MARK 9

1Jümpa mükünyu ma nüh mari vü, “Hi nüh nohri vü küzatoke naveh, hala tsieküveh wuori thuoüji Saküüwuowa kükaji akükhra vi taji kürümüjie küngu küju nü aküsü hi vü küürüwanyu ta peveh,” ti küza.

Jisü nüh ma kürho saküpa taji nyiri küütsa

(Mat 17.1-13; Luk 9.28-36)

2 # 2 Pit 1.17,18. Jümasevü rülo türo sevü Jisu nüh Pitor, Jems thi Johan mari küche sie küpa küzhiho kürügitsa küsü vü tewa; thi mari atü vünüh ma kürhowa khaphrü nü kütsa. 3Thi ma thsümünyi rierieti amüra kümüjie müjihuothethe nü azhih hala kümüji küsü nga vi mükümüjiera sa. 4Thinü Elijah ri Mosa ru mari kütsa taji masü tü Jisu sie kürüchie. 5Thinü Pitor nüh Jisu vü, “Küsosiewa hiri hala peküveh küzakelenga mühie lo, hala aphrü küche hiri küüsaluo: Küsü noh kenüh, küsü Mosa kenüh thi küsüwa Elijah kenüh,” ti küza. 6Küpakenühnyunü mari tü krü she kümüthuoh kenüh ma tü mowa phranaveh nüh rüzatewa. 7#Mat 3.17; Mrk 1.11; Luk 3.22. Jütisaküvehvü akülu küsü shurü mari külüwutewa taji akülu vünü azhüphra taji nü, “Hi nüh küümzetsawa Tsa, ma zhü künaluo,” ti küza. 8Thinü masü tü shiti khievü nüh tewa nü mari tü luowie vü noküzeünü Jisu mpa mari sieküpela ngura. 9Jüsevü mari küzhiho vünü tsekütsevü ma nüh küüza, nyitsawa aküsü vünü müjie kürhole küju nü mari nüh momowa ngu nüh nyiküsüvü nga müküzatümü üti küzaphoke. 10Ma nüh küüza zhüwa müzhe tajinü pevehthuoh, thitü aküsü vünü rhoküsürale zhünyotü mowathuoh nti mari azhie vünü küsü nüh küsüvü künaluo pe. 11#Mal 4.5; Mat 11.14.Thinü mari nüh ma vü, “Thinü mokenüh Elijah nüh mürukhuji mümühieta küsa Khonyo küsosieri nüh küza lo?” ti küna. 12Ma nüh rüle mari vü küza taji, “Elijah ru khu tsawie taji zanyo aveh sakümühie tsü na ta küsa azhütsa, thitü anyi Tsawa khielota münomüna thi nyuri nüh ma tü momaküsa samünathuoh ta küsü Zhütsazhü lovü rhükesamüveh ülo? 13Thitü hi nüh nohri vü küza naveh, Elijah tü rumüthuoh, thi Vüwa zhülovü rhüküsa kümüjie anyiri nüh mokümjie ma lo nüh jükümjie küsa vünü ma vü satsüthuoh,” ti küza.

Vizanguori küsü sietse kümüsü nüh sietekütse saküümühie

(Mat 17.14-21; Luk 9.37-43)

