HAOKAPHOK 9
9
Varena Noahli Tuingashit Kasā
1 #
Hao 1.28. Varena Noah kala anaomayara ngarāli somida hānga, “Athei matheida mataisanglu, kala okathui chipemlu. 2Okathuiwui sāyur kachiva̱, khamasaiwui vānaoyur kachiva̱, ngaleili ngarikazat yur kachiva̱ kala tara̱lungli khalei khaihyur kachiva̱ nathumli ngacheera; athum saikora nathumwui pāngli horsangmi kahaina. 3Khangatha̱a kharing yur saikora nathumwui kashakazāsera; kala ina nathumli khamateka thingnā-ra̱hā mikahai thāda ot kachiva̱ mihaira. 4#Pāng 7.26,27; 17.10-14; Khal 12.16; 23. Kha asāli ashee zangda mashaipaimana, kaja ashee hiya manglāna. 5Nathumwui manglā kakhuiapāli ina makahatlakla athut khuira; sāyur kachiva̱la miwui manglā kakhuia chili ina athut khuira, kala achinā akhawui mirinwui vang mi akhawui mirin hāngsangra. 6Kachikathāna mi akhali ashee tāngasakakha alila mina ashee tāngasakra, kachiwui vangkhala kaja mi hi Varewui sakrin khuida sākahaina. 7#Hao 1.28. Chieina nathum athei matheida khamataila mataisanglu, mayāsangda apam kachiva̱li okthuilu.”
8Varena Noah kala anaomayara ngarāli hānga, 9“Yanglu, ina nathumli kala naoda rāki kaji ara̱-azāli, 10kala nathumli ngasoda khalei kharing yurbing, kaja vānao, sha̱kei, ramsā marikhongwui eina ngasokashokbing saikorali tuingashit akha kasāna. 11Iwui tuingashit hina, kaja ara asā khavai saikora tara̱ kaphong eina mathiluilakmara kala okathui shimān khavai tara̱ maphongluilakmara.” 12Kala Varena hānga, “I eina nathum kala nathumli ngasoda khalei manglākapai saikorawui alungli iwui tuingashit khudam hi khanaowa mithot eina tangda leira. 13Iwui chāngjingawut muiyā tungli haihaira, hina I eina okathui tuingashitwui khudam sāra. 14Ina okathuili muiyā ngapān khangasak tharān kala muiyālungli chāngjingawut kachithei tharān, 15I eina nathumwui ngachaili, kala manglākapai kachiva̱li iwui tuingashit chi ina phaningungra; kala asā khavai saikorali shimān khavai tara̱ maphongluilakmara. 16Muiyālungli chāngjingawut kashok tharān ina chi yanglaga Vare eina okathuili khalei asā khavaibingwui kharinga yur kachiva̱wui ngachaili katang makhavai tuingashit chi ina phaningungra.” 17Varena Noahli hānga, “I eina okathuili khalei asā khavai ayur saikorawui ngachaili ina tuingashit sākahaiwui khudam china.”
Noah kala Awui Naongarā
18Marikhong eina kashok Noahwui naobing chiya, Shem, Ham, Japheth athum hina. Hamna Canaanli pharai. 19Ashi kathum hi Noahwui nao ngarāna, kala athumwui eina okathui vāshungda mi mayāsanga.
20Lui vākhare mi chi Noahna. Ana drakhā yāmgui akha sākhui; 21kala chiwui atheira̱ manglaga maliphaida awui kachonshimli khamahong eina pivāhaowa. 22Canaanshi avā Hamna avāva̱wui mahonghat kahai chi theilaga kayāngli achinā khanili shokhānga. 23Chieina Shem eina Japhethna kachon akha aniwui yārtuili parlaga sa̱na̱zangda avāva̱wui khamasai phasā chili farormi; ani avāva̱wui shong mayangzangmana kala awui khamahong chi matheimana. 24Noahna mathingkhaung eina ngakarthuida naopaishowui sākahai chi theida hānga, 25“Canaanli khonkashi ngasāranu;
achinā ngarāwui raonaobingwui raonao sāranu.”
26Kala ana hāngluishita,
“Shemli iwui Proho Varena sokhami ngasāranu;
kala Canaanna awui raonao sāranu.
27Varena Japhethli mataisang ngasakra,
kala Shemwui kachonshimli pamranu,
kala Canaanna awui raonao sāranu.”
28Tara̱ kaphongwui thili Noahna zingkum shākathum hangphangā ringvai. 29Chithāda Noahna zingkum shāchiko hangphangā okthuilaga thihaowa.
Currently Selected:
HAOKAPHOK 9: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
