Mateos 5

Lamatuak Yesus nanori hatahorir numa letek lain

1Neu Yesus mete-nita hatahori noꞌun seli mai tungga Ndia, boe ma Ana hene neni lete-mbuku anak esa neu, de nanggatuuk neu naa. Ndia ana nunin nara fo neni here nalak kara raa, mai deka-deka fo nenene neun. 2Boe ma Ana mulai nanori sara nae,

Hatahori mana maua tetebes

(Lukas 6:20-23)

3“Hatahori kasian nara fo mana parluu Manetualain raua,

nahuu Manetualain mesa kana, ndia sira Mane neulaun.

4Hatahorir mana rameda susa-sonak raua,

nahuu Manetualain mesa kana, ndia kokoe-nanasi sara.#Yesaya 61:2

5Hatahori kadiꞌik kara raua,

nahuu neu ko ara simbo basa babaꞌe-babatik fo Manetualain helu-bartaak ena.#Sosoda Kokoa-kikiok kara 37:11

6Hatahorir fo dalen nara hii ralan seli neu Manetualain eno-dala ndoon raua,

nahuu neu ko Ana tao nala sara rameda dai.#Yesaya 55:1-2

7Hatahorir mana ratudu dale kasian raua,

nahuu neu ko Manetualain oo tuda kasian neu sara boe.

8Hatahorir fo dalen nara lolo-laok raua,

nahuu neu ko sira mesa kasa, ndia mete-rita Manetualain.#Sosoda Kokoa-kikiok kara 24:3-4

9Hatahorir mana tao mole-damek raua,

nahuu neu ko Manetualain nae, ‘Sira iar, Au anang nggara.’

10Hatahorir mana hambu tuni-ndenik nahuu tungga Manetualain raua,

nahuu Manetualain mesa kana, ndia sira Mane neulaun.#1 Petrus 3:14

11Neu faik fo hatahori laen tao doidoso ei, nahuu tungga Au, ei oo maua boe. Neu faik fo ara kokolak manggarauk neu ei, ma ratuik puputa-papata tao raboboo ei nadem mara, ei oo maua boe.#1 Petrus 4:14 12Leo mae talo naa oo, ei muste tao aom mara mamahoko ma dalem mara kada mbena sau-sau boe, nahuu Manetualain sadia bala fee ei babaꞌem noꞌun seli nai nusa tetuk do inggu temak ena. Tehuu masaneda, ee! Ta kada ei ndia doidoso talo naa, te bakahulun hatahorir oo tao manggarauk talo naa soa-neu Manetualain mana toꞌu dedeꞌan nara boe.”#2 Israꞌel no Yahuda Tutui Bakahulun 36:16; Nedenuk kara Tutuin 7:52

Hatahori mana tungga Lamatuak Yesus sama leo masik ma manggaledok

(Markus 9:50; Lukas 14:34-35)

13“Mete ma ita tae tao nanaꞌak malada, na, ita tao masik neun dei. Leo naak oo, hatahorir mana leo nai dae-bafok ia, ara toꞌa neu ei boe. Tehuu mete ma masik mami ena, na, nanalan hata bali? Kada nggari henin neu dalak fo heheta-tatabun leo.#Markus 9:50; Lukas 14:34-35

14Ei oo muste leo-laꞌo sama leo lambu boe, mita fo hatahori noꞌuk ka mete-rita no neulauk. Ei mbilam mara muste rasaꞌa, nok bali kota manai letek lain, de basa hatahorir mete-ritan.#Yohanis 8:12; 9:5 15Hatahori mana nambila lambu tiꞌoek, ara ta ranggunggua lambu naa neu ure dae dale. Tehuu ara ratetende lambu naa neu mamana demak, mita fo ana tao manggaledo uma isin lalaꞌen.#Markus 4:21; Lukas 8:16; 11:33 16Ei oo muste leo-laꞌo talo naa boe. Ei muste masaꞌa, mita fo hatahori laen nara mete-rita ei leleo-lalaꞌo neulaum mara. Neu ara mete-rita talo naa, neu ko ara koa-kio Manetualain rae, ‘Wee! Ei Amam manai nusa tetuk do inggu temak naa, ta neni babanggak!’ ”#1 Petrus 2:12

