Máciya 25

Bukittenoolum bata básungute kuŋen

Yéesu li aan:

1— No unnu, Jáyiiyaju jata Ateemit fan jikittenoolumi li básungute kuŋen, kaŋale sihiitumasu sooliil min kúfu’ boot kayallo ábutowaawu. 2Koono hutok li básungutaabu kuŋenayi kúbaamobaamo, hutok li kújallo. 3Básungutaabu hutokayi kábaamomuu li kuŋa’ sihiitumasu sooliil, ban kújowetumut éduuliin. 4Bale básungutaabu bájallomuu buko li kuŋa’ sihiitumasu sooliil, ban li kumit kul̥olen éduuliin li sitiisu kújowetum. 5Emmuu ábutowaawu ábilaaliwut, básungutaabu kuŋenayi feh li kuŋooy to kuŋooy, li kúmooli.

6«Nan hukahu hujowe hulitumuu, akee li alob butiya aan: “Abútowaawu umme! Jífulul jijow jiyallowool!” 7Muñeˈe básungutaabu umbu feh li kuyito kúgoluloo sihiitumasu sooliil. 8Básungutaabu bábaamomuu li boon bájallomuu: “Jísenoli jakee li éduuliinayi yooluul, mata sihiitumasu sóololi sunsu li sihoko.” 9Bale básungutaabu bájallomuu li kooniil: “A’aa’, éduuliinayi let efit boot li áloli li boot bukuluul. Jijow boot bata kájulayemuu éduuliin, jijow jínoomul bo boot li bukuluul.” 10Nan básungutaabu bábaamomuu kulakomuu ejowayi boot hunoomahu hata éduuliinayi, ábutowaawu li áŋejul. Básungutaabu hutokayi kafalemuu, li kunaboo li akila kunoken dán kukaanumuu ébutowayi. Nan kunokenumuu kuban, kámbiilaku li kubabi. 11Li fiyo, básungute baabu bajowumuu hunoomahu hata éduuliinayi foof li kúliiŋul. Li kunaak koon: “Amaaŋen, Amaaŋen, úbabuloli!” 12Bale ábutowaawu li aaniil: “Li mal̥egenamu fan ilobuul, ihaasutuul.”»

13Yéesu li aan:

— Mó mújimuu jíkaanum, mata jihaasut hunakahu li ewaatuwayi nan Añool-An ammuu abil.

Bukittenoolum bata an aŋale ebajayi yoola asen kulokawool kúhaaji kookenool

(Lík 19:11-27)

14— Jáyiiyaju jata Ateemit fan jikittenoolumi li ánayine alakowe li ajow kañaahoo, li áhooñul kulokaabuku koola, min aŋa’ ebajayi yoola aseniil kookenool. 15Anáyinaawu li aŋa’ sihanjal sata éwulus soono síteemeel hutok asen átinaalawu. Al̥úbutawu li asenool soono síteemeel síl̥uba. Aháajutawu li asenool soono éteemeel. Lasensen anoowan li buko le li wahawu wan ayilimuu akaan, ban li ajow kañaahoolaku. 16Alokaawu ayabumuu sihanjalasu sata éwulusayi síteemeel hutokayi, li ayaan ajow aŋa’ so min alok jow yok alaañen abaj afamen to sihanjal sata éwulus sakee soono síteemeel hutok. 17Alokaawu ayabumuu sihanjalasu sata éwulusayi síteemeel síl̥ubaasu, li akaan manolamu foof, min alaañen abaj afamen to sihanjal sakee sata éwulus soono síteemeel síl̥uba. 18Bale alokaawu ayabumuu sihanjalasu sata éwulusayi soono téemeel, li ajow awok kawokaay teetaam min aŋa’ sídalamasu sata anahaanawu oola ayo’ ló.

