MARK 1

Johan Baptist nüh küsosie

(Mat 3.1-12; Luk 3.1-18; Jhn 1.19-28)

1Saküüwuowa#1.1 Saküüwuowa: Nyi Nyiaza Küjiwa nyutü Nyiaza Küjiwa nyutü Nyiaza ta mpa nga ji mühieveh. Tsa Jisu Khrista Zhülekümühie zhü apowa. 2Khana vü Isaya setsaküthsüwa lasi lovü rhüküsa,

“Halie, hi nüh ehzhülewa noh tü vü küze naveh,

ma nüh noh lekhuji küche naveh.”

3Reza vünüh nyi küsü zie nü,

“Noh Vüwa lekhuji küche luo, ma lekhujiri sakümüsho luo,

ta sakütse ajikhi wa tü ma wiethuoh,”

Jüta rhü küsa kümüjie,

4Johan Baptist kütsüwa areza vü ru nü kükhiemuo nojana küsa kenüh aluoveh kükhaphrü vi sosie. 5Jütiküsavü Judea azhih aveh thi Jerusalemri aveh ma vü wa nü papa kükhiemuo phrazhu nü Jordan rüku vünüh ma ke vünüh baptis sa khe. 6#2 Kaj 1.8. Thi Johan tü ut#1.6 Ut: (Camel) Aju mükünyie thi are müküsho shünyizavü kürho asa. küneh vi ma küzhu; thi sahu kütsekevüh vi ma küshi tsekevü, thi mashie tü ashukrie thi awejuh. 7Thi ma nüh sosie nü küüza, “Eh nyia vü aküji küsü eh se vü tseveh, hi thuoüji kükiatsuo ma jiküükruvühli pheküsanga mületse. 8Hi nü ajuh vünüh baptis satsüveh, thitü ma nü kümtse Sietse vünüh baptis satsü naveh,” ti küza.

Jisu Baptis küsa thi ma kümüra

(Mat 3.13—4.11; Luk 3.21-22; 4.1-13)

9Jütisaküveh vü Jisu Galilee azhih vü Nazareth vünüh ru tajinü Jordan rüku vünüh baptis sa. 10Thi ma aju lo vünüh shuru ünü thajüwuri sarie nü Kümtse Sietse mükhrietü kümüjie ma rügi vü küturu ma nüh ngu, 11#Atü 22.2; Krh 2.7; Isa 42.1; Mat 3.17; 12.18; Mrk 9.7; Luk 3.22. jütiküsavü thajüwu vünüh, “Noh tü eh küümzetsa Tsawa, hi nüh noh külotsawa wiethuoh,” ti küsa phrate. 12Thinü müküzhikewiethuoh nüh Sietsewa nüh ma küchü sie areza vü küzemü. 13Jütisanü areza vü Atsuore#1.13 Tsuore: Tsuore thuoüji English vünüh küpapa küji Devil, Demon, Satan ta küjijira kümühie Vüwa mükünongü sanü ma siesaluokütse sietse kümsüwa küzaveh. nüh rülo zürake ma müra, jü tsotho vü ma rezasari siepe, thi rügizhüleri nüh ma kütsü sape.

Jisu nüh angakütieri nyi müzü küjira

(Mat 4.12-22; Luk 4.14-15; 5.1-11)

14Nyuri nüh Johan küsizhe lovü thsekümü sevü Jisu Galilee vü ru tajinü Saküüwuowa Kajipe Zhülekümühie vi nyuri sosie nü, 15#Mat 3.2. “Tsotho jumthuoh; Saküüwuowa Kajipe shenyi pemüthuoh, aluoveh khaphrü nü Zhülekümühiewa tsotüluo,” ti küza wa. 16Thi Jisu Galilee juküji nato kri tsewa ünü Simon anü Andrew masü aneh vi juküji vü vehkütse ngura; masü jünüri tü angakütieri küsa kenüh. 17Thinü ma nüh masü jünüri vü, “Nohsü eh senyi luo; jüta thuoüji angakütieri nüh anga küre kümüjie hi nüh nosü anyiküreri küüsamünü thuoh,” ti küza. 18Thinü masü tü prelepreza masü aneh jamü taji nü ma senyitewa. 19Jütisanü ma nüh pike tsekewalehü ünü ajünü künyi, Jems thi ma nü Johan, Zebedee atsa masü ngura lehü. Masütü masü juhie lovü tu nü masü aneh küthela. 20Ma nüh masü küngura vü müküzhikewiethuoh nüh masü ji, thinü masü tü masü apa Zebedee thi mari nüh ake tsü nü siekütseri jamü nü Jisu ase nyitewa.