Lamatuak Yesus mai fo tao natetu Manetualain hohoro-lalanen

17“Ei boso duꞌa mae, Au uni dae-bafok ia mai, fo koka heni Manetualain hohoro-lalanen fo Ana feek neu baꞌi Musa. Ma boso duꞌa mae, Au ta tao matak neu hata fo Manetualain mana toꞌu dedeꞌan nara kokolak memak kana numa lele uluk mai ena. Huu Au mamaing ia, ae tao basan dadi tetar sama leo basa hata fo ara kokolak memak kana ena. 18Huu naa de nenene matalolole, ee! Lalai no dae-inak bei ta rakalulutu, mete ma basa-basan bei ta dadi tungga Manetualain hohoro-lalanen nara. Leo mae titik do koma esa oo, ta bisa neni koka henik boe.#Lukas 16:17 19Numa Manetualain hatahorin lalaꞌen mai, mete ma hambu ketuk lena langga Manetualain hohoro-lalanen, nahuu ana duꞌa nae, ‘Hee! Hohoro-lalanek ia kadiꞌik ka, ta naena sosoak hata esa boe na!’ De ana nanori neu hatahori laen talo naa, neu ko Manetualain henggenee nalan dadi kada hatahori kadiꞌik nai nusa tetuk do inggu temak. Tehuu hatahori mana tao tungga Manetualain hohoro-lalanen lalaꞌen, boe ma ana nanori hatahori laen talo naa, neu ko Manetualain henggenee nalan dadi hatahori mana maena sosoak nai nusa tetuk do inggu temak. 20Mamahere neu Au! Ei muste leo-laꞌo no ndoos lena heni meser anggama ma hatahori partei Farisir raa. Mete ma taa, na, ei ta bisa maso dadi miu Manetualain hatahorin.”

Lamatuak Yesus nanori hatahorir fo esa boso namanasa esa

(Lukas 12:57-59)

21“Ei bubuluk baꞌi Musa hohoro-lalanen fo nafada memak kana neu ita bei-baꞌin nara ena nae, ‘Boso makanisa hatahori, te see nakanisa hatahori, neu ko ana hambu hukun.’#Kalua numa Masir mai 20:13; Tui Seluk laꞌe-neu Dala Masodak 5:17 22Tehuu Au ae afada talo ia: esa boso namanasa esa, te see namanasa ndia toranoon, neu ko ana hambu hukun. Hatahori mana nahuur mbali toranoon nae, ‘O uten leo kea!’ neu ko hatahori naa, muste neu nasare nai lasi anggamar matan. Ma hatahori mana mboka babalik ndia toranoon nae, ‘Nggoa bebek, ee!’, neu ko ana hambu hukun nai aꞌi mbila ta kala matek dale.

23Dadi mete ma o muni fefeek soa-neu Manetualain, tehuu o masaneda mae, hambu o toranoom bei namanasa o, 24na, boso mbeda o fefeem naa neu dei. Muu fo mole-dame mua o toranoom dei, basa naa dei fo o muu mbeda o fefeem soa-neu Manetualain.

25Mete ma hambu hatahori rae radedeꞌa ro o, na, malole lenak o muu maote lai-laik fo mole-dame muan dei. Mete ma taa, na, neu ko hatahori naa leꞌa no o, fo muu masare mbali mana maketu-maladi dedeꞌak. Boe ma mana maketu-maladi dedeꞌak loo lima o muni pulisi muu, de ara sese o muni bui dale muu. 26Au kokolak tetebes ia! Neu ko o leo makandoo muu bui dale, losa bae maketu basa o hutam lalaꞌen.”

Lamatuak Yesus nanori hatahorir fo boso hohongge

27“Ei bubuluk baꞌi Musa hohoro-lalanen mana nae, ‘Boso hohongge.’#Kalua numa Masir mai 20:14; Tui Seluk laꞌe-neu Dala Masodak 5:18 28Tehuu Au ae afada talo ia: hatahori mana botik matan fo mete-nita inak esa, boe ma dalen hii nalan seli nae sunggu-soro nakabua noon, na, touk naa hohongge no inak naa nai dalen dale ena. 29Mete ma o tao salak munik o mata konam, na, doꞌi henin leo. Malole lenak o maso muni nusa tetuk do inggu temak muu, muni kada o matam esak ka lena heni ara nggari o muni aꞌi mbila ta kala matek muu, mua o mata deꞌem dua sara.#Mateos 18:9; Markus 9:47 30Ma mete ma o tao salak munik o lima konam, na, tete heni limak naa leo. Malole lenak o maso muni nusa tetuk do inggu temak muu, muni kada o limam esak ka lena heni ara nggari o muni aꞌi mbila ta kala matek muu, mua o limam dua sara.”#Mateos 18:8; Markus 9:43

Lamatuak Yesus nanori hatahorir fo boso ramaketu

(Mateos 19:9; Markus 10:11-12; Lukas 16:18)

31“Ei bubuluk baꞌi Musa hohoro-lalanen ena nae, ‘Hatahori mana namaketu no sao inan, na, ana muste fee inak naa susura nemeketuk.’#Tui Seluk laꞌe-neu Dala Masodak 24:1-4; Mateos 19:7; Markus 10:4 32Tehuu Au afada talo ia: mete ma hambu hatahori namaketu no sao inan, naa te sao inan bei ta laꞌok sala nita no touk laen, boe ma inak naa sao seluk, na, naa sama leo sao touk makasososan, ndia tao inak naa hohongge-lelena. Mete ma hambu touk sao nala inak esa fo saon elan ena, na, dua sara oo hohongge-lelena naa ena boe.”#Mateos 19:9; Markus 10:11-12; Lukas 16:18; 1 Korentus 7:10-11

