YOS 19
19
Simeyɔn kabila ka niiyɔrɔ mɛn sɔrɔn
1Kalabe ka niiyɔrɔ filana mɛn ta, wo kɛra Simeyɔn kabila ta le ri, bonkɔndɔla bɛɛ ni a ta. Ii la niiyɔrɔ lamininni Yahuda kabila la duu le la. 2So mɛnilu tɛrɛ ye ii la niiyɔrɔ rɔ, woilu le ɲin: Bɛri-Seba, Molada, 3Hasara-Suwali, Baala, Ɛsɛmu, 4Elitolada, Betulu, Horima, 5Sikilaka, Bɛti-Marikabɔti, Hasara-Susa, 6Bɛti-Lebabɔta, a ni Saruwɛn. Woilu bɛɛ ladɛnnin ye so ba tan ni sawa ri, a bɛɛ ni a so mɛsɛnilu.
7So mɛnilu lara woilu kan, woilu ye Ayin ni Rimɔn di, a ni Etɛra ni Asan. So ba naanin de woilu ri, a bɛɛ ni a so mɛsɛnilu. 8So mɛsɛn mɛnilu bɛɛ ye so woilu laminin dɔ, woilu fanan ye a rɔ, ka wa se fɔɔ Baalata Bɛri so ma, mɛn tɔɔ fanan ko Nɛkɛbi Ramati. Simeyɔn kabila ka niiyɔrɔ mɛn sɔrɔn, woilu le wo ri, bonkɔndɔla bɛɛ ni a ta. 9Awa, ikomin Yahuda kabila la niiyɔrɔ tun ka bon ii ma, Josuwe ka a fan do ta ka wo kɛ Simeyɔn kabila ta ri. Wo le kosɔn Simeyɔn kabila la niiyɔrɔ lamininni de Yahuda kabila la duu la.
Sabulɔn kabila ka niiyɔrɔ mɛn sɔrɔn
10Kalabe ka niiyɔrɔ sawanan mɛn ta, wo kɛra Sabulɔn kabila ta le ri, bonkɔndɔla bɛɛ ni a ta. Ii la niiyɔrɔ dan tɛrɛ ye wala fɔɔ Sarida so la. 11A ye bɔla ye ka wa telebe fan fɛ ka wa se fɔɔ Mareyali so ma, ka bɔ ye ka wa Dabɛsɛta so la, ka bɔ ye ka wa dinban ma, mɛn ye Jokineyamu so telebɔ rɔ. 12Ka bɔ Sarida so fan gbɛrɛ fɛ, dan tɛrɛ ye wala telebɔ fan fɛ ka wa se Kisilɔta Tabɔri mara ma, ka bɔ ye ka wa Dabɛrata so la, ka tamin ye ka wa fɔɔ Jafiya so la. 13A ye bɔla ye ka wa telebɔ fan fɛ, ka wa se fɔɔ Kati-Hefɛri so ni Eti Kasini so la, ka bɔ ye ka wa Rimɔn so la, ka tamin ye ka wa Neya so la. 14Dan ye taminna Neya so tele kankan bolomaran dɔ ka wa Hanatɔn so la, ka bɔ ye ka wa dan Ifita Eli dinban dɔ. 15So ba tan ni fila le tɛrɛ Sabulɔn kabila la niiyɔrɔ wo rɔ, a bɛɛ ni a so mɛsɛnilu. So tan ni fila doilu le ɲin: Katati, Nahalali, Simirɔn, Idala, a ni Bɛtilɛhɛmu.
16Sabulɔn kabila ka niiyɔrɔ mɛn sɔrɔn, a ni a so bailu ni a so mɛsɛnilu, woilu le wo ri, bonkɔndɔla bɛɛ ni a ta.
Isakari kabila ka niiyɔrɔ mɛn sɔrɔn
17Kalabe ka niiyɔrɔ naaninnan mɛn ta, wo kɛra Isakari kabila ta le ri, bonkɔndɔla bɛɛ ni a ta. 18Ii la niiyɔrɔ soilu le ɲin di: Jisirele, Kesulɔta, Sunɛmu, 19Hafarayimu, Siyɔn, Anaharati, 20Rabita, Kisiyɔn, Ebɛsi, 21Remɛta, En Kanimu, En Hada, a ni Bɛti-Pasɛsa. 22Ii la niiyɔrɔ dan de tɛrɛ sela Tabɔri koyinkɛ ma, ka bɔ ye ka wa Sahasuma so la, ka bɔ ye ka wa Bɛti-Sɛmɛsi so la, ka bɔ ye ka wa dan Juridɛn Ba la. So ba tan ni wɔɔrɔ tɛrɛ ye ii la niiyɔrɔ rɔ, a bɛɛ ni a so mɛsɛnilu. 23Isakari kabila ka niiyɔrɔ mɛn sɔrɔn, a ni a so bailu ni a so mɛsɛnilu, woilu le wo ri, bonkɔndɔla bɛɛ ni a ta.
