YUH 5
5
Isa ka cɛɛ kɔrɔngbɔyanin do lakɛndɛya
1Wo kɔ rɔ, Isa wara Jerusalɛmu Yahudiya la sali lon. 2Jerusalɛmu dondiya yɔrɔ wo tɔɔ le ko Saa Donda, yɔrɔ wo tɔrɔfɛ, ji lamara diya do ye ye. Gba safa loolu fanan ye ji lamara diya tɔrɔfɛ. Heburuilu ye a kilila Beteseda. 3-4Gba wo kɔrɔ jankarɔtoilu siyaman lani ye, ɲa fuyen wo, a ni mɛnilu fari fankelen faani ma, a ni kɔrɔngbɔya jankarɔto fanan.#5.3-4 Kitabu kɔrɔman kɔndɔ kuma ɲin sɛbɛni tɛ, kɔni kitabu kura kɔndɔ a sɛbɛni ko: Jankarɔto mɛn ye gba kɔrɔ, woilu ye Alla la mɛlɛka makɔnɔla mɛn ye nala ji lamaala tuma tuma. Jankarɔto mɛn fɔlɔ ye jiila ji rɔ wo ri kɛndɛya. A wa kɛ jankarɔ su su ri. 5Cɛɛ do tɛrɛ ye ye, mɛn da san bisawa ni san sɛ kɛ jankarɔ do rɔ. 6Isa ka a lani yen. A ka a lɔn ko cɛɛ ma kɛndɛ kɛbi waati jan. A ka a maɲininka ko: «I ye a fɛ ka kɛndɛya wa?» 7A ka Isa jabi: «N maari, mɔɔ tɛ n bolo ka n najii ji rɔ ji lamaa tuma. N wa kɛ wala ji ma, do ri jii ji rɔ n ɲɛ.» 8Isa ka a jabi: «I lawuli! I ni la dɛbɛ ta ka i taama.» 9I kɔrɔkɔrɔ cɛɛ kɛndɛyara. A ka a la dɛbɛ ta ka a taama. (Ko wo kɛra Ɲɔɲɔ lon de rɔ.)
10Wo rɔ, Yahudiyailu la ɲɛmɔɔilu ka a fɔ cɛɛ yɛ ko: «Bi le Ɲɔɲɔ lon di! Ka a bɛn sariya ma, i kana i la dɛbɛ ta i bolo ten.» 11A ka ii jabi: «Mɛn ka n nakɛndɛya, a ka a fɔ n yɛ ko: ‹I la dɛbɛ ta, ka i taama.›» 12Mɔɔ woilu ka a maɲininka ko: «Cɛɛ yon ka a fɔ i yɛ ko: ‹I la dɛbɛ ta, ka i taama?›» 13Kɔni cɛɛ mɛn nakɛndɛyara, wo ma a lakɛndɛyaba tɔɔ lɔn. Isa tun da tunun a ma ye, baa jama tɛrɛ ka siya.
14Kɔ fɛ, Isa ka cɛɛ wo yen Allabatobonba kɔndɔ ka a fɔ a yɛ ko: «I ɲa lɔ! I ra lakɛndɛya sisen. I ye hakɛ kɛ boloka fewu, sa ko gbɛrɛ kana i sɔrɔn, mɛn ka juu ka tamin jankarɔ wo kan.» 15Cɛɛ wo bɔra ye ka wa a fɔ Yahudiyailu la ɲɛmɔɔilu yɛ ko Isa le ka a lakɛndɛya.
16Wo le rɔ, ii wulira Isa tɔrɔla, baa a darini tɛrɛ ko su woilu kɛla Ɲɔɲɔ lon. 17Kɔni Isa ka a fɔ ii yɛ ko: «N Fa ye baarala, haan sisen. N fanan ye baarala.» 18Jabili wo kosɔn, Yahudiyailu la ɲɛmɔɔilu ka kɛ Isa faa ɲa ɲinin di ka tamin fɔlɔma kan. Baa ii ka a fɔ ko a ma Ɲɔɲɔ lon bonya, ka a la wo kan fanan, a ka Alla kili ko a Fa, ka a jɛrɛ rakanya Alla ma.
Fa ka fanka di a Dencɛ ma
19Isa ka ii jabi: «N ye tuɲa le fɔla ai yɛ: Dencɛ ti se fosi kɛla a jɛrɛ yɛ. A ye Fa yenna mɛn kɛla a fanan ye wo la ɲɔɔn kɛla. Fa ye mɛn kɛla a Dencɛ fanan ye wo kɛla. 20Fa Dencɛ duman a yɛ. A ye fen bɛɛ ɲa yirakala a la, a ye mɛn kɛla. A ye ko bailu yirakala a la mɛn di ai kabannakoya. 21Baa Fa ri sayabato lawuli, ka ɲenemaya di ii ma ɲa mɛn ma, wo ɲa kelen ma Dencɛ ye a fɛ ka ɲenemaya di mɛnilu ma, a ri wo di woilu ma. 22Fa tɛ mɔɔ si kiti tɛɛla, kɔni a ra kiti bɛɛ to a Dencɛ bolo, 23sa mɔɔ bɛɛ ri Dencɛ wo bonya ikomin ii ye a Fa bonyala ɲa mɛn ma. Mɛn ma sɔn ka Dencɛ wo bonya, wo tii tɛ a Fa fanan bonyala, mɛn ka Dencɛ kelaya kɔnin.»
