MATHI 4

Jisu Kümüra

(Mrk 1.12-13; Luk 4.1-13)

1 # Ebr 2.18; 4.15. Jüsevü Jisu tü Tsuore nüh ma küümüra nta Sietsewa nüh ma küchü sie reza vü tewa. 2Thinü ma tü rülo zürake thi rüza zürake ti kükheh sevü rümatewa. 3Thinü kümürawa ma vü ru nü, “Noh tü Saküüwuowa Tsa tsah thuoüji aloh hamari vü azhü tsü taji alohse küüjemo,” ti küza. 4#Kho 8.3. Thitü ma nüh, “Nyiri tü alohse mpa vünüh mürho nü Saküüwuowa#4.4 Saküüwuowa: Nyi Nyiaza Küjiwa nyutü Nyiaza Küjiwa nyutü Nyiaza ta mpa nga ji mühieveh. apo vünüh küshuru azhü aveh vünüh rho naveh,” ti küza. 5Thinü Tsuore nüh ma sie anyuküji kümtsewa vü wa nü ma vi Kükhurüzhe luomuo#4.5 Luomuo: Azheh zhupo kümüsietsawa. rügi vü küüpe, 6#Krh 91.11,12. jütisanü ma vü, “Noh tü Saküüwuowa Tsawa wiethuoüji, noh ha rügi vünüh jo waluo. Küpakenühnyunü, ma nüh noh küürükie na küsa kenüh ma zhüleri küze naveh, thi noh jo wa aloh rügi vünüh noh müküücheke na küsa kenüh mari ake nüh noh küruote naveh,” ta küsa rhüküsa kenüh. 7#Kho 6.16. Thinü Jisu nüh, “Noh Vüwa noh Saküüwuowa kümüra vühnyu ta nga rhüsa leveh,” ti küza. 8Jüsevü nga Tsuore nüh ma sie küzhiho kümüsietsa küsü rügivü siekuo nü azhih vü kükaji aveh thi mari kümühie aveh küjo ma kütsa. 9Thi ma vü, “Noh nüh kükietsuo hi khurü thuoüji zanyo hamari aveh hi nüh no tsü naveh,” ti küza. 10#Kho 6.13. Thinü Jisu nüh ma vü, “Tsuore#4.10 Tsuore: Tsuore thuoüji English vünüh küpapa küji Devil, Demon, Satan ta küjijira kümühie Vüwa mükünongü sanü ma siesaluokütse sietse kümsüwa küzaveh. noh hala nüh tewaluo, küpakenühnyunü Vüwa noh Saküüwuowa mpa khurü thi ma kütsü mpa saluo ta rhüküsa kenüh,” ti küza. 11Jüsevü Tsuore tü ma jamü nü tewa, thinü halie, rügi zhüleri teru nü ma rükie riewu tewa.

Galilee vünüh Jisu Küüro Sate Teküwa

(Mrk 1.14-15; Luk 4.14-15)

12 # Mat 14.3; Mrk 6.17; Luk 3.19,20. Jümasevü nyuri nüh Johan re küsizhe lovü thsemü ta küsa Jisu nüh küthsüravü Jisu tü Galilee vü tewa. 13#Jhn 2.12. Thi Nazareth jamü taji nü tse juküji nato vü Zebulun thi Naftali masü arüshu vü küpeh Kapernaum vü petewa. 14Jümatü khanavü Isaya setsaküthsüwa nüh küzake küsa juna küsa kenüh wiethuoh.

15 # Isa 9.1,2. Ma nüh küza küsa:

“Jordan rügu nato juküji wuo vü küpeh,

Zebulun azhih thi Naftali azhih Galilee vü rhoküveh Judahmükünyuri;

16thi aküsü azhih thi aküsü sietse vü küpehri vü nga aküwiewa wieketsümüthuoh,” ta küza sa veh.

Aküzo vü küpe nyiri aveh küwie küji küsü ngumüthuoh,

17 # Mat 3.2. Jüma tsotho vünüh Jisu tü ma küsosie sate taji, “Nohri luoveh khaphrü luo, küpakenühnyunü rügi kajipe shenyi kümüthuoh kenüh,” ti küza.

Jisu nüh Ngakütieri Nyi Müzü Küjira

(Mrk 1.16-20; Luk 5.1-11)

18Jütisanü Jisu tü Galilee juküji nato vü tsewa ünü masü jünüri, Simon Pitor ti küsawa thi ma nü Andrew masü aneh vi juküji lovü tie kütse ngura, küpakenühnyunü masü tü ngakütieri küsa kenüh. 19Jüti sakütsevü ma nüh masü vü, “Nohsü eh senyi luo. Jüta thuoüji hi nüh nosü tü anyi küreri küüsanaveh,” ti küza. 20Thinü masü tü masü aneh shiti jamü taji nü ma senyitewa. 21Jüti sataji ma tü jüla nüh tsekewa lehü ünü jününyi küpa: Zebedee atsa Jems thi ma nü Johan masü tü masü apa Zebedee sie ajuhielo vünüh mari aneh küthe la nü ngu, jüti sapeküvehvü ma nüh masü ji; 22thinü masü tü mari juhie thi masü apa shita jamü taji nü ma se nyi tewa.

Jisu nüh Nyiri Sosie, Küza thi Rozakümhiekütsü

(Luk 6.17-19)

23 # Mat 9.35; Mrk 1.39. Jüsevü Jisu tü Galilee azhie aveh vü wa nü künazizhe vünüh nyiri sosie thi Kaji zhüku Zhühthe Kümühiewa nyiri vü küza tsü, thi küsaküna müküzüküzü vü tekütseri thi asazüh vü mümütse nüh tekütseri aveh sakümühietsü. 24Thinü ma kümühiewa nyiri tü Siria azhih aveh vü tholanyuo tewa. Jütiküsavü nyiri aküna müküzüküzü vünüh münomüna tekütseri aveh, thi sietse kümüsü nüh mürü tekütseri aveh, thi sietse kümüsüwa nüh vi küze kümüri aveh thi wiechuküsüri aveh sakümühietsükheh. 25Thinü Galilee vünüh, thi Dekapolis vünüh, thi Jerusalem vünüh thi Judea vünüh, thi Jordan nato wuo vünüh nga ti nyiri shieji küsü ma se nyi zhe tewa.

Currently Selected:

MATHI 4: POCHBSI

Highlight

Copy