛ.»
Isa ka so doilu jalaki
20Wo kɔ rɔ, Isa tun ka kabannako siyaman kɛ so mɛnilu kɔndɔ, a wulira wo mɔɔilu jalakila, baa ii tun ma tubi. 21Isa ka a fɔ ikɔ ko: «Korasɛnkailu, gbalo ye ai yɛ. Bɛtisayidakailu, gbalo ye ai fanan yɛ. Kabannako ba mɛnilu kɛra ai rɔ, ni woilu tun kɛra Tiri so kɔndɔ, wala Sidɔn so kɔndɔ, ye mɔɔilu tun di kojuu kɛ boloka kɛbi waati jan. Ii tun di buurigbɛ kɛ ii kun dɔ, ka kasanbɔrɔ faanin bila ii kan na, ii la tubi tɔɔmasere ri. 22Wo le kosɔn, n di a fɔ ai yɛ ko kiti lon wa se, ai la kiti ri gbɛlɛya ka tamin Tirikailu ni Sidɔnkailu ta kan. 23Kapɛrinahumukailu, ai don? Ai ri bonya haan ka se sankolo rɔ wa? Wo kuma tɛ! Ai ri jii fɔɔ ka se jahanama kɔndɔ! Baa kabannako mɛnilu kɛra ai tɛma, ni woilu tun kɛra Sɔdɔmu so kɔndɔ, Sɔdɔmu so tun di tɛrɛn ye haan bi. 24Wo le kosɔn, n di a fɔ ai yɛ ko kiti lon wa se, ai la kiti ri gbɛlɛya ka tamin Sɔdɔmukailu ta kan.»
Isa ka baraka bila a Fa Alla yɛ
25Wo tuma, Isa ka a fɔ ko: «N Fa Alla, sankolo ni duukolo Maari, n ye baraka bilala i yɛ, i ka lɔnnin yiraka denninilu la, i ka wo doon mɔɔ famunyanilu ni hankilimailu ma. 26Ɔɔn, n Fa. A diyara i yɛ ka wo kɛ.
27«N Fa Alla ra fen bɛɛ karifa n na a la ko rɔ. Mɔɔ si ma Fa Alla Dencɛ lɔn bɛrɛbɛrɛ kɛ fɔɔ Fa Alla. Mɔɔ si fanan ma Fa Alla lɔn bɛrɛbɛrɛ kɛ fɔɔ a Dencɛ. Dencɛ wo wa a Fa yiraka mɛnilu la, woilu fanan di se a lɔnna.
28«Ai mɛnilu sɛɛni ai la donin ba kɔrɔ, ai ye na n ma. N di lafɔɲɔ di ai ma. 29Ai ye n na donin ta gbeleke#11.29 Donin ta gbeleke ɲin kɔrɔ le ko mɔɔilu ka kan ka Isa la dunuɲa ratɛɛ ɲa ta. Wo tɛ mɔɔilu kɛ jɔn di, kɔni a ye ii lahɔrɔyala ii julumun jɔnya le ma. ta, ka n na karan mira, nde n jɛrɛ majiini, ai ri niilafɔɲɔ sɔrɔn. 30Ka a masɔrɔn, n na donin ta gbeleke tɛ gbiliya, n na donin de fɛya.»
Currently Selected:
MAT 11: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