Lamatuak Yesus fee nenorik laꞌe-neu soꞌuk hehelu-bartaak

33“Ei bubuluk baꞌi Musa hohoro-lalanen ena fo ana nafada neu ita bei-baꞌin nara nae, ‘Mete ma o soꞌuk hehelu-bartaak pake sumba-sook no Manetualain naden, na, o makaesa mua hehelu-bartaak naa ena.’#Malangga Anggamar Hohoro-lalanen 19:12; Susura Rerekek 30:2; Tui Seluk laꞌe-neu Dala Masodak 23:21 34Tehuu Au afada talo ia: mete ma o soꞌuk hehelu-bartaak, na, boso pake sumba-sook. Boso sumba-soo pake nusa tetuk do inggu temak naden, nahuu nusa tetuk do inggu temak naa, Manetualain mamana leleon.#Yakobis 5:12; Yesaya 66:1; Mateos 23:22 35Boso sumba-soo pake dae-inak naden, nahuu dae-inak naa Manetualain ei tatabun. Ma boso sumba-soo pake Yerusalem naden, nahuu Yerusalem naa, Mane Ina-huuk kotan.#Yesaya 66:1; Sosoda Kokoa-kikiok kara 48:3 36Boso sumba-soo pake ei langgam. Te ei ta maena koasa fo parenda ei langga bulu doom esa fo bisa dadi nggeok do mutik. 37Dadi mete ma ei mae soꞌuk hehelu-bartaak mae, ‘hou’, na, mafada mae, ‘hou’ a leo. Tehuu mete ma ‘taa’, na, mae, ‘taa’ a leo. Mete ma ei kokolak lenak numa naa mai, na, naa naoka nai nitu dale ena.”

Lamatuak Yesus nanori hatahorir fo boso bala manggarauk no manggarauk, tehuu muste maono-lalau no neulauk lenak bali

(Lukas 6:29-30)

38“Ei bubuluk baꞌi Musa hohoro-lalanen ena nae, ‘Mete ma hatahori tao nakalutu o matam, na, balan tao makalutu matan boe. Mete ma hambu hatahori tao namoꞌu heni o nisim, na, balan tao mamoꞌu heni nisin boe.’#Kalua numa Masir mai 21:24; Malangga Anggamar Hohoro-lalanen 24:20; Tui Seluk laꞌe-neu Dala Masodak 19:21 39Tehuu Au afada talo ia: boso bala manggarauk no manggarauk. Mete ma hatahori famba o nasum seri, na, elan numa naa fo ana famba o nasum seri bali. 40Mete ma hambu hatahori nae nadedeꞌa no o, fo nae haꞌi nala o badum, na, fee o jeket neun bali. 41Mete ma soldadu esa nakasetik o fo luꞌa-lemba ndia bua-baꞌun laꞌok kilo esa, na, lemba malan makandoo losa kilo dua. 42Mete ma hambu hatahori noke o buam hata a mesan, na, feen neu leo. Ma mete ma hatahori nae pindan o buam hata a mesan, na, feen neu leo.”

Lamatuak Yesus nanori hatahorir fo sue-lai hatahori mana mburuk neu ita

(Lukas 6:27-28, 32-36)

43“Ei mamanene hatahorir rae, ‘Sue-lai neu o toranoom, ma mburuk neu hatahori mana mburuk neu o.’#Malangga Anggamar Hohoro-lalanen 19:18 44Tehuu Au afada talo ia: o muste sue-lai neu hatahori mana mburuk neu o. Ma moke-hule fo Manetualain fee babaꞌe-babatik soa-neu hatahori mana tao doidosok neu o. 45Mete ma o tao talo naa, na, o matudu mae, o ia, Amak manai nusa tetuk do inggu temak anan. Huu Ana tao ledo nasaꞌa soa-neu hatahori neulauk, ma Ana oo tao ledo nasaꞌa soa-neu hatahori manggarauk boe. Ana oo nakonda udan soa-neu hatahori mana tao tungga Ndia parendan, sama-sama ro hatahori mana laban Ndia parendan boe. 46Dadi mete ma o sue neu kada hatahori mana sue o, na, o duꞌa mae, Manetualain muste balan no fee o babaꞌe-babatik, do? Taa! Te hatahori manggarauk oo sue sira nonoon mana sue neu sara boe. 47Mete ma o kada kokolak soda-molek neu o nonoom, na, lenan hata? Te hatahori ta kamaherek neu Manetualain oo tao talo naa boe. 48Dadi masaneda, ee! O Amam manai nusa tetuk do inggu temak sue-lai neu basa hatahorir. Huu naa de o muste tao tungga talo naa boe!”#Malangga Anggamar Hohoro-lalanen 19:2; Tui Seluk laꞌe-neu Dala Masodak 18:13

Currently Selected:

Mateos 5: txqNTPO

Highlight

Copy