14Thinü mari tse ma sehnyi küpari vü ru ünü anyi shieji küsü rumükieshe taji Khonyo küsosieri nüh mari sie küproluo lanü ngura. 15Thinü anyi jümaritü ma ngu nü mari ngo sheke taji müküzhikewiethuoh nüh zhüwa ma khurü. 16Thinü Jisu nüh ma sehnyiri vü, “Nohri tü mari sie mowa rüluo veh lo?” ti küna. 17Jütiküsavü anyi riekhuo azhie vünü nyi küsü nüh ma vü, “Küsosiewa, hi nüh noh vü eh tsa vizawa azhümüküphrara sietse nüh müru tekütse küsü sie tse ti,” ti küza. 18Thi küsie nüh sietse kümüsüwa nüh ma müru naveh nüh ma vi azhih vü küzemümüti, jütisataji nü ma po vünü amashie shu nü ma ha thsithsita haririti, thi ma tü tsishe tewawati. Thi noh sehnyiri vü jüma zhejamütü üti küza thitü mari nüh jüma müsara nüh samü, ti küza. 19Thinü Jisu nüh ma sehnyiri vü, “Kütsotü küzüla nyiri, hi nüh rülo küzake nohri siepe na lo? thi rülo küzake nohri sie küzhike pena lo? ma sie hi vü ra,” ti küza. 20Jütiküsavü mari nüh atsa vizanguowa sie ma vü ru ünü sietse watü Jisu ngu nü müküzhikewiethuoh nüh ma sakümnomna sheke tsü taji azhih vü ma viküze nü küzehmü tajinü ma po vünüh amütse amashieküluozhu nü ma künenya taji zehtewa. 21Thinü Jisu nüh ma pa vü, “Ma hata sate kütse mahvi küzaketetsethuoh lo?” ti küna. Thinü ma pa nüh, “Ma kürünguo vünüh hati satetsewiethuoh. 22Jütisanü hozakeriwie nga ma kürho sakümüsümütü nta ma viküze nü anyih lovü nga thi ajü lovü nga thsethse ti sa, thitü noh nüh küsara kümühie peveh üji, hiri kümüze taji nü hiri kükratsüluo,” ti khuo. 23Thinü Jisü nüh ma vü, “Noh nüh tsotüra naveh üji, kütsotü küperi kenüh thuoüji zanyo are nga sara naveh,” ti küza. 24Thinü müküzhikewiethuoh nüh atsa vizawa apa tü arüthsü shu nü zietaji, “Vüwa, hi nga tsotü veh, e mükütsotü hama kükra tsüluo,” ti khuo. 25Thinü Jisü nüh anyiri riekhuowa zhüluo kütse ngu nü ma nüh mükümtse sietse sakükrü nü ma vü, “Halie, azhümüküphrara thi khünakürüpo sietsewa, hi nüh no vü phrateveh, no ma vünü shuteraluo, thi ma lovü shele mütutümü luo,” ti küza. 26Jütiküsavü sietsewa tü zie taji ma sakümnomna sheke tsü taji nü shuteru, thi ma tü aküsüri kümüjie zehtewa; thinü anyiri aveh nüh, “Ma tü sümüthuoh,” ti sa. 27Thitü Jisü nüh ma ke küje taji sho, thinü ma süra. 28Thinü Jisu azhe lovü tetu ünü ma sehnyiri tü küüzhe vünüh ma vü, “Hiri tü mokenüh jüma zhemüjara nüh samü lo?” ti küna. 29Thinü ma nüh mari vü, “Hakümjie küsari tü zanyoküsüvü nga nüh müsara, thitü akükhuo vünüh wie,” ti küza.

Jisu nüh ma mpa ma sühle zhüku vi küüzale

(Mat 17.22-23; Luk 9.43-45)

30Jümasevü mari jüla nüh tse Galilee azhih vehthuoh tewa, thi ma tünyi küsüwienga nüh jüma müküüthsüngü nüh sa. 31Küpakenühnyunü ma nüh ma sehnyiri sosie nü, “Anyi Tsawa tü re nü nyiri ake vü thsemünathuoh, thi mari nüh fethemüna, thi fethemü taji rülo küche se vünü ma rhole naveh,” ti küza. 32Thitü mari tü ma nüh küüzawa müthsü nüh samü, thi ma vü künanah küsa nga krükümü sa.

Thawa nüh küjitsawa sana lo?

