Malákí 1
1
1 Ḳhudáwand kí taraf se Malákí ki ma‘rifat Isráíl ke liye bár i nubuwwat.
2 Ḳhudáwand farmátá hai, Maiṉ ne tum se mahabbat rakkhí, taubhí tum kahte ho, Tú ne kis bát meṉ ham se mahabbat záhir kí? Ḳhudáwand farmátá hai, Kyá ‘Esau Ya‘qúb ká bháí na thá? lekin maiṉ ne Ya‘qúb se mahabbat rakkhí, 3aur ‘Esau se ‘adáwat rakkhí, aur us ke paháṛoṉ ko wírán kiyá, aur us kí mírás biyábán ke gídaṛoṉ ko dí. 4Agar Adom kahe, Ham barbád to húe, par wírán jagahoṉ ko phir ta‘mír kareṉge, to Rabb u’l afwáj farmátá hai, Agarchi wuh ta‘mír kareṉ, par maiṉ ḍháúṉgá: aur log un ká yih nám rakkheṉge, Sharárat ká mulk, Wuh log jin par hamesha Ḳhudáwand ká qahr hai. 5Aur tumhárí áṉkheṉ dekheṉgí, aur tum kahoge, ki Ḳhudáwand ki tamjíd Isráíl kí hudúd se áge tak ho.
6 Rabb u’l afwáj farmátá hai, Ai mere nám kí tahqír karnewále káhino, beṭá apne báp kí, aur naukar apne áqá kí ta‘zím kartá hai: pas agar maiṉ báp húṉ, to merí ‘izzat kaháṉ hai? aur agar áqá húṉ, to merá ḳhauf kaháṉ hai? Par tum kahte ho, Ham ne kis bát meṉ tere nám ki tahqír ki? 7Tum mere mazbah par nápák rotí guzránte ho, aur kahte ho, ki Ham ne kis bát meṉ terí tauhín kí? Isí meṉ jo kahte ho, Ḳhudáwand kí mez haqír hai. 8Jab tum andhe kí qurbání karte ho, to kuchh buráí nahíṉ! Aur jab laṉgṛe aur bímár ko guzránte ho, to kuchh nuqsán nahíṉ! Ab yihí apne hákim kí nazr kar; kyá wuh tujh se ḳhush hogá, aur tú us ká manzúr i nazar hogá? Rabb u’l afwáj farmátá hai. 9Ab zará Ḳhudá ko manáo, táki wuh ham par rahm farmáe; tumháre hí háthoṉ ne yih guzráná hai; kyá tum us ke manzúr i nazar hoge? Rabb u’l afwáj farmátá hai. 10Kásh ki tum meṉ koí aisá hotá, jo darwáze band kartá, aur tum mere mazbah par ‘abas ág na jaláte! Rabb ul afwáj farmátá hai, Maiṉ tum se ḳhush nahíṉ húṉ, aur tumháre háth ká hadya hargiz qubúl na karúṉgá. 11Kyúṉki áftáb ke tulú‘ se g̣urúb tak qaumoṉ meṉ mere nám kí tamjíd hogí; aur har jagah mere nám par baḳhúr jaláeṉge, aur pák hadye guzráneṉge: kyúṉki qaumoṉ meṉ mere nám ki tamjíd hogí, Rabb u’l afwáj farmátá hai. 12Lekin tum is bát meṉ us kí tauhín karte ho, ki tum kahte ho, Ḳhudáwand kí mez par kyá hai! Us par ke hadye behaqíqat haiṉ. 13Tum ne kahá, Yih kaisí zahmat hai! aur us par nák chaṛháí, Rabb u’l afwáj farmátá hai. Phir tum lúṭ ká mál, zabíhe aur laṉgṛe aur bímár láe; aur isí tarah ke hadye guzráne, Kyá maiṉ in ko tumháre háth se’ qubúl karún? Ḳhudáwand farmátá hai. 14La‘nat us dag̣ábáz par jis ke galle meṉ nar hai, par Ḳhudáwand ke liye ‘aibdár jánwar ko nazr mánkar guzrántá hai; kyúṉki maiṉ sháh i ‘azím húṉ, aur qaumoṉ meṉ merá nám muhíb hai, Rabb u’l afwáj farmátá hai.
Currently Selected:
Malákí 1: URDR55
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)