YUH 3
3
Isa ni Nikodɛmu la ko
1Nba, Farisi cɛɛ do tɛrɛ ye ye, a tɔɔ ko Nikodɛmu. Yahudiyailu la ɲɛmɔɔ do le tɛrɛ a ri. 2A nara ka Isa yen su tun da ko: a ka a fɔ ko: «Rabi, an ka a lɔn ko Alla le ka i kelaya an ma, ka na an karan. Mɔɔ si ti se wo kabannako tɔɔmasereilu ɲɔɔn kɛla ni Alla tɛ a fɛ.» 3Isa ka a jabi: «N ye tuɲa le fɔla i yɛ: ni mɔɔ mɛn ma sɔrɔn kokura, wo tii ti se Alla la mansaya yenna.» 4Nikodɛmu ka a fɔ Isa yɛ ko: «Mɔɔ ri se sɔrɔnna cɛmɔɔbaya rɔ ka a kɔsɛ a na kɔnɔ rɔ ka sɔrɔn siɲa fila wa?» 5Isa ka a jabi: «N ye tuɲa le fɔla i yɛ: mɔɔ si ti se donna Alla la mansaya rɔ ni a ma sɔrɔn ji rɔ a ni nii#3.5 Kerekikan dɔ nii ni fɔɲɔ bɛɛ ye kelen de ri rɔ. 6Mɛn bɔni faribanku rɔ wo ye faribanku le ri, mɛn bɔni Nii Sɛniman dɔ, wo ye nii le ri. 7I kana kabannakoya baa n da fɔ ko: ‹mɔɔ ka kan ka sɔrɔn kokura.› 8Fɔɲɔ ri a fili ikomin a duman yɛ ɲa mɛn. I ri a mankan mɛn, kɔni i ma a lɔn a ye bɔla fan si, i ma a lɔn a wala fan si. A ye wo ɲa le mɔɔilu fanan yɛ mɛn bɛɛ sɔrɔnni Nii Sɛniman dɔ.»
9Awa Nikodɛmu ka Isa maɲininka ko: «Ko wo ye sela kɛla di?» 10Isa ka a jabi: «I ye karanmɔɔ le ri Isirayɛlika yɛ, kɔni i ma wo lɔn wa? 11N ye tuɲa le fɔla i yɛ: an ka mɛn lɔn, an ye wo le fɔla. An da mɛn yen, an ye wo le sereya bɔla. Kɔni ai ti sɔn an na sereya ma. 12Ni n ka dunuɲa koilu fɔ ai yɛ, kɔni ai ma la woilu la. A ye di wo rɔ, ni n ka sankolo koilu fɔ ai yɛ, ai ri la woilu la di? 13Mɔɔ si ma don harijeene rɔ fɔɔ Mɔɔ Dencɛ, mɛn jiini ka bɔ harijeene rɔ. 14Nba, waati taminnin, Musa ka duuma sa munuɲa layɛlɛ jiri la wula kɔndɔ ɲa mɛn ma, Mɔɔ Dencɛ fanan ka kan ka layɛlɛ wo ɲa le ma, 15kosa mɔɔ si wa lemɛniya a ma, wo ri ɲenemaya banbali sɔrɔn.»
16Baa, Alla ka dunuɲa mɔɔilu kanin kosɛbɛ, wo rɔ, a ka a Dencɛ kelen pe di, kosa mɔɔ si wa lemɛniya a ma wo kana halaki, kɔni a ri ɲenemaya banbali sɔrɔn. 17Wo rɔ Alla ma a Dencɛ lana ka kiti be dunuɲa kan, kɔni ka a kisi a la baraka rɔ.
