ATÜTSAR 12

Saküüwuowa nüh Abram Küji

1 # Krr 7.3; Ebr 11.8. Jüti küsa vü Vüwa nüh Abram vü, noh nyu vünüh, noh jienü thi noh pa zheh jam nü hi nüh azhie küjo noh küütsa vü waluo. 2Hi nüh noh tü akuoh aküji küsü küüsanaveh, thi hi nüh tsia noh tsü naveh thi noh nyo sa küjitsü naveh, jüüta thuoüji noh tü akütsia künguri sanaveh. 3#Gal 3.8. Thari nüh tsia noh tsü naveh ünüh hi nüh jümari tsiatsü naveh, thi noh kümzüwa hi nüh müzü naveh; thi noh vünüh azhih vü atharuo aveh nga mari mpa nüh kütsiara sanaveh, ti küza.

4Jüsevü Abram tü Vüwa nüh ma vü küüza kümjie tsezhutewa, thi Lot nga ma vü nyitewa. Abram tü Haran vünüh tsezhuküwa vü ma mahvi rürake nü müngathuoh. 5Abram tü ma vüvüh Sarai, ma nü atsa Lot, Haran vünüh zanyo küngura aveh thi anyiri küngura aveh sie nü Kanan vü tsezhutewa. Mari tü Kanan vü rura ünü, 6Abram tü aküzeh tse azhie Shekhem ti küsa Moret nguzhethsoh vü tsekari wa. Jüma tsothovü Kananri tü azhie jüla pehveh. 7#Krr 7.5; Gal 3.16. Thinü Vüwa tü Abram vü ru taji, “Noh tsatori vü hi nüh azhih hama tsü naveh,” ti küza. Jükenüh Abram tü kükhurüpe küsü sanü Vüwa ma vü küruwa vü tsü. 8Jüsevü nüh ma tü kütsele Bethel aho zhieshu wuovü wa nü ma juhthsüzheh khake, Bethel nüh zhietu wuovü thi Ai nüh zhieshu wuovü; thi jüla nüh ma nüh kükhurüpe küsü sa Vüwa tsü nü jüla nüh Vüwa anyo ji. 9Abram tü mükütuo wiethuoh nüh tse nü Negeb wuovü wa.

Abram Egypt vü Küwa

10 # Atü 20.1-18; 26.7-11. Jüti küsa tsotho vü Kanan azhih vü kümkhuojih teru. Kümkhuojihwa küluole küm kenüh Abram tü tsotho pike Egypt vü peh nti tewa. 11Ma tü tse Egypt shenyiru ünü alovü tetuluo nti küsa vü ma nüh ma vüvüh Sarai vü, noh tü atso küzüsheh küsü ta küsa hi nüh thsütohveh; 12tinü Egyptri nüh noh ngu thuoüji, “Hamatü ma vüvüh thuoh” ta sanü hi fethem nü noh nü kürho naveh. 13#Atü 20.2; 26.7. Jükenüh noh tü eh tsevühwa ti küza luo, jüüta thuoüji noh kenüh hi nga mhiera naveh, thi noh rieh nüh eh kürholi nga pehra naveh, ti küza. 14Abram tü Egypt lovü tu ünü Egyptri nüh ma vüvüh tü züsheh küm ngura. 15Faroah kükhu vü küüroh küjiri nüh ma ngu ünü ma küsiake khieloti Faroah vü küza. Jüti sanü Sarai tü sie nü Faroah zheh vü tewa. 16Thi Sarai kenüh ma tü Abram vü kümhieti sanü Faroah nüh nyihzhü, shüvotsa, rawuhvo, siepe pari, siepevühri, rawuh awie thi ut vi ma tsü kheh. 17Thitü Abram vüvüh Sarai kenüh Vüwa nüh Faroah thi ma zhehlori vü kümnomna kükho küji khieloti tsü, 18Jükenüh Faroah nüh Abram ji nü, “Noh tü hatü hi vü mowa samthuoh lo? Hamatü noh vüvüh ta küsa noh tü mokenüh hi vü müküza lo? 19Noh tü mokenüh ma tü noh tsevüh ti küza lo, jüta sanü mokenüh hi tü ma vi nü eh vüvüh küüsa lo? Halie, noh vüvüh hala pehveh ünüh ma sie nü tewaluo,” ti küza. 20Jüti sanü Faroah nüh ma nyiri vü azhütsü nü ma vüvüh thi ma zhi aveh ti küüvi nü küühum.

Currently Selected:

ATÜTSAR 12: POCHBSI

Highlight

Copy