ATÜTSAR 7
7
Juhküji
1Thinü Vüwa nüh Noah vü, “Hama wuhle vü noh tü eh tü vü nyitsa küm hi nüh ngura thuoh, tinü noh thi noh zhehlori aveh juhie lovü tu kheh luo. 2Asa kümtse aveh awieluo türü, avo thi ma sie küsü küsa; asa mükümtse awieluo küsü, avo thi ma sie küsü küsa; 3Thi amürhü vü prükütse amüwari nga awieluo türü, nyimpa küsü thi nyimza küsü, mari küthseluo azhih anyieh aveh vü küürho sana küsa kenüh, 4küpakenühnyunü rülo türü vünüh hi nüh azhih vü rülo zürake thi rüza zürake atsoh rüküüru naküveh kenüh; jüti sanü hi nüh saküsa rhoküveh zanyo aveh hi nüh azhihwa nyieh vü nüh zoriem naveh,” ti küza. 5Thinü Vüwa nüh azhü momowa Noah vü tsü nüh jümari aveh sakheh.
6Azhih nyiehvü ajuh jiküru vü Noah kürho mahvi tü müzatüro khruo vehthuoh. 7#Mat 24.38; Luk 17.27.Ajuh küjiwa karina küsa kenüh Noah, ma tsa nyimpari, ma vüvüh thi ma tsara vüvüh tü ajuhie lovü tetu. 8Asa kümtseri nga, mükümtseri nga, amüwari nga thi azhih nyieh vü küzhuri aveh, 9künyinyi vünüh, nyimpa nga thi nyimza nga aveh Saküüwuowa nüh azhü kütsü kümjie Noah sie nü juhie lovü tu kheh. 10Rülo türü sevü ajuh küji atsohwa tü azhih vü rüteru.
11 #
2 Pit 3.6. Noah kürho mahvi müzatüro, asa künyiawa, rülo türatürüawa vü rühgu küsheh juwi aveh puzhuteru, thi atülü mürhülehpie aveh sariem. 12Thi azhih vü atsoh rüküturu tü mükütuo nüh rülo zürake thi rüza zürake rü. 13Jüma rülo vü khemti Noah thi ma tsari: Shem, Ham, Jafet, Noah vüvüh thi ma tsa küchera vüvüh, 14mari thi asa papara küthse, ase-ashuh mari mpa mari küthse, azhih vü leleh ta zhukütse papara küthse, amüwa aveh papara küthse thi amüwa küzaküji aveh juhie lovü tetu. 15Asa akürho rütho küsah aveh künyinyi vünüh Noah sie nü juhie lovü tetu. 16Asa nyimpa thi nyimza juhie lovü küturi aveh tü Saküüwuowa nüh azhükütsü müzhe nü tu kheh, thi Vüwa nüh alovü khekem.
17Juhküjiwa tü mükütuo wiethuoh nüh rülo zürake ji, thi ajuh tü küzhiküzhia sa ru nü ajuhiewa küshüh ke, jüti sanü azhih nyieh vü külüwute tewa. 18Ajuh tü küzhiküzhia shehtewa thi azhih nyieh vü müküüzara nüh ji shehtewa, thi ajuhiewa tü ajuh nyieh vü kürhu peh. 19Thi ajuhwa tü azhih nyieh vü khielota sheh nü atülü kükhu vü aküzhi kümsie aveh külüwutewa; 20ajuh tü sheh nü aküzhiho nyieh vü külüwute teküwa apie türamnga shehtewa. 21Jüti sanü asa azhih nyieh vü zhukütse: amüwari nga, ase-ashuhri nga, rezasari nga, ashieji sanü azhih vü prükütseri nga, anyiri aveh; 22thi azhih küüweh vü anyaku vünüh rühtho sah nü akürho pehkütseri aveh sü khehm. 23Azhih nyieh vü rhokütse zanyo aveh: anyiri, asa ri, zhukütse thi amürhü vü prükütse amüwari, Noah thi ajuhie lovü ma siekütseri küchie nüh küpari aveh thuoüji ma nüh zothekhehm. 24Thi ajuh tü azhih nyieh vü rülo müzake nü tünyieke külüwute peh.
Currently Selected:
ATÜTSAR 7: POCHBSI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.