24«N ye tuɲa le fɔla ai yɛ: ni mɔɔ ka n na kumakan namɛn, ka lemɛniya n kelayaba ma, wo tii ra ɲenemaya banbali sɔrɔn. Kiti ti bela wo tii kan, kɔni a ra bɔ saya rɔ ka don ɲenemaya rɔ. 25N ye tuɲa le fɔla ai yɛ: waati ra se sisen sayabatɔilu ri Alla la Dencɛ la kumakan namɛn, a ni mɛnilu ka a kumakan namɛn woilu ri to ɲenemaya rɔ. 26Baa Fa wo ye ɲenemaya tii ri ɲa mɛn ma, a ra a Dencɛ kɛ ɲenemaya tii ri ɲa kelen wo ma. 27A ka kiti tɛɛ saratii di a Dencɛ ma, baa ale le Mɔɔ Dencɛ ri.
28«Wo kana ai kabannakoya a la ko wo bɛɛ rɔ. Waati ye nala, sayabatɔ mɛn bɛɛ ye kaburu kɔndɔ, wo bɛɛ ri Mɔɔ Dencɛ kumakan namɛn. 29Ii bɛɛ ri wuli ka bɔ kaburu kɔndɔ. Mɛnilu ka koɲuma kɛ, woilu ri ii wuli ka bɔ saya rɔ ka ɲenemaya banbali sɔrɔn. Mɛnilu ka kojuu kɛ, woilu ri bɔ kaburu rɔ ka wa kiti diya. Kiti ri be ii kan.
Sereya siyaman de ye Alla Dencɛ bolo
30«N ti se fosi kɛla n jɛrɛ yɛ. N Fa ye mɛn fɔla n yɛ, n ye kiti tɛɛla ka bɛn wo le ma. N ye kiti wo tɛɛla telen de rɔ. Nba n ti ko kɛla mɛn duman n jɛrɛ yɛ, kɔni mɛn ka n kelaya n ye wo sawo le kɛla. 31Ni n ye n jɛrɛ la sereya le ri, n ye mɛn fɔla wo tɛ jatela foyi ri. 32Kɔni, dogbɛrɛ ye n na sereya ri, n ka a lɔn ko a ye sereya mɛn bɔla, wo ye tuɲa le ri. 33Ai ka kelaya lawa Yaya ma, a ni a ka mɛn sereya ii ma, wo ye tuɲa le ri. 34(Nde mako sa mɔɔ la ka kɛ n na sereya ri, kɔni n ye wo fɔla ka bɛn ai la kisi ko le ma.) 35Yaya tɛrɛ ye le ikomin fitina na mɛlɛnni, ka kɛnɛya labɔ. Ai sɔnda ka sɛwa a la kɛnɛya waati kundunni wo la.
36«Kɔni sereya gbɛrɛ ye nde bolo mɛn ka bon ka tamin Yaya ta la. Nba, baara mɛn donda n bolo n Fa bolo ko ka a kɛ, n na baara wo le ye n na sereya ri. Wo le ye yirakala ko n Fa le ka n nana. 37N Fa mɛn ka n nana, wo fanan ye n na sereya le ri, kɔni ai tolo ma a la kumakan namɛn fɔlɔ fewu. Ai ɲa ma a ɲakɔrɔla yen fɔlɔ fewu. 38Ai jusukun ma sɔn a la kuma ma, baa a ka mɛn kelaya, ai ma lemɛniya wo ma. 39Ai ye kitabu sɛniman karanna ka ai miri ko ai ri ɲenemaya banbali sɔrɔn kuma wo rɔ. Kitabu sɛniman de ye n na sereya ri, 40kɔni ai sa a fɛ ka na n ma ka ɲenemaya sɔrɔn.
41«N ti natala mɔɔilu ko mɛnilu ye n tɔɔ ɲuma fɔla, 42kɔni n ka ai bɛɛ lɔn, ko Alla la kaninteya tɛ ai jusu rɔ. 43N da na n Fa tɔɔ rɔ, kɔni ai ti sɔnna n damirala. Ni mɔɔ gbɛrɛ nara a jɛrɛ tɔɔ rɔ, ai ri wo ramira. 44Ka i ɲɔɔn tando, wo le duman ai yɛ. Kɔni tandoli mɛn di sɔrɔn Alla kelen pe fɛ, ai tɛ wo ɲininna. Ai ri se lemɛniyala wo rɔ di?
45«Ai kana imiri ko nde ri ai tɔɔ la a la n Fa ɲakɔrɔ. Ai bɛɛ la landaɲa ye Musa mɛn dɔ, wo le ri ai tɔɔ la a la. 46Ni ai lara Musa la, ai tun di la nde fanan na, baa Musa ka n na ko sɛbɛ a la kitabu kɔndɔ. 47Kɔni Musa ka mɛn sɛbɛ, ai ma la wo la. Awa ai ri se lala n na kumakan wo la wo rɔ wa?»
Currently Selected:
YUH 5: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
