Paidáish 12

1Aur Ḳhudáwand ne Abrám se kahá, ki Tú apne watan aur apne nátedároṉ ke bích se, aur apne báp ke ghar se nikalkar us mulk meṉ já jo maiṉ tujhe dikháúṉgá. 2Aur maiṉ tujhe ek baṛí qaum banáúṉgá, aur barakat dúṉgá, aur terá nám sarfaráz karúṉgá, so tú bá‘is i barakat ho; 3jo tujhe mubárak kaheṉ, un ko maiṉ barakat dúṉgá; aur jo tujh par la‘nat kare, us par maiṉ la‘nat karúṉgá; aur zamín ke sab qabíle tere wasíle se barakat páeṉge. 4So Abrám, Ḳhudáwand ke kahne ke mutábiq, chal paṛá; aur Lút us ke sáth gayá; aur Abrám pachhattar baras ká thá, jab wuh Hárán se rawána húá. 5Aur Abrám ne apní bíwí Sáraí aur apne bhatíje Lút ko aur sab mál ko, jo unhoṉ ne jama‘ kiyá thá, aur un ádmíoṉ ko, jo un ko Hárán meṉ mil gaye the, sáth liyá; aur wuh mulk i Kan‘án ko rawána húe aur mulk i Kan‘án meṉ áe. 6Aur Abrám us mulk meṉ se guzartá húá maqám i Sikm meṉ Morih ke balút tak pahuṉchá. Us waqt mulk meṉ Kan‘ání rahte the. 7Tab Ḳhudáwand ne Abrám ko dikháí dekar kahá, ki Yihí mulk maiṉ terí nasl ko dúṉgá: aur us ne waháṉ Ḳhudáwand ke liye, jo use dikháí diyá thá, ek qurbángáh banáí. 8Aur waháṉ se kúch karke us paháṛ kí taraf gayá, jo Baitel ke mashriq meṉ hai, aur apná ḍerá aise lagáyá ki Baitel mag̣rib meṉ aur ‘Aí mashriq meṉ paṛá, aur waháṉ us ne Ḳhudáwand ke liye ek qurbángáh banáí aur Ḳhudáwand se du‘á kí. 9Aur Abrám safar kartá kartá junúb kí taraf baṛh gayá.

10Aur us mulk meṉ kál paṛá: aur Abrám Misr ko gayá, ki waháṉ ṭiká rahe; kyúṉki mulk meṉ saḳht kál thá. 11Aur aisá húá ki jab wuh Misr meṉ dáḳhil hone ko thá, to us ne apní bíwí Sáraí se kahá, ki Dekh, maiṉ jántá húṉ ki tú dekhne meṉ ḳhúbsúrat ‘aurat hai: 12aur yúṉ hogá, ki Misrí tujhe dekhkar kaheṉge, ki Yih us kí bíwí hai: so wuh mujhe to már ḍáleṉge, magar tujhe zinda rakh leṉge. 13So tú yih kah dená, ki Maiṉ is kí bahin húṉ; táki tere sabab se merí ḳhair ho; aur merí ján terí badaulat bachí rahe. 14Aur yúṉ húá ki jab Abrám Misr meṉ áyá, to Misríoṉ ne us ‘aurat ko dekhá ki wuh niháyat ḳhúbsúrat hai. 15Aur Fir‘aun ke umará ne use dekhkar Fir‘aun ke huzúr meṉ us kí ta‘ríf kí: aur wuh ‘aurat Fir‘aun ke ghar meṉ pahuṉcháí gayí. 16Aur us ne us kí ḳhátir Abrám par ihsán kiyá: aur bheṛ bakriyáṉ aur gáe bail, aur gadhe, aur g̣ulám, aur lauṉḍiyáṉ, aur gadhiyáṉ, aur úṉṭ us ke pás ho gaye. 17Par Ḳhudáwand ne Fir‘aun aur us ke ḳhándán par, Abrám kí bíwí Sáraí ke sabab se baṛí baṛí baláeṉ názil kíṉ. 18Tab Fir‘aun ne Abrám ko bulákar us se kahá, ki Tú ne mujh se yih kyá kiyá? Tú ne mujhe kyúṉ na batáyá ki yih terí bíwí hai? 19Tú ne yih kyúṉ kahá, ki Wuh merí bahin hai? Isí liye maiṉ ne use liyá ki wuh merí bíwí bane. So dekh, terí bíwí házir hai; us ko le aur chalá já. 20Aur Fir‘aun ne us ke haqq meṉ apne ádmíoṉ ko hidáyat kí, aur unhoṉ ne use, aur us kí bíwí ko us ke sab mál ke sáth rawána kar diyá.

Currently Selected:

Paidáish 12: URDR55

Highlight

Copy