KEW 8
8
1Sawuli sɔnda Etiyɛn faa ko ma.
Sawuli ka lemɛniya jama tɔrɔ
Wo lon kelen, mɔɔilu wulira ka lemɛniya jama tɔrɔya kojuuya Jerusalɛmu. Wo rɔ, lemɛniya mɔɔilu bɛɛ ka ibori ka wa Jude mara ni Samari mara fan bɛɛ rɔ. Talibidenbailu dɔrɔn de ma bɔ Jerusalɛmu. 2Alla ɲɛsilanɲɛba doilu ka Etiyɛn su don ka kasi kosɛbɛ a la saya ko rɔ.
3Kɔni Sawuli tɛrɛ ye lemɛniya jama tɔrɔla kojuuya. A tɛrɛ ye donna ii la bonilu la ka ii mira, cɛɛ ni musoilu. A tɛrɛ ye woilu bɛɛ mirala fanka la ka ii bila kaso la.
Filipe ka Samarikailu kawandi
4Nba, mɛnilu jɛnsɛnda ka bɔ Jerusalɛmu, woilu sera yɔrɔ yɔrɔ rɔ, ii ka kibaro ɲuma lase ye mɔɔilu ma. 5Filipe borini wara Samari so ba la. A ka Mɔɔ Ɲenematɔmɔnin na ko lase ye mɔɔilu ma. 6Jama ka ii tolo malɔ a la kosɛbɛ. Ii ka a la kuma lamɛn ka a la tɔɔmasere kɛni yen, 7baa jinailu kule kan ba bɔra, ka bɔ jinatɔilu siyaman fɛ a bolo. Kɔrɔngbɔyatɔ siyaman ni senkelen siyaman nakɛndɛyara fanan. 8Wo kɛra sɛwa ko ba ri so wo mɔɔilu bolo.
9Cɛɛ do tɛrɛ ye, mɛn tɔɔ tɛrɛ ko Simɔn. A tun da mɛn, Simɔn ye wɔyɛmaya koilu kɛla so kɔndɔ ka Samarikailu bɛɛ kabannakoya. Ale tɛrɛ ye a jɛrɛ kɛla mɔɔba le ri. 10Ka a damira denninilu ma haan mɔɔbailu, bɛɛ tɛrɛ ye ii tolo malɔla a la kosɛbɛ. Ii tɛrɛ ye a fɔla a ma ko: «Ɲin kɔnin ye Alla la sebaya ba jɛrɛ le ri.» 11Nba, Simɔn tɛrɛ ye ii makabala a la wɔyɛmaya koilu la kɛbi waati jan. Wo rɔ, ii bɛɛ tɛrɛ ye ii tolo malɔla a la kosɛbɛ. 12Kɔni Filipe ka kibaro ɲuma lase ii ma, mɛn ye Alla la Mansaya ko ni Isa Ɲenematɔmɔnin tɔɔ la ko rɔ. Ii lara a la kuma la tuma mɛn na, ii sunda ji rɔ, cɛɛ ni musoilu. 13Simɔn jɛrɛ fanan lara kuma wo la ka sun ji rɔ. A sunni kɔ rɔ ji rɔ, a ma bɔ Filipe kɔfɛ fewu. Filipe tɛrɛ ye kabannako ni tɔɔmasere mɛnilu kɛla, woilu ka Simɔn kabannakoya kosɛbɛ.
14Wo tuma, a fɔra talibidenbailu yɛ, mɛn tɛrɛ ye Jerusalɛmu, ko Samarika doilu ra sɔn Alla la kuma rɔ. Wo rɔ, ii ka Piyɛri ni Yuhana kelaya ko ii ye wa woilu tɛrɛn ye. 15Piyɛri ni Yuhana se mɛn kɛni Samari, ii ka Alla matara lemɛniya mɔɔilu yɛ, sa ii ri Alla la Nii Sɛniman sɔrɔn. 16Lemɛniya mɔɔ woilu sunda ji rɔ tɛrɛ Maari Isa tɔɔ le rɔ, kɔni Alla la Nii Sɛniman tun ma na ii si ma fɔlɔ. 17Piyɛri ni Yuhana banda Alla matarala ka ii bolo la ii kan. Wo rɔ, ii ka Alla la Nii Sɛniman sɔrɔn.
18Nba, Simɔn ka a yen tuma mɛn na ko lemɛniya mɔɔilu ka Alla la Nii Sɛniman sɔrɔn talibidenbailu la bolo lankannin fɛ, a ka wodi bɔ ko a ye a dila ii ma. 19A ka a fɔ ko: «Ai ye wo se di n ma, sa n wa n bolo la mɔɔ mɛn kan, wo ye Nii Sɛniman sɔrɔn.»
