YOS 23
23
Josuwe ka jama lali
1Awa, Allabatala ka hɛrɛ di Isirayɛlikailu ma waati jan kɔrɔ, ka ii bɔ ii juuilu bolo, mɛnilu ye ii laminin dɔ. Josuwe tun da kɛ mɔɔbakɔrɔ ba ri. 2Lon do rɔ, Josuwe ka Isirayɛlikailu bɛɛ makili, a gbengben ii la mɔɔbailu ni ii la ɲɛmɔɔilu ni ii la kititɛɛlailu ni ii la kuntiilu. A ka a fɔ ii yɛ ko: «N da kɛ mɔɔbakɔrɔ ba ri. 3Ai Maari Allabatala ka ko mɛnilu kɛ jamana ɲin mɔɔilu la ai kosɔn, ai ka wo bɛɛ yen. Baa ai Maari Allabatala jɛrɛ le ka ii kɛlɛ ai yɛ. 4A ragbɛ, yɔrɔ mɛn ye bɔla Juridɛn Ba la ka wa se fɔɔ Kɔɔji ba ma telebe rɔ, n ka kalabe kɛ ka duu wo bɛɛ ratala ai la kabilailu tɛma. N ka siya mɛnilu kɛlɛ ka ii la duu mira ii la, a ni siya mɛnilu la duu ma mira ii la fɔlɔ, n ka wo bɛɛ di ai ma ka a kɛ ai ta ri. 5Ai Maari Allabatala jɛrɛ le ri mɔɔ woilu gbɛn ka ii mabɔ ai la. Ale le ri a kɛ, ii ri ii bori ai ɲɛ. Ai ri ii la jamana mira ka a kɛ ai ta ri, ikomin ai Maari Allabatala ka lahidi ta ai yɛ ɲa mɛn ma.
6«Fen fen sɛbɛni Musa la sariya kitabu rɔ, ai ye ai sɛɛbɛ don kosɛbɛ wo bɛɛ bonya ma ka wo kɛ. Ai kana bɔ sila wo kan ɲa si ma. 7Ai kana duɲɔɔnya don ai ni siya gbɛrɛilu tɛma, mɛnilu ye ai tɛma fɔlɔ. Ai kana ii maarilu tara, ai kana ai kali woilu tɔɔ la. Ai kana ai tin birin ii ɲana ka ii bato. 8Ai ye ai fasa ai Maari Allabatala ma, ikomin ai darini a kɛla ɲa mɛn ma kɔrɔman haan bi. 9Allabatala ka siya ba ni fankamailu le gbɛn ka bɔ ai ɲɛrɔ. Haan bi woilu si ma se a lɔla ai yɛ. 10Ai rɔ mɔɔ kelen di se ai juuilu mɔɔ waa kelen gbɛnna, baa ai Maari Allabatala le ye kɛlɛ kɛla ai yɛ, ikomin a ka a lahidi ta ai yɛ ɲa mɛn ma. 11Nba, ai ye ai janto ai jɛrɛ rɔ kosɛbɛ ka ai Maari Allabatala kanin.
12«Kɔni ni ai ka ai ban Alla rɔ ka kafu siyailu kan, mɛnilu kɔnin ye ai tɛma fɔlɔ, ka woilu denmusoilu furu, ka teriya don ai ni ii tɛma, 13ai ye la a la ko ai Maari Allabatala ti nala siya woilu gbɛnna ai ɲɛ butun. Siya woilu ri kɛ ikomin miralifen, mɛn di ai mira, ka kɛ ikomin denka, ai natɔ bela mɛn kɔndɔ. Ii ri kɛ ikomin gbiɲɛ, mɛn di ai gbasi ai kɔ rɔ, ka kɛ ikomin wɔnin, mɛn ye ai ɲailu rɔ. A laban na, ai ri tunun jamana ɲuma ɲin kɔndɔ, ai Maari Allabatala ka mɛn di ai ma.
14«Nba, a tɛ mɛn bakɛ n na waati ri se. Ai ka a lɔn ai jusukun ni ai sɔnɔmɛ bɛɛ rɔ ko ai Maari Allabatala ka lahidi ɲuma mɛnilu ta ai yɛ, ko wo si ma to ye, a ma mɛn dafa. A ka lahidi wo bɛɛ dafa ai yɛ. Lahidi si ma to ye, a ma mɛn dafa.
15«Kɔni a ka a la lahidi ɲuma bɛɛ dafa ɲa mɛn ma, a ri a la masilannikan bɛɛ kɛ ai la wo ɲa le ma, fɔɔ ka ai halaki jamana ɲuma ɲin kɔndɔ, a ka mɛn di ai ma. 16Ai Maari Allabatala ka teriya mɛn ta ka a don ai ni a tɛma, ni ai ka ai ban wo jamariliilu bonyala fo ka wa ai birin maari gbɛrɛilu ɲɛ ka woilu bato, Allabatala ri mɔnɛ ai kanma kosɛbɛ. Ni wo kɛra, ai ri halaki jona jamana ɲuma ɲin kɔndɔ, a ka mɛn di ai ma.»
Currently Selected:
YOS 23: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
