Máciya 26

Huhaanaahu hata élambaayi li hulob mata jamuk Yéesu

(Maak 14:1-2; Lík 22:1-2; Saŋ 11:45-53)

1Nan Yéesu abanumuu elobayi yata kulimaku unku feh, li aan kúgoomaku koola:

2— Jihaase joon taate kunak kúl̥uba kagaanaku kata Faakayi fan abeti li kuŋen bukan min kubaaŋool li ekuluwa.

3Muñeˈe huhaanaahu hata élambaayi li kunahaanaku kata ésukayi, li kujoj li eluufayi yata anahaanawu ata kúlambaaku an koonemuu Kayif. 4Nan kujojumuu, li kujamoo mata min kubuutoo Yéesu kujok an bahaasut kujow kumuk. 5Bale li koon:

— Jakum ujokaalool nan kagaanaku kata Faakayi, jakum bil ésukayi éguul̥oo.

Anaale li aŋa’ eheeñ áyu li húkowahu hata Yéesu

(Maak 14:3-9; Saŋ 12:1-8)

6Muñeˈe nan Yéesu alakomuu li ésukayi yan koonemuu Betani, li eluufayi yata Simoŋ an háhaayee ejoke, 7anaale akee aakene ateefaay ameeŋeni eheeñ yaseele ŋáa’, li álohul Yéesu, min aŋa’ eheeñayi áyuwool li húkow akila li hutiñ. 8Bale nan kúgoomaku kata Yéesu kujukumuu anaalaawu li akaan loon muñaˈa, súumutiil min koon:

— Kama muñowu wáa újimuu li aŋa’ eheeñayi inyu acooc? 9Eheeñayi inyu eyiliyeene éjulayi seel ŋáa’, min sídalamasu siŋali sen esukateenayi.

10Yéesu li ahaas wahawu wan kulakomuu elobayi li aaniil:

— Wáa újiye li joono li kayoken anaalaawu ummu? Lakankaan wah wajake ŋáa’ boot lí ínje. 11Mata fan jibaj nanoonan esukateen li bukuluul, bale ínje let ilako li bukuluul nanoonan. 12Min anaalaawu ummu aŋa’muu eheeñayi áyuwom li eniil, lakankaan mo boot kafale kahokaku kúmbaam. 13Li mal̥egenamu fan ilobuul, tanootan tan Hulimahu unhu Hásuumaahu huwaaleyi li adunaayi feh, fan kulob foof wahawu wan anaalaawu ummu akaanumuu, min awayil̥oyi.

Sudaas li anuyoo Yéesu

(Maak 14:10-11; Lík 22:3-6)

14Muñeˈe, akee li kúgoomaku kuŋen li kúl̥uba, an koone Sudaas Isikaaliyot li ajow ajuk huhaanaahu hata élambaayi, 15min aaniil:

— Waa jifañe jisenom ínje babete Yéesu li kuŋenuul?

Li kucob sihanjal sata sídalam soono áyii li kuŋen kusenool. 16Yaan no unnu, Sudaas li alako huŋes bútin bajake boot min abet Yéesu li kuŋeniil.

Yéesu li akaan kagaanaku kata Faakayi li Kúgoomaku koola ló

(Maak 14:12-21; Lík 22:7-14, 21-23; Saŋ 13:21-30)

17Li líiŋ li hunakahu hútinaalahu hata kagaanaku kata kúmbuuluwaku kakaanutimuu élebiil kata Yéesu li kubil kujukool min kugel̥l̥enool koonool:

— Bay lufañe min jilak sinaaŋasu sata kagaanaku kata Faakayi?

18Yéesu li aaniil:

— Jijow boot li ésukayi bata antijaman jijow joonool: «Anahaanawu laane: “taŋayi yúmbaam éliiŋe, kúgoomaku kúmbaam lí ínje humumom, boot min jibil jikaan kagaanaku kata Faakayi booli.”»

19Kúgoomaku li kukaan loon Yéesu alobiilumuu, min kulak sinaaŋasu sata Faakayi.

Yéesu li alob aan an fan abetool li kuŋen bukan

20Muñeˈe li bil líiŋ kátiimaku, Yéesu li abah li kúgoomaku u koola ló kuŋen di kúl̥uba boot hutiñ. 21Nan kulakomuu hutiñahu, li aaniil:

— Li mal̥egenamu fan ilobuul, akee li bukuluul fan abetom li kuŋen bukan.