19«Muñeˈe nan fiyomuu ŋáa’, anahaanawu ata kulokaabuku umbuku li álaañul áŋejul, li agel̥l̥eniil min ahaas buu kukaane sídalamasu san aseniilumuu kookenool. 20Alokaawu ayabumuu sihanjalasu sata éwulusayi síteemeel hutokayi, li ákoojul min áhiisool sihanjal sakee sata éwulus soono síteemeel hutok ban li aanool: “Anahaan, sihanjal sata éwulus soono síteemeel hutok luseneenom eekeni. Bale ujuke, libajulobaj sihanjal sakee sata éwulus soono síteemeel hutok, ifamen to.” 21Anahaanawu oola li aanool: “Jaajak, lukankaan aloka ajake an an ayilo ákangum li okila. Lútuutuk jak wah watit. Muñeˈe fan iseni wah wahaŋe maluuk ooken. Ubil ulako li ésuumansuum loon ínje.” 22Alokaawu ayabumuu sihanjalasu sata éwulusayi síteemeel síl̥uba, li ákoojul foof ban li aanool: “Anahaan, sihanjal sata éwulus soono síteemeel síl̥uba luseneenom eekeni. Bale ujuke, libajulobaj sihanjal sakee sata éwulus soono síteemeel síl̥uba, ifamen to.” 23Anahaanawu oola li aanool: “Jaajak, lukankaan aloka ajake an an ayilo ákangum li okila. Lútuutuk jak wah watit. Muñeˈe fan iseni wah wahaŋe maluuk ooken. Ubil ulako li ésuumansuum loon ínje.” 24Li húbanumahu, alokaawu ayabumuu sihanjalasu sata éwulusayi téemeel, li ahin ákoojul ban li aan: “Anahaan, lihahhaas een awu lukankaan ánayine átaañiye, acace tan ásuwenut, ban li aŋa’ wah wan alokut. 25Líkolikoli, li iŋa’ sídalamasu sooli ijow iyog li etaam. Wahawu wan ukilumuu unwe. Uŋa’ wo.” 26Anahaanawu oola li aanool: “Awu aloka ájakaatiye ban li úfal̥! Inti luhaase oon licacecac tan ísuwenut, ban li inaak iŋa’ wah wan ilokut? 27Booteen kama min uŋa’ sídalamasu súmbaam ujow ukaan li bank, ibilum ílaañul, li ijow íŋalul sídalamasu súmbaam ifamen to wahawu wan sibukoomuu. 28Jiyab sihanjalasu sata éwulusayi téemeelayi li akila jisen abajumuu énjunnaayi. 29Mata an abajumuu, Ateemit fan afamenool min ahaŋ mabaj. Bale an abajutumuu wahoowah, maayeet jatitaju jan abajumuu, Ateemit fan ayab jo. 30Ban alokaawu ummu ayilaatumuu wahoowah akaan, jibetenool tíyaŋ li élimayi, ban jíl̥okaju jommuu, li sílaamasu sáamakasu.”

Batiibabu búbanumabu

31— Nan Añool-An ammuu li abil loon áyii li máyiineniyamu moola, fan ánaboolul li kumalakaaku feh, abil abah li efenjeŋayi yata jáyiiyaju yáyiineniyaayi. 32Bukanabuku feh kata adunaayi fan kuwoog hákilool. Fan ágaatuloo bukanabuku loon amata ágaatuloolemuu kúgalalaanaku li sijaameenasu. 33Ban fan aŋa’ kúgalalaanaku akaan kaŋenool kúli, min aŋa’ sijaameenasu akaan kaŋenool kamay. 34Banumuu, áyiiyawu fan aan bukanabuku kammuu kulako kaŋenool káli: «Jibil, bukuluul jan Atuubawom ásooniyenumuu. Jiŋa’ jáyiiyaju jan akaanumuu boot li bukuluul, yaan no nan ajuul̥umuu adunaayi, jitowo. 35Mata bucaa bujokonjok, li jisenom itiñ. Bahob li bujokom, li jisenom ihob. Li ilako ajawoola, li jiyabom booluul. 36Ibajut wañ ikoko, li jikokom. Li ísomut, li jibilom bayoob. Li ilako li hukul̥, li jibilom bajuk.» 37Kátuulumuu Ateemit li koonool: «Kama nay jijuki awu macaalete li jiseni utiñ? Nay foof bahob bajoki, li jiseni uhob? 38Nay jijuki awu malakowe ajawoola, li jiyabi bóololi? Nay foof lulakowe maayiiñi, li jikoki? 39Nay jijuki awu másomute, mantee foof awu li hukul̥, li jibili bajuk?» 40Ayíiyawu fan aaniil: «Li mal̥egenamu fan ilobuul, nanoonan feh nan jikaane wahawu unwu akee li umbuku kahaŋumuu matiti li kutuyom, ínje humumom jikaan wo.»

41«Fúlum tómuu, áyiiyawu fan abil aan bukanabuku kammuu kaŋenool kamay: “Jíloyiyom, bukuluul jan Ateemit ajokumuu bukan kajakut! Jijow li sambunasu sáhokoweliitumuu, sakaanimuu boot li Sayitaane li kumalakaaku koola! 42Mata bucaa bujokonjok, jisenutom itiñ. Bahob li bujokom, jisenutom ihob. 43Li ilako ajawoola, jiyabutom booluul. Ibajut wañ ikoko, jikokutom. Li ísomut ban li ilako li hukul̥, jibilutom bajuk.” 44Muñeˈe buko foof fan koonool: “Amaaŋen, kama nay jijuki bucaa bajokeli, bahob bajokeli, awu balakowe ajawoola, awu bakokowut, awu básomute, awu li hukul̥, ban jilambenuti?” 45Ayíiyawu fan aaniil: “Li mal̥egenamu fan ilobuul, nanoonan feh nan jikaanut wahawu unwu akee li umbuku kahaŋumuu matiti li kutuyom, ínje humumom jikaanut wo.” 46Muñeˈe umbuku fan kujow dán koote kubaj katek boot nanoonan. Bale kátuulumuu Ateemit fan kubaj buloŋ bábaneliit.»

Currently Selected:

Máciya 25: cskDBL

Highlight

Copy