(Mat 18.1-5; Luk 9.46-48)

33Jütisanü mari Kapernaum vü ru, thi azhe lovü sakümüthuoh kenüh ma nüh ma sehnyiri vü, “Nohri lekhuji vü nohri mpa mowa küproluo tse lo?” ti küna. 34#Luk 22.24. Thitü mari tü zohmti petewa, küpakenühnyunü mari lekhuji vü kütsevüthawa nüh küüji sanaveh nüh ti küsa zhü vi küproluo kütse kenüh. 35#Mat 20.26,27; 23.11; Mrk 10.43,44; Luk 22.26. Jütisanü ma tsuo shupe taji nü türakünyiri ji nü mari vü, “Anyi küsüküsü nga apo sangüvehüji ma tü aveh zhie nüh asehkhewa müsaji mümühie, thi aveh siepewa müsaji mümühie,” ti küza. 36Jütisanü ma nüh kürünguori küsü sieru mari azhie vü thse taji ma nüh ma küruo asafü rügi vü sataji nü mari vü, 37#Mat 10.40; Luk 10.16; Jhn 13.20.“Anyi küsüküsü nga eh nyo vünü kürünguori hakümjie küsaküsiekeri nü hi sieke veh, thi anyi küsüküsü nga hi küsiekeri nü hi nyu nü hi küüzewa sieke veh,” ti küza.

Hiri mükünongü samüküvehri nü hiri wuovü wiethuoh

(Luk 9.49-50)

38Thinü Johan nüh ma rüle taji, “Küsosiewa, nyi küsü nüh noh nyo vünü sietse kümüsüri zhejala taji hiri nüh ngu lie, thitü ma nüh hiri semükünyi kenüh müsatümü üti hiri nüh ma khemüthuoh,” ti küza. 39Thitü Jisu nüh, “Ma mükhetümü, küpakenühnyunü nyi küsü nga akükhra küüro sataji shita hi müküüjora kenüh,” ti küza. 40#Mat 12.30; Luk 11.23.Thi hiri mükünongü samüküvehri thuoüji nü hiri wuovü wiethuoh. 41#Mat 10.42.Küpakenühnyunü anyi küsüküsü nga nohri tü Khrista wuovü ta sataji aju huo küsüwienga vi taji nohri küüzhu thuoüji hi nüh nohri vü küzatoke nanü piketü ma suope mükümara, ti küza.

Küükhiemuona küsa kümüjimüra

(Mat 18.6-9; Luk 17.1-2)

42Jümpa mükünyu anyi küsüküsü nga hi tsotü kütse kütazü hamari azhie vünüh nyi küsü wie nga phrateküümüsüwa thuoüji zanyoküürenyavü alohküjiwa vi ma kü lovü huke taji ajuküji lovü vehküjakewa nüh ma kenüh küümpha naveh. 43#Mat 5.30.Thi noh kenüh noh sakümüsü veh üji tethuohjamü luo, jümatü küpakenühnyunü noh ke künyi vü taji nü anyih mükünera nyihsuozü lovü tuna küsanü ake wuochuwuo vü mpa pe taji akürho lovü kütu nüh küümphana küveh kenüh. 44Jüla mari arü tü müsü thi anyih nga nemüwa. 45Jümpa mükünyu noh ji nüh noh sakümüsüveh üji tethuohjamluo, jümatü küpakenühnyunü noh ji künyi vü taji nü anyih mükünera nyihsuozü lovü tü naküsa nü aji vehküsü mpa küwi taji nü akürho lovü kütunüh küümpha naküveh kenüh. 46Jüla mari arü tü müsü thi anyih nga nemüwa. 47#Mat 5.29. Thi noh notha nüh no sakümüsüveh üji khrüzhujamü luo; jümatü küpakenühnyunü noh notha künyi vü tajinü anyih mükünera nyihsuozü lovü tu na küsanü anotha küsü mpa vünü Saküüwuowa kajipe lovükütu nüh küümphanaküveh kenüh. 48#Isa 66.24. Jüla mari arü tü müsü thi anyih nga nemüwa. 49Akütso kükhurü vü amütsü nüh saküümütse kümüjie anyi küsüküsü nga anyih nüh saküümütse naveh. 50#Mat 5.13; Luk 14.34,35.Amütsü tü mühiemü, thitü amütsü nga ma küshe münyie thuoüji, nohri mowa nüh vi jüma saküshe na lo? Nohri kürhori vü shetseluo, thi nohri küsü nüh küsü vü kürükümhie peluo, ti küza.

Currently Selected:

MARK 9: POCHBSI

Highlight

Copy