18«Mɔɔ si wa lemɛniya Dencɛ ma, wo ti jalakila, kɔni mɔɔ mɛn ma lemɛniya wo tun da jalaki, baa a ma lemɛniya Alla Dencɛ kelen tɔɔ ma. 19Kɛnɛya ra na dunuɲa rɔ, kɔni dibi duman adamaden yɛ ka tamin kɛnɛya la, ka a masɔrɔn ii kɛwaliilu juuman. Kiti beni ii kan mɛn kosɔn, wo le wo ri. 20Baa mɔɔ si ye kojuu kɛla, kɛnɛ wo ma di a yɛ fewu. A ti sɔn donna kɛnɛ wo rɔ, baa a tɛ a fɛ a kɛwaliilu ye bila gbɛ rɔ. 21Kɔni mɛn ye taamala ka bɛn Alla la tuɲa ma, wo le ye nala kɛnɛya ma, kosa mɔɔilu ri a yen gbɛ rɔ ko wo tii ra ko mɛn kɛ, a ra wo kɛ Alla la dɛmɛnnin de rɔ.»
Yaya ye sereya bɔla Isa la ko rɔ
22Waati wo taminnin kɔ rɔ, Isa ni a la karanden wara Jude mara rɔ. Ii ka waati dando kɛ ye ka mɔɔilu sun ji rɔ. 23Wo ka a tɛrɛn Yaya ye mɔɔilu sunna ji rɔ Enɔn mɛn ye Salimu tɔrɔfɛ. Yɔrɔ wo ye jiman diya ba le ri. Mɔɔilu nara a ma ka ii sun ji rɔ. 24Wo waati rɔ, Yaya tɛrɛ ma bila kaso la fɔlɔ.
25Awa, lon do rɔ, sɔsɔli do wulira Yaya la karanden doilu ni Yahudiya do tɛma. Sɔsɔli wo tɛrɛ ye dina sɛniyali landa le kan. 26Ii nara Yaya tɛrɛn ka a fɔ ko: «Rabi, i kɛra mɛn na sereya ri, Juridɛn Ba kɔma, a ye mɔɔilu sunna ji rɔ. Sisen bɛɛ ra iwa a kɔfɛ.» 27Yaya ka ii jabi: «Mɔɔ si ti se fen sɔrɔnna a jɛrɛ yɛ ni Alla ma di mɛn ma. 28Aile mɛn ye yan, ai ri kɛ n na sereya ri ko n ka kuma wo fɔ ko: ‹Mɔɔ Ɲenematɔmɔnin tɛ n di›, kɔni ‹n ye mɔɔ le ri mɛn na nani a ɲɛfɛ.› 29Kɔɲɔmuso ye mɛn bolo wo le furucɛ ri, kɔni cɛɛ duɲɔɔ mɛn lɔni kɔ ma, a tolo ye a kan na. A wa furucɛ kan mɛn tuma mɛn na a ri sɛwa bakɛ. Wo rɔ, n sɛwani ka ɲaalen ka dafa. 30Wo rɔ Isa la ko ka kan ka bonya ka tamin n na ko la, n na ko ka kan ka a majii bakɛ.
31«Mɛn nani ka bɔ sankolo rɔ wo ye bɛɛ kun na. Mɛn nani ka bɔ dunuɲa rɔ wo ye dunuɲa ta le ri. Wo ye dunuɲa koilu le fɔla, kɔni mɛn nani ka bɔ sankolo rɔ wo ye fen bɛɛ kun na. 32A ka mɛn yen a ni a ka mɛn mɛn a ye wo sereya le bɔla, kɔni mɔɔ tɛ sɔn a la sereya rɔ. 33Mɛn ka i sɔn a la sereya ma wo ye a yirakala ko Alla ye tuɲa le fɔla. 34Baa Alla ka mɛn nana wo ye Alla la kuma le fɔla, baa Alla ye Nii Sɛniman dila a ma fewu. 35Fa Alla ye a Dencɛ kaninna. A ka fen bɛɛ don Dencɛ bolo. 36Mɛn wa lemɛniya Dencɛ ma wo ri ɲenemaya banbali sɔrɔn. Mɛn wa a ban lemɛniyala Dencɛ ma wo ti ɲenemaya banbali sɔrɔnna, kɔni Alla la mɔne ri to a ma fewu.»
Currently Selected:
YUH 3: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
