1 Salátín 3
3
1Aur Sulaimán ne Misr ke bádsháh Fir‘aun se rishtadárí kí, aur Fir‘aun kí beṭí biyáh lí, aur jab tak apná mahall, aur Ḳhudáwand ká ghar, aur Yarúshalem ke chaugird díwár na baná chuká, use Dáúd ke shahr meṉ lákar rakkhá. 2Lekin log úṉchí jagahoṉ meṉ qurbání karte the, kyúṉki un dinoṉ tak koí ghar Ḳhudáwand ke nám ke liye nahíṉ baná thá. 3Aur Sulaimán Ḳhudáwand se mahabbat rakhtá, aur apne báp Dáúd ke áín par chaltá thá: itná zarúr hai ki wuh úṉchí jagahoṉ meṉ qurbání kartá aur baḳhúr jalátá thá.
4Aur bádsháh Jiba‘ún ko gayá, táki qurbání kare; kyúṉki wuh ḳháss úṉchí jagah thí; aur Sulaimán ne us mazbah par ek hazár soḳhtaní qurbáníáṉ guzráníṉ. 5Jiba‘ún meṉ Ḳhudáwand rát ke waqt Sulaimán ko ḳhwáb meṉ dikháí diyá; aur Ḳhudá ne kahá, Máṉg, maiṉ tujhe kyá dúṉ. 6Sulaimán ne kahá, Tú ne apne ḳhádim mere báp Dáúd par baṛá ihsán kiyá, is liye ki wuh tere huzúr rástí aur sadáqat, aur tere sáth sídhe dil se chaltá rahá; aur tú ne us ke wáste yih baṛá ihsán rakh chhoṛá thá, ki tú ne use ek beṭá ‘ináyat kiyá jo us ke taḳht par baiṭhe, jaisá áj ke din hai. 7Aur ab, ai Ḳhudáwand mere Ḳhudá tú, ne apne ḳhádim ko mere báp Dáúd kí jagah bádsháh banáyá hai: aur maiṉ chhoṭá laṛká hí húṉ, aur mujhe báhar jáne aur bhítar áne ká shu‘úr nahíṉ: 8aur terá ḳhádim terí qaum ke bích meṉ hai jise tú ne chun liyá hai; wuh aisí qaum hai jo kasrat ke bá‘is na giní já saktí hai, na shumár ho saktí hai. 9So tú apne ḳhádim ko apní qaum ká insáf karne ke liye samajhnewálá dil ‘ináyat kar, táki maiṉ bure aur bhale meṉ imtiyáz kar sakúṉ: kyúṉki terí is baṛí qaum ká insáf kaun kar saktá hai? 10Aur yih bát Ḳhudáwand ko pasand áí, ki Sulaimán ne yih chíz máṉgí. 11Aur Ḳhudá ne us se kahá, Chúṉki tú ne yih chíz máṉgí, aur apne liye ‘umr kí darází kí darḳhwást na kí, aur na apne liye daulat ká suwál kiyá, aur na apne dushmanoṉ kí ján máṉgí, balki insáfpasandí ke liye tú ne apne wáste ‘aqlmandí kí darkhwást kí hai: 12so dekh, maiṉ ne terí darḳhwást ke mutábiq kiyá: maiṉ ne ek ‘áqil aur samajhnewálá dil tujh ko baḳhshá, aisá ki terí mánind na to koí tujh se pahle húá, aur na koí tere ba‘d tujh sá barpá hogá: 13aur maiṉ ne tujh ko kuchh âur bhí diyá jo tú ne nahíṉ máṉgá, ya‘ní daulat aur ‘izzat, aisá ki bádsháhoṉ meṉ terí ‘umr bhar koí terí mánind na hogá. 14Aur agar tú merí ráhoṉ par chale, aur mere áín aur ahkám ko máne, jaise terá báp Dáúd chaltá rahá, to maiṉ terí ‘umr daráz karúṉgá. 15Phir Sulaimán jág gayá; aur dekhá ki ḳhwáb thá. Aur wuh Yarúshalem meṉ áyá, aur Ḳhudáwand ke ‘ahd ke sandúq ke áge khaṛá húá, aur soḳhtaní qurbáníáṉ guzráníṉ, aur salámatí kí qurbáníáṉ chaṛháíṉ, aur apne sab mulázimoṉ kí ziyáfat kí.
16Us waqt do ‘aurateṉ jo kasbiyáṉ thíṉ, bádsháh ke pás áíṉ aur us ke áge khaṛí húíṉ. 17Aur ek ‘aurat kahne lagí, Ai mere málik, maiṉ aur yih ‘aurat donoṉ ek hí ghar meṉ rahtí haiṉ, aur is ke sáth ghar meṉ rahte húe mere ek bachcha húá. 18Aur mere zachcha ho jáne ke ba‘d tísre din aisá húá, ki yih ‘aurat bhí zachcha ho gayí, aur ham ek sáth hí thíṉ; koí g̣air shaḳhs us ghar meṉ na thá, siwá ham donoṉ ke jo ghar hí meṉ thíṉ. 19Aur is ‘aurat ká bachcha rát ko mar gayá, kyúṉki yih us ke úpar hí leṭ gayí thí. 20So yih ádhí rát ko uṭhí, aur jis waqt terí lauṉḍí sotí thí, mere beṭe ko merí bag̣al se lekar apní god meṉ liṭá liyá, aur apne mare húe bachche ko merí god meṉ ḍál diyá. 21Subh ko jab maiṉ uṭhí, ki apne bachche ko dúdh piláúṉ, to kyá dekhtí húṉ, ki wuh mará paṛá hai; par jab maiṉ ne subh ko g̣aur kiyá, to dekhá ki yih merá laṛká nahíṉ hai jo mere húá thá. 22Phir wuh dúsrí ‘aurat kahne lagí, Nahíṉ; yih jo jítá hai, merá beṭá hai, aur mará húá terá beṭá hai. Is ne jawáb diyá, Nahíṉ; mará húá terá beṭá hai, aur jítá merá beṭá hai. So wuh bádsháh ke huzúr isí tarah kahtí rahíṉ. 23Tab bádsháh ne kahá, Ek kahtí hai, Yih jo jítá hai merá beṭá hai, aur jo mar gayá hai wuh terá beṭá hai: aur dúsrí kahtí hai, ki Nahíṉ; balki jo mar gayá hai, wuh terá beṭá hai, aur jo jítá hai wuh merá beṭá hai. 24So bádsháh ne kahá, Mujhe ek talwár lá do. Tab wuh bádsháh ke pás talwár le áe. 25Phir bádsháh ne farmáyá, ki Is jíte bachche ko chírkar do ṭukṛe kar ḍálo, aur ádhá ek ko, aur ádhá dúsrí ko de do. 26Tab us ‘aurat ne jis ká wuh jítá bachcha thá, bádsháh se ‘arz kí, kyúṉki us ke dil meṉ apne laṛke kí mámatá thí so wuh kahne lagí, Ai mere málik, yih jítá bachcha usí ko de de, par use ján se na marwá. Lekin dúsrí ne kahá, Yih na merá ho na terá; use chír ḍálo. 27Tab bádsháh ne hukm kiyá, ki Jítá bachcha usí ko do, aur use ján se na máro, kyúṉki wuhí us kí máṉ hai. 28Aur sáre Isráíl ne yih insáf jo bádsháh ne kiyá suná, aur wuh bádsháh se ḍarne lage; kyúṉki unhoṉ ne dekhá, ki ‘adálat karne ke liye Ḳhudá kí hikmat us ke dil meṉ hai.
Currently Selected:
1 Salátín 3: URDR55
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