20Kɔni Piyɛri ka a fɔ a yɛ ko: «I ni i la wodi bɛɛ ye halaki! Baa i ra imiri ko Alla ye mɛn dila mɔɔ ma, i ri wo sɔrɔn wodi la.» 21Piyɛri ka a fɔ ko: «Ile kɔnin! I sen tɛ an na baara ɲin dɔ fewu! Baa i jusu telenni tɛ Alla ɲana. 22I ye tubi ka Allabatala matara, sa i ra miriya juu mɛn kɛ, tumadɔ i ri makoto wo la. 23N da a yen ko ɲagboya ka siya i kɔndɔ fewu. Kojuu ra kɛ i la kuntii ri.»
24Simɔn ka jabili kɛ ko: «Ai ye Allabatala matara n yɛ, sa ai ka mɛn fɔ ɲin, wo si kana n sɔrɔn.»
25Nba, Piyɛri ni Yuhana ka a ɲafɔ ka Allabatala la kuma lase ii ma. Ii ban mɛn kɛni baara wo la, ii ka ii kɔsɛ Jerusalɛmu. Ii watɔla, ii taminda kibaro ɲuma lasela Samarikailu la so mɛsɛn siyaman na.
Filipe bɛnda Etiyopi ɲɛmɔɔ do la
26Allabatala la mɛlɛka do nara ka a fɔ Filipe yɛ ko: «I wuli ka wa tele kankan bolokinin dɔ. Sila mɛn ye bɔla Jerusalɛmu ka wa Kasa, i ye wo mira.» (Sila wo ye bɔla wula rɔ.) 27Filipe wulira ka sila wo mira ka wa. Nba, a ka i ɲɔɔn bɛn Etiyopika kibaten do la sila la. Ɲɛmɔɔ ba le. Ale le siini Etiyopi mansa muso Kandasi la nanfulu bɛɛ kun na. Wo wani tɛrɛ Alla bato diya Jerusalɛmu. 28Cɛɛ wo bɔtɔ tɛrɛ Jerusalɛmu ka i kɔsɛ a wara. A siini a la sowontoro rɔ sila la ka Nabi Esayi la kitabu karan. 29Alla la Nii Sɛniman ka a fɔ Filipe yɛ ko: «I madon sowontoro ɲin na ka itaama a tɔrɔfɛ.» 30Wo rɔ, Filipe ka ibori ka wa se sowontoro ma. A ka cɛɛ wo karankan mɛn, a ye Nabi Esayi la kitabu karanna. Filipe ka a maɲininka ko: «I ye kuma mɛn karanna ɲin, i ka wo kɔrɔ lɔn wa?» 31A ka Filipe jabi: «Ni mɔɔ ma wo kɔrɔ fɔ n yɛ, n di se wo lɔnna di?» A ka Filipe kili ko a ye yɛlɛ ka a sii a tɔrɔfɛ sowontoro kɔndɔ. 32A tɛrɛ ye kuma mɛn karanna, wo le ka a fɔ ko:
«A kɛra ikomin saa bulan, mɛn da bila julu la ka wa a kannatɛɛ diya.
Ikomin saa bulan, mɛn tɛ kasila a si mali waati,
A ma foyi fɔ.
33Ii ka a lafɛya, ka a la hakan bɔ a bolo la.
Mɔɔ tɛ kuma a bɔnsɔn ko rɔ,
Ka a masɔrɔn ii ka a faa.»
34Cɛɛ ka Filipe maɲininka ko: «N fa, nabi ye kumala yon na ko rɔ kuma ɲin dɔ? A ye kumala a jɛrɛ la ko le rɔ wa, wa mɔɔ gbɛrɛ? I ye wo fɔ n yɛ.» 35Wo rɔ, Filipe ka a damira kitabu kuma wo ma, ka Isa la kibaro ɲuma fɔ a yɛ.
36-37Ii ye wala sila fɛ tuma mɛn na, ii sera kɔ do ma. Cɛɛ ka a fɔ Filipe yɛ ko: «I ɲa lɔ, ji ye yan. Nfen di n bali sunna ji rɔ?» 38Cɛɛ ka a fɔ sowontoro borila yɛ ko a ye sowontoro lalɔ. A ni Filipe jiira ji rɔ. Filipe ka a sun ji rɔ. 39Ii bɔ mɛn kɛni ji rɔ, Maari Nii Sɛniman ka Filipe ta ka wa a ri. Cɛɛ wo ma a yen butun, kɔni a sɛwani ba bɔra ye ka wa.
40Filipe ka a jɛrɛ yen Asoti so kɔndɔ. A taminda kibaro ɲuma lasela so bɛɛ la, haan a nara se Sesare.
Currently Selected:
KEW 8: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