Mükümtse Sietse siekütse anyiwa

(Luk 4.31-37)

21Jüsevü mari Kapernaum vü wa, thi sabbath ti küji Judahri kümünyierülo vü Jisu nüh Sinagog ti küji nazizheh vü külesho wa nü nyuri sosie. 22#Mat 7.28,29. Ma nüh küsosie vü Khonyo küsosieri kümüjie vünüh müsosie nüh rügi kükhra küperi kümüjie vünüh küsosie kenüh ma zhü küünari nüh müshe ngo she. 23Jüti sapeküvehvü mükümtse sietse nüh ma sieküprü tekütse nyi küsü ru mari sinagogue ti küji nazizheh lovü pela taji ma nüh zie nü, 24“Jisu Nazareth, noh hiri sie mowa santi lo, Noh hiri zorietsü nti ru ülo, Noh thawa nüh hi nüh thsü veh: Noh tü Saküüwuowa Kümtsewa wiethuoh,” ti küza. 25Thitü Jisu nüh ma phra tajinü, “Noh zotipeluo, thi ma vünüh shuteru luo,” ti küza. 26Thinü mükümtse sietsewa nüh ma pa kümnomna sheketsü nü akhi zie taji ma vünüh shuteru. 27Thinü mari aveh ngosheke tajinü mari küsü nüh küsü vü küna taji, “Hatü mowa thuoh lo, Moküsosie kürüthe thuoh lo, ma kükhra vi mükümtse sietseri vü nga azanyo küza thuoüji, jümari wie nga ma zhü künaramünü,” ti sa. 28Jütiküsavü, müküzhikewiethuoh nüh ma küthola jüma Galilee aveh vü tewa.

Jisu nüh anyiri hozake sakümühiekütsü

(Mat 8.14-17; Luk 4.38-41)

29Jüsevü mari nazizheh, sinagogue ti küji lovü nüh shuru nü külesho Jems thi Johan sie nü tse Simon thi Andrew masü zhe vü wa. 30Thinü Simon anyi (Simon vüvüh aza) mühi peküveh shiti vi Jisu vü küza 31Thinü Jisu nüh Simon anyi zeküvehvü wa taji nü ma ke sho nü sike, thinü kümühiwa ma vü müküzhikewiethuoh nüh letewa, thi Simon anyi tü süra taji azanyo küche mari tsü. 32Jüsevü münüle rünyi kuotekütu vü nga anyi naküvehri aveh thi saküüjakünya sietse nüh küprütekütseri aveh sie nü ma vü ru. 33Thi anyuküji jüla küperi aveh ru amükhie lepie vü sehzhukhe. 34Jütisanü ma nüh anyiri aküna müküzüküzü vünüh nakütseri hozake sakümühietsü thi sietse kümüsü hozake zhejatsü; tinü ma nüh sietse kümüsüri tü azhümüküüphra nüh sa, mari ma thsükümüthuoh kenüh.

Jisu Galilee vünüh nyuri küsosie

(Luk 4.42-44)

35Thinü rüne thomütho vünüh ma süra anyula vü wa nü tse anyiri mükünyie ape küüzo küsü vü nüh khuo pe. 36Thi Simon ri ma siekütseri ma se zhe tewa. 37Thinü mari ma ngura nü mari nüh ma vü, “Nyiri aveh nüh noh phavehthuoh,” ti küza. 38Thinü ma nüh mari vü küüza, “Hiri tse anyu küji küpa hari vü nga wa nüh ra, hi jüri vü nga wa nü nyuri küsosie naküsa kenüh, küpakenühnyunü hi tü jüma kenüh hala küruwie,” ti küza. 39#Mat 4.23; 9.35. Jütisanü ma Galilee azhih aveh vü küzhuwa mari nazizheh sinagogue ti kuji vünüh nyuri sosie thi sietse kümüsüri nga zheja.

Jisu nüh anyiri küsü sakümühie kütsü

(Mat 8.1-4; Luk 5.12-16)

40Jümpa nyunü wupiekünari küsü ma vü ru ma tüvü khotsü taji wurie ma vü khuo nü, “Noh nüh noh müshe thuoüji noh hi sakümühierawie naveh,” ti küza. 41Thinü ma tü ma luoveh na nü ma ke thsuowa ma pa taji nü ma vü, “Eh müshewiethuoh, noh künawa tü mütsemü luo,” ti küza. 42Thi ma nüh kephratethuoh nü, müküzhikewiethuoh nüh shita wupie künawa mühietewa. 43Thi ma nüh ma vü küzaphoke taji nü ma küchüküzemü nü küüza; 44#Lev 14.1-32. “Noh nyi küsü vü nga zanyoküsü nga müküza nüh sawienati müshekewie luo; jüta nyunü no levüwa vü wa nü noh satsa vi ma kütsaluo, jütisanü mari küthsüna küsa kenüh no sakümtsekümü küsathuoh khanavü Mosa nüh küzaküsari samüluo,” ti küza. 45Thitü ma nüh alievü wa taji zota müpe nüh küzhiküzhi phrate, thi luo wie aveh thsünyuo tewa nü Jisu tü anyiri küngu sanü anyuküji jüla mütura nüh alievü anyiri mükünyie vü mpa pe, thi anyiri luo wie vünüh ma vü küru sa.

Currently Selected:

MARK 1: POCHBSI

Highlight

Copy