ZEKHARIA 6
6
Rawuhkheka müzü kümohtsa
1Jüsevü nga hi nüh eh notha toke nü noküze ünü aküzhi künyi azhievü nüh rawuhkheka müzü shuru; thi aküzhi künyi tü asawuo küzhi. 2#Kkt 6.4; Kkt 6.5.Rawuhkheka apowa thuoüji arawuh kümruri tü, akünyiawa thuoüji akünyi, 3#Kkt 6.2.kücheawa thuoüji arawuh kümjiri, amüzüawa thuoüji kümjikrü küuwechü. 4Jüti küsa vü hi nüh hi sie jüle küveh rügi zhühlewa vü, “Hamari tü mowa lo, eh Vüwa,” ti küna. 5#Kkt 7.1.Jüti küüna vü azhühlewa nüh, “Hamari tü azhih aveh Vüwa küpeh vünüh atülü mürhü müzüri vü kuotsezhuwa. 6Rawuhkheka rawuh akünyiri kütüwa thuoüji zhietü nyuji wuovü wa, kümjiwa thuoüji zhietu nyuji wuovü wa, thi kürhünyiwa thuoüji zhiese nyuji wuovü wa,” ti küza. 7Arawuhri tü shuru ünü mari tü müküzhikera wie thuoh nüh azhihwa küzhu notewa ngü. Thinü ma nüh, “Waluo, azhihwa küzhu noteluo,” ta küza. Jükenüh mari tü azhihwa küzhu note. 8Jüti küsa vü ma nüh hi vü zie taji, “Halie, zhietü nyuji wuovü küwari nüh eh Sietse zhietü nyuji vü kürüzi saküüpeh ra,” ti küza.
Joshua vü kajilüwa thsetsü üti azhükütsü
9Jüsevü Vüwa zhü tü hi vü ru taji: 10aküsiri Babilon vünüh küru Heldai, Tobija, thi Jedaiah sie nü jüma rülo vünüh Zefania atsa Josiah zheh vü waluo. 11Mari vünüh saküsa, suna ti vi nü kajilüwe küsü sataji jüma vi Jehozadak atsa Joshua navü kümsiewa lü rügivü thsetsüluo; 12#Jer 23.5; 33.15; Zek 3.8. thi ma vü, “Kümsietsa Vüwa nüh hakümjie küza veh, halie, anyi ma nyo Tsuona ta küsawa tü ma müthoh vünüh shizhu naveh, thi ma nüh Vüwa kükhurüzhehwa sanaveh. 13Vüwa kükhurüzheh sana küsawa tü ma nüh sanaveh, thi kümsie küsiakesiakhriwa vü nü ma kühkajipe rügivü takrü nü shupe naveh. Thi ma kükajipe kütuoh vü kajitsa küsü peh naveh, jütisanü masü azhievü kürükümhie küthsüluo peh naveh,” ti küza üti küza. 14Thi kaji lüwe wa tü Vüwa kükhurüzheh lo vü sanü Heldai, Zefania atsa Tobija, Jedaiah thi Josiah vü küümsheke küsü kümjie küsa naveh.
15“Thi kületsuovü küpehri ru nü Vüwa kükhurüzhehwa sakra naveh; jüti sanü nohri nüh hi tü thopahiri Vüwa nüh nohri vü hi küzeta küsa thsü naveh. Mükütüküzü nohri nüh kükhakükhe nü Vüwa nohri Saküüwuowa jikhi küna thuoüji hamatü saru naveh,” ti küza.
Currently Selected:
ZEKHARIA 6: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
