ATÜTSAR 19

Sodom Kükhiemuo

1Münüleh vü rügi zhühle künyi tü Sodom vü ru; jüti küsa vü Lot tü Sodom kheri vü tsiela. Thinü Lot nüh masü küngu vü masü mütu nti wa nü ma nyieh azhih küngie wa nü masü vü. 2“Eh vüwa künyi, hi nüh nohsü vü khuoveh, tinü nohsü siepewa zheh vü tseke luo, thi nohsü süta vü hala peh luo, ra nü nohsü ajih khrüm luo; thi thuotü rüne nüh kümto sühra nü nohsü nüh wanakütse vü waluo,” ti küza. Thinü masü nüh, “Nyu, hisü nü sütavü lehkhuji vünüh atsotho viküze naveh,” ti küza.

3Thitü Lot nüh masü vü wurie, thinü masü nga ma wuovü tseke nü ma zheh lovü tetu; jüti sanü ma nüh masü sie kütsazhu sanü ahzhi müküthse lohse veh nü masü tsü kütsa.

4Thinü masü müjie tewa küzeh atüvü nüh anyuji jüma Sodom anyu nyimpari rünguo kükhruo anyi aveh wa nü asehkhewa küju wa taji Lot zheh mükieshe; 5#Les 19.22-24. Jüti sanü mari tü Lot ji nü, “Süta vü noh vü küru künyi tü khiela pehveh lo? Hiri nüh masü thari nüh thsü na küsa kenüh alievü sie hiri vü shuhru luo,” ti khuo.

6Thinü Lot tü lehpie vünüh mari vü shuwa nü ma sevü nüh amükhie khem taji mari vü, 7“Eh jienüri, hi nüh nohri vü khuoveh nü masü vü khukekümsü müsa tümluo. 8Halie, eh tsa mükürüsa künyi pehveh, tinü hi nüh masü sieshuhru nohri tsü naveh; thi nohri mpa nüh masü vü momowa sa nthe nüh saluo; thitü anyi hamasü vünü zanyoküsü nga müsa tümluo; küpakenühnyunü masü tü eh zhehlo kümnyiepe vü teturumthuoh nü,” ti küza.

9Thitü mari nüh, “Eh lehri mütote tümluo,” ti küza. Jüti sanü mari nüh, “Anyi hamatü anyilieri üta ru, thi masü nüh hiri mowa küsalenüh küza nti la! Hiri nüh masü vü mowa santi nüh jüma nyieh vünüh noh vü sanaveh,” ti küza. Jüti sanü mari tü Lot wurie küchie amükhie vü wa nü amükhie küchiekhuo nti sa. 10Thitü masü nüh masü wuovü Lot shohke nü amükhie kheketewa. 11Jüti küsa vü zhüle künyi nüh amükhie kütuoh vü rünguokükhruo tsieküvehra notha saküüju mütü. Thi mari tü rüzarüpuo nü alehpie phah.

Lot Sodom vünüh Teküwa

12Jüsevü masü nüh Lot vü, “Hala küpari nga pehveh ülo? Noh tümuo, noh tharuo, noh tsavüvühri, nyutü anyuji vü noh jienüri anyujiwa vünüh siezhutewaluo; 13Hisü nüh azhie hama zoriena saküvehthuoh kenüh, küpakenühnyunü anyu hama nyiri phraküümsü tü Vüwa tüvü jisheh kümthuoh kenüh, thi anyu hama zoriem üta Vüwa nüh hisü küüze kenüh,” ti küza.

14Jüti küüza vü Lot tü zhüwa ma tümuo, ma tsavühri zanasaküvehri küza taji, “Sa luo, Azhie hala nüh tsezhutewaluo, küpakenühnyunü Vüwa nüh anyuji hama zoriena küsa vü pehküvehthuoh kenüh,” ti küza. Thitü ma nüh küno vü ma tümuori tü ma nüh külazhie küveh üta sa.

15Jüti küsa vü arüne thohrieru ünü rügizhüle künyi nüh Lot vü wurie taji, “Sühraluo, noh vüvüh thi noh tsa rüla künyi sie nü, anyuji hala kümnomna vünüh müpokah nüh sana küsa kenüh tewaluo,” ti küza. 16#2 Pit 2.7. Thitü Lot nüh küzhike peh; jüti küsa vü rügizhüle künyi nüh ake nüh ma, ma vüvüh thi ma tsa rüla künyi shoh atüvü wa nü anyuji alie vü sam, küpakenühnyunü Vüwa nüh ma küümze kenüh. 17Jüti masü nüh mari alievü shohzhuteru nü masü nüh, “Nohri kürho kenüh te luo, asevü sühle müno tüm nyutü anyuo kütake küsü vü nga mütsatso tümluo; nohri thama küüzothe kenüh küzhiho vü tekewaluo,” ti küza.

