JOHN 11

Lazarus Kathi

1 # Mk 11.1; Lk 10.38. Lazarus kaho Bethanyli kapāna mi akha kazāhaowa. Bethany hi Mary eina achonva̱ Marthawui kha̱na. 2#Joh 12.3; Lk 7.38; Mk 14.3. Mary hi Prohowui pheili nganamkaphā thao neomilaga awui kuisam eina mitkhamiva̱ china. Kazākasā Lazarus hi apāna. 3Chonnaoni hina Jishuli pao chihovāda hānga, “Proho, nawui leikashe ngasota kazāhaira.” 4#Joh 9.3. Jishuna pao chi kashā eina hānga, “He thitchangki kajiwui kazāt maningmana, kha Vareli tekmatei khavaiwui vangna, chieina Varewui Naomayarana tekhamatei samphang khavaiwui apongna.”

5Jishuna Martha eina agatuiva̱ kala apā Lazarusli leishilāka. 6Kha Lazarus kazāda lei kaji shālala Jishuna apam chili khanithang pamsangluihaowa. 7Chiwui thili Jishuna sākhangatha̱bingli “Judeali latungusa” da hānga. 8#Joh 8.59; 10.31. Chieina sākhangatha̱bingna ngahānkai, “Ojā, achonthangcham nali Jihudibingna lunggui eina horkida sai, laga chili latungusa kajila?” 9#Joh 9.4; 12.35; Lk 13.33. Jishuna hānga, “Thangkhali pung tharāda khani maleimala? Mina ngashunshong zatakha phei mangaphokmana, kaja ana apuk-apagawui kahor chi thei. 10Kha ngayāshong zatakha phei ngaphoka, kaja kahor chi awuili maleimana.” 11#Mk 5.39; Ots 7.60. Jishuna hithada hānglui, “Ithumwui ngasota Lazarus pivāhaira, kha ina ali kapiwui eina amathotkhuira.” 12Sākhangatha̱bingna ngahānkai, “Proho, a pivā kahai ngasāsaakha raihaora.” 13Kha Jishuva Lazarus thihaira kaji kahāngna. Athuma khangachā kapi-eili da phaningkasāna. 14Chieina Jishuna meisā eina hānga, “Lazarus thihaira. 15Kha chili I maleikasā chi nathumwui vang phālakhaira, kaja nathum shitsangpai khavaina. Ithum awuili vāusa.” 16#Mat 10.3; Joh 20.24-28. Thomas, Ngashira kaho china awui ngasotnao sākhangatha̱bingli hānga, “Ali ngasoda thirum khavai ithumla ngasovausa.”

Ringkhaluia kala Kharinga Jishu

17Jishuna vākashung tharan Lazarusli chifada matithang kāhairasai. 18Bethany hi Jerusalemwui eina kilometer kathum shakha tai. 19#Job 2.11. Chieina Judeanao kachungkhana Martha eina Maryli apā thikahaiwui vang ringphā ngasak khavai rai. 20Marthana Jishu rārāli kaji kashā eina angarokkhui, kha Maryva shimli pamhaowa. 21Marthana Jishuli hānga, “Proho, na hili leisāsi kaja ipā mathilakmara. 22Kha chithālala arui eina tangda Varena nawui kapopo chi sāmira da ina thei.” 23Jishuna ali hānga, “Napā ringluira.” 24#Dan 12.2; Joh 5.28; Ots 24.15. Marthana “Khanaowa zimiksholi a ringluira kaji ina thei” da ngahānkai. 25#Joh 1.4; 5.26; Phon 1.18. Jishuna ali hānga, “Iya ringkhaluia kala kharingana. Kachikathāna ili shitsangakha thihaisālala ringra; 26#Joh 6.47; 8.51. kala kachikathāna ringda ili shitsangakha mathilakmara. Hi na shitsangla?” 27#Mat 16.16. Ana “Mha, Proho, apuk-apagva̱li rāki kaje Varewui Naomayara Khrista chi nalaka” da ngahānkai.

Jishuna Kachap

28Marthana hi hāngkahaiwui thili agatuiva̱ Maryli ngathumda hokhuilaga hānga, “Ojā hili leili, kala ana nali phāda lei.” 29Maryna chi shakhaleoda shoksamphanga. 30Jishu kha̱lungli marāshungla Marthana asamkaphangpam chili leikasāna. 31Maryli suiphanepta ngasopamkasā Jihudibing china Mary shokkahai theida shurshoka. Athumwui ningli Mary chikhurpamli achapki kajina da phaningsai.