22Kúgoomaku li jokiil ŋáa’. Li kugel̥l̥en Yéesu ano li ano koonool:

— Amaaŋen, waa fíle, ínje?

23Yéesu li aaniil:

— Anawu álu’muu kaŋenool li buyinjaayabu li mano lí ínje, akila ammuu li abetom li kuŋen bukan. 24Añool-An fan aket loon Bakiicelabu bulobumuu buya li akila. Bale katek kujow kulako li anawu ammuu li abetool li kuŋen bukan. Haŋeene majak jakum anawu ummu abuki.

25Sudaas ammuu li abet Yéesu li kuŋen bukan, li agel̥l̥enool aanool:

— Anahaan, waa fíle, ínje?

Yéesu li aanool:

— Awu humumi lúlobulo mó.

Húmbuulu li ejunk yata ébiiñ boot kawayil̥o Yéesu

(Maak 14:22-26; Lík 22:15-20; 1 Koolentiyeŋ 11:23-25)

26Nan kulakomuu hutiñahu, Yéesu li aŋa’ húmbuulu. Nan ásooniyen homuu aban, li amuncul ho asen kúgoomaku koola, ban li aaniil:

— Jiŋa’ jitokoñ. Laale eniilayi yúmbaam.

27Li alaañen aŋa’ ejunk yata ébiiñ, min asal Ateemit aban, li aseniil yo ban li aaniil:

— Jihob ló bukuluul foofuul feh. 28Mata laalu húsimahu húmbaam, húsimahu halitenumuu húfaalumahu han Ateemit ajokumuu bukanabuku, háyuwimuu boot li bukan kameeŋe, boot kabonketaku kata uhoofoolawu. 29Fan ilobuul, kale hunakahu hata síyaat lihobumee ébiiñayi inyu min ikat, boot yok nan emmuu ilaañen ihob ébiiñ yawunkul li bukuluul ló li Jáyiiyaju jata Atuubawom.

30Muñeˈe nan kukijenumuu ukijen wata kasal Ateemit kuban, li kúfu’ kujow boot bata Huyuuyahu hata unuunukenawu waaneyimuu Olíibiye.

Yéesu li alob ákibben bo kaanaku Fiyeel fan bil aceeŋ aan lahaasoohaas

(Maak 14:27-31; Lík 22:31-34; Saŋ 13:36-38)

31Nan kúliiŋumuu bata Huyuuyahu hata unuunukenawu waaneyimuu Olíibiye, Yéesu li aan kúgoomaku koola:

— Li ehukaayi inye, wahawu wammuu li ubajom fan újiwuul foofuul feh li jikat bo káyinenaku kan jibajumuu lí ínje, mata kikkiic kaanaku: «Fan itek amataawu imuk, min kúgalalaanaku kata bumatabu kuyiisoo#Sakali 13:7; Saŋ 16:32.» 32Bale nan emmuu li iyitowumul li eketayi, fan ijow ló ijow ikobuul Gálile.

33Fiyeel li aanool:

— Manoo kaabuku feh kukat bo káyinenaku kan kubajumuu li awu, ínje let ikaan mo.

34Yéesu li aanool:

— Li mal̥egenamu fan ilobi, li ehukaayi inye humum yo, fan uceeŋ ñoono ñáhaaji oon luhaasonhaas, tówum káyin kul̥ok.

35Fiyeel li aan Yéesu:

— Maayeet min eete iket inaboo li awu, bale let iceeŋ een lihaasihaas.

Kúgoomaku feh li kulob manolamu.

Yéesu li al̥aw tan koone Getisemane

(Maak 14:32-42; Lík 22:39-46)

36Muñeˈe Yéesu li kúgoomaku koola li kujow boot tan koone Getisemane, kúliiŋ li aaniil:

— Jibah taate mín ínje ijow baaba kal̥aw.

37Yéesu li ájowetum Fiyeel buko li bañiilabu búl̥uba báyinaabu bata Sebede. Li kit tóŋ jokool ban li kaanool kákoli.

38Muñeˈe li aaniil:

— Buyina báamak bookom, bayilo bumukom. Jilako taate lí ínje ban jakum jímooli.