18Thinü Lot nüh masü vü, “O nyu, Vüwa, jüta küsa vüh nyu; 19halie, hi nohsü siepe tü nohsü notha vü küütso küsara pehveh, thi eh kürho külole kütsü vünüh hi vü kümhie küsa müke küji hi vü kütsathuoh; thitü hi vü zhürüluo müngukümsü kenüh hi nü thama küzhihori vü zhütewa. 20Halie, anyuji küshenyi hala nüh nguküveh vü zhüte küwa nga wale, jüla teküwa nga wale, hi jüla küüzem luo, jütü azhie kütazü wie, nohsü mpa nga nüh nguveh, hi tü jüla nüh külolera naveh,” ti küza.

21Thinü ma nüh ma vü, “Halie, hi nüh hama küütso nga satsü naveh, noh nüh küzaküveh anyujiwa hi nüh küzoriewa nyu. 22Pre luo, thi wa jüla küthi luo; noh wa jüla müjie küjuküju nü hi tü zanyo küsü nga müsalara,” ti küza. Jükenüh anyuji jüma anyo tü Zoar, kütazü ti jimtü.

Sodom thi Gomorrah Küzorie

23Lot nüh wa Zoar küju vü rünyi shuru azhih wieke müthuoh. 24#Mat 10.15; 11.23,24; Luk 10.12; 17.29; 2 Pit 2.6. Thinü Vüwa nüh atülü vünüh Sodom thi Gomorrah vü Vüwa vünüh anyihlo thi anyih küze; 25Jüti sanü ma nüh anyuji jümasü, anyuokütake aveh, anyuji jü künyi lovü kürho aveh thi azhih vü küsho aveh ti zoriekhemtü. 26#Luk 17.32. Jüti küsa vü Lot vüvüh tü asevü sühle no nü amütsülo khuo küsa küsü jetewa.

27Thinü Abraham tü arüne kümto wa nü ma nüh Vüwa tüvü kütsiepe azhie vü wa; 28Thi ma nüh Sodom thi Gomorrah wuovü thi anyuo kütake azhie aveh vü noküze ünü halie, azhie jüla anyikhu tü anyih tsocha nü küju kümjie küsa nyikhu krüzhu küveh ngura.

29Jüti sanü Saküüwuowa nüh anyuo vü anyuji Lot nüh kürhope zorie küm vü, Saküüwuowa nüh Abraham müsheke nü azanyo zorie küveh azhila vünüh Lot tü küüjozhu nü külolera.

Moabri thi Amonri Rhoshuküru Totso Zhüku

30Jüsevü Lot tü Zoar vünüh tsezhutewa, thi ma tsa rüla künyi sie nü küzhiho vü rhotewa, küpakenühnyunü ma tü Zoar vü kürho kükrü kenüh; jüti sanü ma tü ma tsa rüla künyi sie nü alopie lovü rhotewa. 31Jüti küsa vü ma tsa kükhruovühwa nüh rünguovühwa vü, “Hisü apa tü khruomthuoh, thi azhih hala nyi küsü nga azhih müke kümjie vünüh hisü vü runa küsa münyiethuoh. 32Tinü hisü akhah sa hisü apa küüzhu nü ma vü nyi zeh ünüh, jüti küsa vünüh atsa hisü apa vünüh shura naveh ünüh,” ti küza. 33Jüti sanü masü tü jüma rüza vü masü apa tü akhah zhuküümshe nü ma tsa kükhruovühwa tü ma pa zeku vü tu nü ma pa vü nyi zeh; ma pa tü ma tsa rüla kükhruowa küsie ma vü nyi zeh thi küsie süratewa nüh müthsü.

34Thinü rülo künyiawa, kükhruovühwa nüh rünguovühwa vü, “Halie, küza hi tü eh pa vü nyi zehthuoh; tinü sütavü nga hisü ma saküümshe hü ünüh raluo; thi noh nüh wa nü ma vü nyi zeh luo, jüti sanü hisü apa vünüh atsa shura naveh ünüh,” ti küza. 35Jüti sanü jüma rüza vü nga masü apa saküümshe nü rünguovühwa tü sühra wa nü ma pa vü nyi zeh, thitü ma küsie ru zeh thi küsie süratewa nüh müthsü. 36Jüti küsa vü nüh Lot atsa rüla künyi tü masü apa vünüh atsamoh ra. 37Jüti sanü kükhruovühwa tü nyimpari wuo nü ma nyo Moab ti ji; jükenüh khinyi küju ma nüh Moabra apa saveh. 38Rünguovühwa nga nyimpari wuo, thi ma nyo Benami ti ji, jükenüh khinyi küju nga ma tü Amonra pa saveh.

Currently Selected:

ATÜTSAR 19: POCHBSI

Highlight

Copy