MARK 11

Jisü nüh khrarataji kütholuthovü sa Jerusalem vü kütsuo

(Mat 21.1-11; Luk 19.28-40; Jhn 12.12-19)

1Jüsevü mari tse Jerusalem küütuo Olive küzhiho nato vü Bethfage thi Bethani vü ru nü ma sehnyiri nyi künyi atü vü tseküze taji, 2masü vü küza nü, nohsü tse anyu nosü atü vü peküveh vü waluo, thi nosü tsewa rathuoüji khanavü nyi küsü nga ma rügi vü müjieküshupe arawuh kümüjie küsa aküzawa küsu hute sala nü ngunaveh nüh, nosü jüma akuli le taji sieru luo. 3Thi anyi wuori nüh nosü vü, “Nohsü mokenüh hati saveh lo ta thuoüji, Vüwa nüh hama ma kenüh müviji mümühie nüh saveh lie, thi ma nüh hama vishelerü tsümüna ta ti küza luo,” ti küza küze. 4Thinü masü tsewa ünüh, alievü amükhie ase alerü vü arawuh kümüjie küsa aküzawa hute sala nü masü nüh jüma akuli le. 5Thinü jüla tsieküveh anyi wuori nüh, “Nohsü mokenüh arawuh jüma külile veh lo?” ti küna. 6Jütiküsa vü Jisu nüh moti küza üti masü vü küza nüh jüüti marivü küza, thinü mari nga masü mükhethuoh nüh masü küzemü. 7Thi masü arawuwa sie Jisu vü ru ünü mari thsü vi ma rügi vü shieke tajinü Jisu ma rügi vü küshupe. 8Mari mpa mükünyu anyiri hozake athsümünyi vi lekhuji vü shieke; thi küpari thuoüji athso tsuona anyawa küperi zah tajinü lekhujivü shieke tsü. 9#Krh 118.25,26.Jüti sataji nü atü vü kütseringa thi asevü kütseringa aveh zie nü, “Hosanna, Vüwa nyo vünüh kütsewa thuoüji kümüngatsawa, 10Vüwa nyo nüh kütsewa, hiri pa David kajipe kümünga tsawa saluo, thi Hosanna kürügitsa,” ti sa. 11Jütisanü Jisu tü Jerusalem vü ru thi Kükhurüzhe lovü wa, thi jüütisanü luo wie vü azanyo no nü kütse vü münükümüthuoh kenüh masehnyiri sie nü Bethani vü tsewa.

Jisu nüh jichuorhu müzükümü

(Mat 21.18-19)

12Thinü rülo akünyiawa mari Bethani vünüh tse ünü ma tü avo rümatewa. 13Jütiküsavü ma tü kületsuo vünüh jichuorhu ma nyawa küpe ngu tajinü avi pelana tünti wa ünü manyawa mpa wieküchie nüh zanyoküsü nga müngu nüh samü, küpakenühnyunü jüma tsothovü jichuovi küpele mükünyu kenüh. 14Thinü ma nüh ajichuorhuwa vü, “Hala nüh tüvü küsuokürho nyiküsü wienga noh rhü vünüh noh vi müküutsathuoh,” ti samü. Jütiküsavü ma sehnyiri nüh azhu jüma künake.

Jisu nüh Kükhurüzhe vü wa nü jülo vünüh asü saküvehri zheküja

(Mat 22.12-17; Luk 19.45-48; Jhn 2.13-22)

