ZEKHARIA 14
14
Jerusalem thi Akuohjiri
1Halie, Vüwa rülo küsü tü tsethuoh, jüma rülo tü zanyo müzhüvü te küwari nohri azhievü nüh küsuo naveh, 2küpakenühnyunü hi nüh akuoküjiri aveh sazhuh nüh Jerusalem sie arie sana küveh kenüh, anyujiwa tü vitewa naveh, azhehri tü mizhihtewa naveh, thi nyimzari tü zoriem naveh; anyujiwa küzhila thuoüji aküsi satewa naveh, thitü anyi küpari thuoüji anyujiwa vünüh vi küjawa nyu. 3Jüti küsa vü arie küsa rülovü Vüwa nüh sie küsa tsothovü ma nüh tsezhuwa nüh anyuji jümari sie saluo naveh. 4Jüma rülovü ma tü zhieshu Jerusalem atüvü pehküveh Olive küzhi rügivü tsie naveh; thi Olive küzhi tü anyuo kümüza küsü nüh küzokhuo künyi sanü zhie shu thi zhitu vü tewa naveh; jüta küsa vünüh Aküzhi küzhila küsü thuoüji zhietü vü shohketewa thi küzhila küpawa thuoüji zhieseh vü shohketewa naveh. 5Thi eh küzhira nyuo thuoüji pegtewa naveh, küpakenühnyunü aküzhira nyuowa tü jüma nato shike na küveh kenüh; thi nohri tü Judah kajiwa Uzziah rülo vü mükhrüküüzhüh vü nüh küte üta te na naveh. Jüti küsa vü Vüwa nohri Saküüwuowa tü teru naveh, thi kümtseri aveh tü ma vü nyiru naveh. 6Jüma rülo vü küüjiwa nyu nyutü küsawa nyu. 7Thi jüla ta arüza münyie nüh arülo mpa wie naveh (Jümatü Vüwa nüh thsü veh), arülo nga nyu thi arüza nga nyu, küpakenühnyunü münüleh vü nga aküwie peh küveh kenüh. 8#Eze 47.1; Jhn 7.38; Kkt 22.1. Jüma rülovü rhoküveh ajuhri tü Jerusalem vünüh lizhu ru naveh, küzhila thuoüji zhieshu juhküji vü thi jümari küzhila thuoüji zhietu juhküji vü ti tewa naveh; jüma tü akie vü üta müzhü vü nga peh huo naveh. 9Thi Vüwa nüh azhih aveh nyieh kajiwa sanaveh; jüma rülovü Vüwa tü küsü thi ma nyo nga küsü mpa sanaveh. 10Azhih jüma ajü tü Jerusalem zhieseh vü Geba vünüh Rimmon küju kütake küsü satewa naveh. Thitü Jerusalem tü mape vü Benjamin kheri vünüh atükhuwa kheri azhie ajükeh kheri küju müho pehm naveh, thi Hannel khajie vünüh kajiwa akhah kütsüzhupe küju. 11Thi jüma tü anyiri rho naveh, küpakenühnyunü kümzü tü küpeh lewa nyuthuoh; Jerusalem tü luoveh ji nü kürho sana thuoh. 12Thi Vüwa nüh sahnakükho hama vi nü Jerusalem siesaluo nü arie kümlie anyiri aveh vü kürhie naveh: ajih vünüh tse peh wie küveh vünüh mari sazhü tü prim naveh, ma nothari tü nokalo vünüh prim naveh, thi mari mizhi tü mari polo vünüh prim naveh. 13Thi jüma rülo vü Vüwa vünüh mari vü küngo setu tsuotsake naveh, jüta küsa vü mari küsüsü nga ma lüpuowa ke si naveh, thi küsüwa ke tü küpawa ke vü thsuoke nüh saluo naveh; 14Judah wie nga Jerusalem siesaluo naveh. Thi akuoküjiri mükiele nü pehküveh aveh künyirhie, suna, rakasa, thi thsünyawa ti khielota vünüh vizhuh naveh. 15Thi hakümjie sahnakükho tü arawuhri rawuhsarülieh, ut, rawuhküzawa, thi asa küsüküsü nga jümara kürünape vü küpehri aveh vü ka naveh. 16#Lev 23.39-43. Jüsevü akuoküji aveh Jerusalem siesaluo nta ru nü kürhora aveh tü mahvi kürüzhu wa nü thopahiri Vüwa kajiwa khurü nta wa naveh, thi ashüzheh akhuwa sa nta khru naveh. 17Thi mükütüzü azhih vü atharuo küsü nüh thopahiri Vüwa kajiwa khurü nta Jerusalem vü mükhru thuoüji mari vü atsoh kürüketüwa nyu. 18Thi mükütüzü Egyptri tharuo nüh mari mpa mari tsü nta mükhru thuoüji, akuoküjiri nüh ashühzheh khu vü mükükhru vü Vüwa nüh kümnomnawa vi ru nü sahnakükho wa mari vü ru naveh. 19Hama nüh Egyptri thi akuoküjiri athsüzheh akhu vü mükükhruri aveh vü kümnomna sana. 20Thi jüma rülo vü arawuhra khrizah vü, “Vüwa vü kümtse,” ta khrükevü naveh. Thi Vüwa zheh vü aküfüri tü kükhurüpe atüvü afüjiri üta sanaveh; 21thi Jerusalem vü thi Judah vü ti aküfü aveh tü thopahiri Vüwa vü mütse naveh, jüta küsa vünüh küsahthuori aveh tü ru nü jümari vi nü jümari vünüh küsahthuoh asari shu naveh. Thi jüma rülo vü thopahiri Vüwa zheh lovü asüküsari küpeh lewa nyuthuoh.
Currently Selected:
ZEKHARIA 14: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.
