MATTHEW 1

Jishuwui Mi-un

(Lk 3.23-38)

1 # Lk 3.23-38. Hi David kala Abrahamwui Naomayara Jishu Khristawui mi-un lairikna.

2Abrahamna Isaacli, Isaacna Jacobli, Jacobna Judah kala achinā ngarāli pharai. 3#Rut 4.18-22; 1 Thot 2.1-15. Judah preiva̱ Tamarna Perez eina Zerahli, Perezna Hezronli, Hezronna Ramli pharai. 4Ramna Amminadabli, Amminadabna Nashonli, Nahshonna Salmonli pharai. 5Salmon preiva̱ Rahabna Boazli, Boaz preiva̱ Rutna Obedli, Obedna Jesseli pharai.

6Jessena David awungali, Davidwui nao Solomonli Uriahwui preiva̱ sākasāva̱na pharai. 7Solomonna Rehobomli, Rehobomna Abijahli, Abijahna Asali pharai. 8Asana Jehoshaphatli, Jehoshaphatna Joramli, Joramna Uzziahli pharai. 9Uzziahna Jothamli, Jothamna Ahazli, Ahazna Hezekiahli pharai. 10Hezekiahna Manassehli, Manassehna Amonli, Amonna Josiahli pharai. 11#2 Wung 24.14; Jer 27.20. Babylonli khuikhavā atamli Josiahna Jechoniah eina achinā ngarāli pharai.

12Babylonli khuivā kahaiwui thili Jechoniahna Shealtielli, Shealtielna Zerubbabelli pharai. 13Zerubbabelna Abiudli, Abiudna Eliakimli, Eliakimna Azorli pharai. 14Azorna Zodokli, Zodokna Achimli, Achimna Eliudli pharai. 15Eliudna Eleazarli, Eleazarna Matthanli, Mathanna Jacobli pharai. 16Kala Jacobna Messiah kaho Jishuwui ava̱ Maryli kakhuiya Josepli pharai.

17Hithada sāda Abrahamwui eina thuilaga David tāshungda saikora chi mithot tharāda matina, kala Davidwui eina haophoklaga Babylonli khuikhavā tāshungda mithot tharāda matina kala Babylonli khuikhavā eina haophoklaga Messiah kapharā tāshungda mithot tharāda matina.

Jishu Khrista Kapharā

(Lk 2.1-7)

18 # Lk 1.26-38. Jishu Khristali kapharā chi hithada shoka. Ashava̱ Mary Josephli khāmhaisai, kha ani mangakumranglakha Manglā Katharawui pangshap eina ali nao vaingasakhaira kaji theihaowa. 19Agahara Joseph mashun mi ngasāhaoda Maryli makhayak ngasakngaithuda ngathumsāda ali pānghaorada khangarān sai. 20Kha ana hiwui pongli machukta leilakha, yanglu, Prohowui kazingrao akhana awui mangshongli rāhānga, “Davidwui naomayara, Joseph, napreiva̱ Maryli khuikida mangacheealu, kaja ana vaida khalei chi Manglā Katharawui pangshap einana. 21#Lk 2.21; Joh 1.29; Ots 13.23. Ana naomayara akha pharāra, nana awui ming Jishu phokra, kaja ana awui mibingli athumwui moreiwui eina huikhuira.”

22Prohona marānwui khamor eina matui kahai chi ungshung khavai saikora hi rākashokna. 23#Isa 7.14. “Yanglu, mafakathui sha̱nao akhana nao vaida mayarnao akha pharāra, kala awui ming Emmanuel phokra” (hiwui kakhalata Varena ithumli ngasomi) kajina.

24Chiwui thili Josephna kapiwui eina ngakarthuilaga Prohowui kazingrao china ali sāluda hāngkhami athishurda Maryli ngakumhaowa. 25#Lk 2.21. Kha apreiva̱na nao chi mapharāranglakha eina tangda ali phasā mangasomana kala nao chiwui aming Jishu phokmi.

Currently Selected:

MATTHEW 1: TANGBSI

Highlight

Copy