32 # Joh 11.22. Maryna Jishuli vākashung eina khuktizangda hānga, “Proho, na hili leisāsi kaja ipā mathilākmara.” 33Jishuna Mary eina ali shurkazangbingwui kachap chi theida awui ning saza̱nahaowa. 34Kala athumli hānga “Kali chifahailikhala?” “Rāyanglu, Proho,” da athumna hānga. 35#Lk 19.41. Jishuna chapa. 36Chieina Jihudibingna hānga, “Yanglu, ana kayākha ali leishihaokhala?” 37#Joh 9.7. Kha athum kaikhana hānga, “Mik khangapeoli rak-khangasaka ana Lazarus mathi khavai khikha masārarmarala?”

Lazarus Ringkhaung

38 # Mat 27.60; Mk 15.46; Lk 24.2; Joh 20.1. Jishuna ning saza̱nahaoda lungphek eina shungnam kahai chikhur chili vai. 39“Lungphek chi khalangshoklu” da Jishuna kasoi. Thikahaipawui achonva̱ Marthana ngahānkai, “Proho, nganamshihairara, kaja chifada matithanghaira.” 40Jishuna ali hānga, “Nana shitsangakha Varewui tekhamatei theira da ina mahāngmala?” 41#Joh 17.1; Mat 11.25. Athumna lungphek chi khalangshok kahai eina Jishuna kazingram yangkāda hānga, “Iwui Avā, nana ili shākhamiwui vang nali ningshi. 42#Joh 12.30. Nana ili shāmichinga da thei, kha hili khaleibingna nana ili kashirātna kaji shitsang khavai kahāngna.” 43Hi hāngchanghailaga ana panglāk eina vaoda hānga, “Lazarus, shoklu.” 44#Joh 19.40; 20.7. Kathe china aphei, apāng kala amai kachon eina neiphinserhailaga shokrāsai, Jishuna athumli hānga, “Khalāmihailaga ali zatngasaklu.”

Jishuli Shaothat khavai Kasā

(Mat 26.1-5; Mk 14.1-2; Lk 22.1-2)

45Marywuili kharā Jihudi kachungkhana Jishuna kasā chi theida ali shitsanghaowa. 46Kha athumwui ngachaili kaikhana Jishuna sākahai chi Phariseebingli unghāngchithei. 47Chieina Phariseebing eina pāngmon akhokabingna hangva̱naoli ngasoda kaziplaga hānga, “Kathausikhala? Mipa hina machut kachungkha sāda lei. 48Ithumna ali hithada chihohaiakha mi kachiva̱ ali shitsanghaora, kala Rome shorkarna rāda ithumwui khorumshim kala yur hi shimān ngasakhaora!” 49#Mat 26.3. Athumwui ngachaili Caiaphas kaho chikum Pāngmon Kharei sākasapā china hānga, “Nathum kayākha mangma̱haokhala? 50Yur katonga shimānki kajile mibingwui vang mi akha thikhangasak phamei kaji nathum matheimala?” 51Kachangkhat hi awui ning eina kahāng maningmana, kha chikum ana Pāngmon Kharei sāsāhaoda Jihudi yurwui vang Jishuna thimira kaji hāngkhamarānna. 52#Joh 10.16; 17.21. Kala athumwui vangmāng maningla, Varewui mibing chaiyāng eina leikasābingli akha sāda ungkazip ngasakra kajina. 53Chithang eina thuida Jihudi akhavābingna Jishuli shaothat khavai khangarān sāphoka.

54Chiwui vang eina Jishuna Judeali phonglāk eina mazatla, lamhāng ngalemli khalei Ephraim kaho keinung chili sākhangatha̱bingli ngasoda apama.

55 # Mat 26.1; Mk 14.1; Lk 22.1; Joh 13.1. Chitharan Makānkhami phanit nganaiuda mi kachungkha zātkhān masāranglakha pheokhamatharwui kachigat sākhavai, kha̱ kha̱wui eina Jerusalemli kai. 56#Joh 7.11. Athumna Jishuli phāda, khorumshimli kaziprumlaga akha eina akha ngahān ngaroka, “Khi phaningkhala? A zātkhānli marāzangmarala?” 57Jishuli tukkhui khavai kachikathāna a khaleipam theiakha hāngmilu da pāngmon kharei kala akhavābingna hukhum sahairasai.

Currently Selected:

JOHN 11: TANGBSI

Highlight

Copy