MATHI 17

Jisu Tso Saküpa nü Nyiri Küütsa

(Mrk 9.2-13; Luk 9.28-36)

1Jütisanü rülo türo sevü Jisu nüh Pitor thi Jems thi ma nü Johan mari sie taji azhie küpa küzhiho kürügi küsü vü tewa. 2Thi ma nüh mari atüvü nüh ma tso saküpasheke tsü, ma nyia nga arünyi kümüjie wierake, thi ma thsümünyi nga müji huothethe nü aküwie kümüjie tewa. 3Thinü halie, mari atüvü Mosa thi Elijah nga küngu taji Jisu sie jüle. 4Jütiküsavü Pitor nüh Jisu vü, “Vüwa, hiri hala peküveh mühie sheh thuoh, noh kümüshe thuoüji, hi nüh hala nüh aphrü küche sanaveh, küsü thuoüji noh kenüh, thi küsü thuoüji Mosa kenüh, thi küsü thuoüji Elijah kenüh,” ti küza.

5 # Atü 22.2; Krh 2.7; Isa 42.1; Mat 3.17; 12.18; Mrk 1.11; Luk 3.22; Kho 18.15. #2 Pit 1.17,18. Ma azhü phrapeküveh vünüh halie, akülu kümüji küsü nüh mari külüwute tewa, thinü halie, akülu jüla nüh azhüphraru tajinü, “Hama thuoüji eh Tsa, hi nüh küümzetsawa, hi nüh ma vü eh loküzhe pemüthuoh, ma zhü künaluo,” ti küza. 6Thinü ma sehnyiri nüh azhü jüma künara nü mari tü krü sheh ketaji künyiatsuo zetewa. 7Thitü Jisu nüh ru mari pa tajinü, “Mükrütümü nü süraluo,” ti küza. 8Jüti küsavü mari tü tokenüh nono ünü Jisu mpa küchie nüh nyi küsü nga müngu nüh samü. 9Jütisanü mari küzhiho rügi vünüh shele tekütsevü Jisu nüh mari vü, “Anyi Tsawa aküsü vünüh müjiekürhoshele küju nü nohri nüh künguwa vi nyi küsü vü nga müküzatümü üti azhütsümü.

10 # Mal 4.5. Thinü ma sehnyiri nüh ma vü, “Nyuji mokenüh Elijah nüh mürukhuji mümühie ta Wule küsosieri tü phrate lo?” ti küna. 11Thinü Jisu nüh rüle tajinü, “Zhütsa, Elijah ru nü zanyo aveh sakümühie tsüwie naveh,” ti küza. 12#Mat 11.14. Thitü hi nüh nohri vü küza naveh, Elijah tü ru müthuoh, thitü mari nüh ma müthsü nüh samü, thi mari nüh ma vü mowa sangü nüh jüma sawiethuoh, jükümjie anyi Tsawa nga mari ake vünüh münomünawie naveh, ti küza. 13Jüsevü nüh ma sehnyiri tü ma nüh Johan Baptist zhühku mari vü küzaküveh thsüra.

Tsuore nüh Vizanguori Küsü sietekütse Jisu nüh Saküümühie

(Mrk 9.14-29; Luk 9.37-43)

14Jüsevü mari tse nü anyi shiejiwa vü ru ünü, anyi küsü ru Jisu atüvü khotsü nü, 15“Vüwa, noh eh tsa nokümüze tsüjie; ma tü tsolemie sanü münomüna shehshehti, thi ma tü hozakeri wienga anyih lovü tsuotsake tetuthuoh thi hozakeri wienga aju lovü tsuotsake tetüthuoh. 16Thi hi nüh ma sie no sehnyiri vü wa thuoh, thitü mari tü ma samükümühietsüra nüh samü,” ti küza. 17Thinü Jisu nüh rüle taji, “Halie, kütsotü küzüla thi wule mükünyu vünüh tekütse nyiri, hi nüh küthake nohri siepe na lo? Hi nüh küthakele nohri sieküzhike na lo? Ma sieru hi tsüluo,” ti küza. 18Jütisanü Jisu nüh Tsuore kümüsüwa phra, thinü Tsuore kümüsüwa tü ma vünüh shuteru, thi jüla nüh atsawa tü sakümühiejutsü. 19Thinü ma sehnyiri tü küüzhe vünüh ma vü ru nü, “Hiri nü mokenüh zhemüjara nüh samü lo?” ti küna.

20 # Mat 21.21; Mrk 11.23; 1 Kor 13.2. Thinü ma nüh mari vü, küpakenühnyunü nohri kütsotü küzüla kenüh wiethuoh, hi nüh nohri vü küzatoke naveh, nohri kütsotü rhünyuowithari ke wienga küpewietüla, nohri küzhiho hama vü nga, “No kütsele hala nüh tuwuovü tewaluo,” tawie ketünga kütsele tewa wie naveh, thi nohri kenüh zanyoküsü nga müküsara münyie. 21Thitü hari tü kükhuo thi assa müküsanü müsara, ti küza.

Jisu Ma mpa Ma Küsü Zhühku Küphrate

(Mrk 9.30-32; Luk 9.43-45)

22Thinü mari Galilee vü peküveh vünüh Jisu nüh mari vü, “Nyi Tsawa tü re nyira kevü thsemünathuoh. 23Thi mari nüh ma fethemü nü rülo kücheawa nüh rhosüratewa naveh,” ti küza.

Thinü mari tü lorü sheh tewa.

Kükhurüzhe Khrü Kütsü

24 # Tse 30.13; 38.26. Jüti satajinü mari Kapernaum vü ru ünü kükhurüzhe akhrü kükhrühri Pitor vü ru nü, “Nohri Küsosiewa nü kükhurüzhe akhrü khrühkhrühti ünü nyu lo?” ti küna.

25Thinü ma nga, “Ah, khrühkhrühti,” ti küza. Jüti satajinü azhe lovü ru ünü, Jisu nüh apokhu sanü ma jüle taji, “Simon noh nü mowa müshe veh lo? Azhih hala kajiri thawa vünüh akezhie nyutü akhrü vi vehlo? Ma mpa ma tsari vünüh vi veh ünü küpari vünüh vi veh lo?” ti küna. 26Thinü Pitor nüh ma vü, “Küpari vünüh vi veh,” ti rüle tsü ünü Jisu nüh ma vü, “Jüta thuoüji atsari thuoüji mütsüketünga azhü münyiethuohnü ah? 27Jütawie ketünga mari mükülo müsanüh sana küsa kenüh noh ajuküjivü wa nü müluokhu küsoke luo, thi anga kütiezhukhurawa sozhu nü ma po kho nü noh thuoüji noh raka küsü ngura naveh, thinü noh jüma viwa hisü amüthoh sanü mari tsümü luo,” ti küza.

Currently Selected:

MATHI 17: POCHBSI

Highlight

Copy