39Yéesu li ayinno bo lóyi jakee, li ákuntuŋ min aŋa’ buulool aya li etaam min al̥aw loon muñeˈe:

— Faafa, loon kayiliyeenuma, li úloyiyen ejunkayi inyu yata sílaamasu téetiwom. Bale jakum kaan loon ínje ifañumuu, bale loon awu ufañumuu.

40Yéesu li aban kal̥awaku, li álaañul boot tan kúgoomaku koola kúhaaji kulakomuu áŋejul li atookiil buko li kámooli. Muñeˈe li agel̥l̥en Fiyeel aanool:

— Kama jibanut jiban bayili jilako lí ínje bámooliwut maayeet ewaatu yano? 41Jakum jímooli. Jil̥aw jakum bil jilo li jabunt. Buyinumabu bufañe, bale eniilayi égootogooto.

42Yéesu li alaañen búl̥ubut ayinno bo min al̥aw aan:

— Faafa, kaanumuu loon ejunkayi inyu yata sílaamasu eyilaat éloyiyom ínje bahobut yo, jow kaan loon awu ufañumuu.

43Yéesu li aban kal̥awaku, li amit álaañul boot tan kúgoomaku koola kulakomuu áŋejul, li alaañen atookiil buko li kámooli, mata kámooliyaku kujokiijok ŋáa’ gay kuyilaat kuluuj. 44Li alaañen akatiil to min ayinno bo áliiŋ, li alaañen búhaajut ál̥awum li kulimaku kanolaku. 45Fúlum tó, Yéesu li álaañul boot tan kúgoomaku kulakomuu min aaniil:

— Kama jiloŋe li jímooli min jiyool̥o? Jíkaanum, waatuwayi ékoojulo; Añool-An kubetool kuban li kuŋen kata kuhoofoola. 46Jiyito ujowaal! Anawu ammuu li abetom li kuŋen bukan láliiŋulo.

Huhaanaahu hata élambaayi li hujok Yéesu

(Maak 14:43-50; Lík 22:47-53; Saŋ 18:3-12)

47Nan Yéesu alakomuu elobayi, Sudaas alakomuu akee li kúgoomaku kuŋen li kúl̥uba li áliiŋul. Li ánaboolul li búsuk bajunkowulo síkundu li sigol. Bukanabuku umbuku huhaanaahu hata élambaayi li kunahaanaku kata ésukayi kúboñuliil. 48Sudaas abetumuu Yéesu li kuŋen bukanabuku umbuku, lalobiilob buu láatimuu akaan min kuhaas Yéesu. Laaniisaan: «Anawu an emmuu igaab kuŋenom, akilamuu. Jijokool.» 49Muñeˈe Sudaas li ayaan ajow boot tan Yéesu alakomuu, áliiŋ li aanool:

— Lisaafi, Anahaan!

Ban li agaabool. 50Bale Yéesu li aanool:

— Afaalom, wahawu wan ubilumuu kakaan, ukaan wo.

Muñeˈe bukanabuku kánabulumuu li Sudaas li kúlohul Yéesu, min kujokool. 51Akee li bukanabuku kalako tomuu li Yéesu li áhoonul ékunduwayi yoola atek alokaawu ata anahaanawu ata élambaayi, afalen kanuu. 52Yéesu li aanool:

— Uhoon ékunduwayi yooli, mata bukanabuku feh katiikumemuu síkundu, fan kúketum síkundu. 53Kama uhaasut oon liyilo ihooñ Atuubawom mata min alambenom, li ayaan ásenulom muñeˈe uyooŋ wata emalaka wahaŋe kuŋen li úl̥uba? 54Bale ikaan momuu, buu wahawu wan Bakiicelabu bulobumuu woote úbajum? Bakiicelabu bonsoon wahawu unwu fan ubaj loon muñaˈa.

55Fúlum tó, Yéesu li aan búsukabu:

— Waa, jibil boot kajokom li síkundu li sigol ló loon eenimuu ínje ákuu? Hunakoohunak linaanaak ibah li Eluufayi yata Ateemit, min inaak iliiken bukanabuku mata Ateemit, ban jijokutom. 56Bale wahawu unwu feh ubabbaj bájum kulimaku kan kufulofetaku kukiicumuu kukat to, li kubaj.

Muñeˈe kúgoomaku koola li kukatool bo, min kutewoo kuwuj.