15Jüsevü mari Jerusalem vü ru; thinü ma tü Kükhurüzhe lovü tu tajinü jülovü azanyo sü thi zhuküperi zhe, thi amekümüzhira zanyoküsape thi mükhrietü küzhura pe khajakhehmütü. 16Jütisanü nyi küsü nga Kükhurüzhe lo vünüh zanyoküsü nga vishumüküüze nti ma nüh khemü. 17#Isa 56.7; Jer 7.11.Jüti sataji nü ma nüh mari sosie taji, “Eh zhe tü anyi akuoh aveh kükhuozhe sanaveh, ta küsa rhümüsa lo? Thitü nohri nüh hama vinyuri mürakütsa kürühurazhe samüthuoh,” ti küza. 18Thinü Khonyo küsosieri thi levü küjiri nüh jü thsüra nü krükümüthuoh kenüh mokümjie ma fethenaveh nüh ti phah, küpakenühnyunü anyiri aveh ma küsosiezhü thsü nü ngo she kümü kenüh. 19Thi münüle teru ünü ma tü anyu jüla nüh tewa.

Jichuorhuwa vünüh küsosiezhü küthsüra

(Mat 21.20-22)

20Thi arüne mari ale jüma müzhe rü nüh, jichuorhu jüma arüzo vünüh sü azhü jükümjie ngura. 21Thinü Pitor tü ma se thsüra taji nü ma vü, “Küsosiewa, halie, noh nüh ajichuorhu müzükümüwa tü sümüthuoh,” ti küza. 22Jütiküüza vü Jisu nüh mari vü, “Nohri Saküüwuowa vü kütsotü pehluo,” ti küza. 23#Mat 17.20; 1 Kor 13.2.Hi nüh nohri vü küzatokenaveh, anyi küsüküsü nga küzhiho hamavü, “Noh kütsele ajuküji lovü tetu luo,” ta ma luoveh lovükümüshe künyi müsawiethuoh nüh ma nüh küüzawa sarawiena ta müshewiethuoüji jüma sarawie naveh. 24Jükenüh hi nüh nohri vü küza naveh, “Nohri nüh akükhuo küsa vü mowa münguveh nüh, jüma nguwie nathuoh thi noh zhi wiethuoh ti küsa tsotüluo. 25#Mat 6.14,15.Thi nohri nüh khuo nti küsa vü, mükütüküzü anyi wuori vü müküle peveh üji nojamütüluo, jütathuoüji rügivü küpeh Apawa nga noh müküle nojatsü naveh. 26Thitü nohri nüh nyura müküle nomüja thuoüji nohri Pa rügivü küpehwa nga nohri müküle noküjawanyu,” ti küza.

Jisü kükhra küüna

(Mat 21.23-27; Luk 20.1-8)

27Mari Jerusalem vü shele ru nü Kükhurüzheh lovü tsetse ünü levü küjiri Kükhurüzhe thi Khonyo küsosieri thi sierhüri mavü ru. 28Thinü mari nüh ma vü, “Noh mokükhrawa vi nü zanyo hari satsevehlo? thi zanyo hamari sana küsa kenüh thawa nüh kükhra hama noh tsülo?” ti küna. 29Thinü Jisu nüh mari vü, “Hi nga nohri vü zanyo küsü küna nah veh, thi nohri nüh jüma rüle hi tsüra thuoüji nü, hi nga mowa kükhra nüh vi zanyo hari satseveh nüh ta küsa nohri vü küza naveh. 30Johan Baptist tü rügi vünüh ru ünü anyiri vünüh ru lo? Jüma vihi vü küza luo,” ti küna. 31Thinü mari mpa jüle tajinü, rügi vünüh ti küzanti ünü, ma nüh, thinü mokenüh ma mütsotü lo, ta sanaveh. 32Thi nyiri vünüh ru, ti küza nti ünü anyiri krümü-küpakenühnyunü anyiri aveh nüh Johan tü setsaküthsüri ta sakümü kenüh. 33Jütisanü mari nüh Jisu vü, “Hiri nü müküzarawiethuoh,” ti küza. Thinü Jisu nüh mari vü, “Hi nga kükhra mokümjie küsanüh vi nü zanyo hari satse nüh ta küsa vi nohri vü müküzara,” ti küza.

Currently Selected:

MARK 11: POCHBSI

Highlight

Copy