Asɛri kabila ka niiyɔrɔ mɛn sɔrɔn
24Kalabe ka yɔrɔ loolunan mɛn ta, wo kɛra Asɛri kabila ta le ri, bonkɔndɔla bɛɛ ni a ta. 25Ii la niiyɔrɔ soilu le ɲin: Hɛlikata, Hali, Betɛn, Akisafu, 26Alamelɛka, Amadi, a ni Misala. Ii la niiyɔrɔ telebe rɔ, dan ye wala Karamɛli koyinkɛ ni Sihɔri Libinati la. 27-28A ye bɔla ye ka wa Bɛti-Dakɔn fan fɛ telebɔ rɔ, ka wa se fɔɔ Sabulɔn kabila la niiyɔrɔ dan ma, a ni Ifita Eli dinban ma. A ye bɔla ye ka wa tele kankan bolomaran fan fɛ, ka wa se Bɛti-Emɛki so ma, a ni Neyɛli so ma. A ye bɔla ye ka wa sila kolo kelen wo kan, ka tamin Kabuli so la, a ni Abidɔn so ni Rehobu so ni Hamɔn so ni Kana so, ka wa dan Sidɔn so ba da la. 29Dan ye bɔla ye ka wa Rama so, ka wa se Tiri so ma, mɛn lamininni jin na. A ye bɔla ye ka tamin Hosa so fan fɛ ka wa dan Kɔɔjiba la so doilu tɔrɔfɛ, Akisibu mara rɔ. 30Yɔrɔ wo so bɛɛ ladɛnnin kɛra so ba muwan ni fila le ri, a bɛɛ ni a so mɛsɛnilu. 31Asɛri kabila ka niiyɔrɔ mɛn sɔrɔn, a ni a so bailu ni a so mɛsɛnilu, woilu le wo ri, bonkɔndɔla bɛɛ ni a ta.
Nafitali kabila ka niiyɔrɔ mɛn sɔrɔn
32Kalabe ka niiyɔrɔ wɔɔrɔna mɛn ta, wo kɛra Nafitali kabila ta le ri, bonkɔndɔla bɛɛ ni a ta. 33Ii la niiyɔrɔ dan tɛrɛ ye bɔla Hɛlɛfu so ni jiriju ba le la, ni a ye Sananimu so da la, ka wa Adami Nekɛbu so la. A ye bɔla ye ka wa Jabuneyɛli so la, ka bɔ ye ka wa Lakumu so la, ka bɔ ye ka wa dan Juridɛn Ba la. 34Wo kɔ rɔ, dan tɛrɛ ye wala telebe fan fɛ ka tamin Asinɔti Tabɔri so la ka wa se Hukɔki so ma. Sabulɔn kabila la niiyɔrɔ tɛrɛ ye dan de ri tele kankan bolokinin dɔ. Asɛri kabila la niiyɔrɔ tɛrɛ ye dan de ri telebe rɔ. Juridɛn Ba tɛrɛ ye dan de ri telebɔ rɔ. 35Ii la niiyɔrɔ so mɛnilu lamininni jin na, woilu le ɲin: Sidimu, Sɛri, Hamati, Rakata, Kinerɛti, 36Adama, Rama, Hasɔri, 37Kedɛsi, Edereyi, En Hasori, 38Yirɔn, Mikidali Eli, Horɛmu, Bɛti-Anati, a ni Bɛti-Sɛmɛsi. Wo bɛɛ ladɛnnin kɛra so ba tan ni kɔnɔndɔ le ri, a bɛɛ ni a so mɛsɛnilu. 39Nafitali kabila ka niiyɔrɔ mɛn sɔrɔn, a ni a so bailu ni a so mɛsɛnilu, woilu le wo ri, bonkɔndɔla bɛɛ ni a ta.
Daan kabila ka niiyɔrɔ mɛn sɔrɔn
40Kalabe ka niiyɔrɔ wɔrɔnwulana mɛn ta, wo kɛra Daan kabila ta le ri, bonkɔndɔla bɛɛ ni a ta. 41Ii la niiyɔrɔ soilu le ɲin: Sora, Ɛsitahɔla, Iri Semɛsi, 42Saalabin, Ajalɔn, Jitila, 43Elɔn, Timina, Ɛkɛron, 44Eliteke, Kibetɔn, Baalata, 45Jehuda, Bene Beraka, Kati-Rimɔn, 46Jarakɔn tenkeilu, Rakɔn, a ni duu mɛn ye Jafa so laminin dɔ.
47-48Daan kabila ka niiyɔrɔ mɛn sɔrɔn, a ni a so bailu ni a so mɛsɛnilu, wo le wo ri, bonkɔndɔla bɛɛ ni a ta. Kɔni ii la duu bɔsira le ii la. Wo kɔ rɔ, ii wara Lesɛmu so kɛlɛ. Ii ka so mira ka sokɔndɔ mɔɔilu bɛɛ faa fanmuru la, ka ii sii ye. Ii ka ii benba tɔɔ la so wo la, ka a kili ko Daan.
Josuwe ka niiyɔrɔ mɛn sɔrɔn
49Nba, Isirayɛlikailu banda jamana bɛɛ ratalala tuma mɛn na, ii ka niiyɔrɔ do di Nun dencɛ Josuwe fanan ma. 50A ka so mɛn ɲinin ii fɛ, ii ka wo di a ma ikomin Allabatala ka a fɔ ɲa mɛn ma. Ii ka Timinata Sera so le di a ma, mɛn ye Efirayimu kabila la koyinkɛ ma yɔrɔ rɔ. Josuwe ka so wo lɔ kokura ka a sii ye.
51Awa, Alla la sarakalasela Elasari ni Nun dencɛ Josuwe ni Isirayɛlikailu la ɲɛmɔɔilu ka kalabe kɛ ka niiyɔrɔ do di kabila kelen kelenna bɛɛ ma. Ii ka kalabe wo kɛ Allabatala ɲakɔrɔ a la faaninbon da la Silo. Ii ka jamana bɛɛ ratalan ka ban wo ɲa le ma.
Currently Selected:
YOS 19: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