Yéesu hákil huhaanaahu hata Kusuwifaku

(Maak 14:53-65; Lík 22:54-55, 63-71; Saŋ 18:12-14, 19-24)

57Bukanabuku kajokumuu Yéesu, li kújowetumool boot bata anahaanawu ata élambaayi an koonemuu Kayif, ban kaliikenemuu ésukayi Eluwaayi yata Móyiis li kunahaanaku kuwoogumuu. 58Bale Fiyeel li alako lóyi min anaak ánabul li Yéesu, boot yok li ekaakayi yata eluufayi yata álambaawu ahaanawu. Nan áliiŋ dómuu, li abah áginnoo li kufooyaabuku min ajuk buu wahawu feh wóomi li úbanum eeno.

59Muñeˈe huhaanaahu hata élambaayi li Huhaanaahu hata Kusuwifaku, li kuŋes bukan kayilo kúmal kuya li Yéesu bájum li kuyili kumukool. 60Bale maayeet min sigujuun sameeŋe sibilumuu boot min símal siya li Yéesu, sijukut li akila butila banooban. Li húbanumahu, kánayine kúl̥uba li kubil kuyito to min koon:

61— Anáyinaawu ummu lansaan: «Liyilo ihum Eluufayi yata Ateemit, ban li iŋa’ kunak kúhaaji min ilaañen iteef yo.»

62 Alámbaawu áamakawu li ayito, li aan Yéesu:

— Kama waa ulet li ubag? Kama wahawu wan bukanabuku umbuku kulobemuu li wo kuya li awu, buu?

63Bale Yéesu abagut. Alámbaawu áamakawu li aanool:

— Lil̥awi li kajaw kata Ateemit aloŋumuu. Ulóboli mantee awu ommuu Afakenaawu, Añiilawu ata Ateemit.

64Yéesu li aanool:

— Lúlobulo mo awu humumi. Bale fan eenuul: Kítum muñeˈe, fan jijuk Añool-An mabahe kaŋen káli kata Ateemit ata sembe, li abilumul li ufaalawu wata haatiya emitayi.

65Nan Yéesu alobumuu loon muñaˈa, anahaanawu ata élambaayi li ahaacul wañawu wan akila humumool aakenumuu, aban li aan:

— Lagele Ateemit. Ulaañenutaal usohulawaal kumaata. Jijame feh bukuluul humumuul kulimaku kan alobumuu aya li Ateemit. 66Muñeˈe buu jiyinoole?

Li koonool:

— Tootook min aket.

67Muñeˈe li kuyaan kumasenool li buul, ban li kutekool sínuka li siheejen ban li koonool:

68— Emmuu awu ommuu Afakenaawu, kama úheboli ayi atekimuu.

Fiyeel li aceeŋ aan lahaase Yéesu

(Maak 14:66-72; Lík 22:56-62; Saŋ 18:15-18, 25-27)

69Muñeˈe no unnu, Fiyeel li abah tíyaŋ li ekaakayi yata anahaanawu ata élambaayi. Agoloola ata anahaanawu ata élambaayi li ákoojul Fiyeel min aanool:

— Awu foof lunaanaak unaboo li Yéesu áfulumulomuu li etaamayi yata Gálile.

70Bale Fiyeel li aceeŋ hákil ésukayi feh min aan:

— Ihaasut waa lufañe ulob.

71Muñeˈe nan Fiyeel alakomuu ejowayi ajooŋoo bata kámbiilaku kata ekaakayi, agoloola akee li ajukool. Li aan bukanabuku kalako tomuu:

— Anáyinaawu umme buko kunaake kunabumuu li Yéesu ata ésukayi yata Nasalet.

72Fiyeel li alaañen aceeŋ, ban li anuu aan:

— Ihaasut ánayinaawu ummu.

73Fiyowut, bukanabuku kalako tomuu li kúlohul Fiyeel min koonool:

— Mal̥egen awu foof bukuluumuu, mata malobelamu mooli múhiisenhiisen bay lúfulumulo.

74Muñeˈe Fiyeel li anuu wah wajakut aya li akila humumool aan:

— Ihaasut ánayinaawu ummu!

Muñeˈe nan alobumuu loon muñowu, káyin li kuyaan kul̥ok. 75Li awayil̥o hulimahu han Yéesu alobool nomuu aanool: «Fan uceeŋ oon luhaasonhaas ñoono ñáhaaji tówum káyin kul̥ok.» Li áfulul tíyaŋ alako bo jíl̥ok jáamak.

Currently Selected:

Máciya 26: cskDBL

Highlight

Copy