OTSAK 3

Phei Kateka Pokazā akhali Raikhami

1Chitharan seiha kasa atam, pung kachiko katā tharan Peter eina Johnna seihā sākhavai khorumshimli kai. 2Kala kapharāwui eina phei sheikasha̱ mi akha, khorumshimli kharābingwuili pozāpai khavai Khamathā kaho khorumshimwui ngavei chili rāchipampam ji. 3Peter eina Johnna khorumshimli zanguki kaji eina ana pheisānao poi. 4Peter eina Johnna yangtitta hānga, “Inili yanglu.” 5Chieina aniwui eina khikhikha samphanglapai da ningsanglak eina yanga. 6Kha Peterna hānga, “I sinala, lupāla maleimana, kha iwui khalei chi nali khamina, Nazarethwui Jishu Khristawui mingli ina nali ngakarthuida zatlu da kakasona.” 7Chiwui thili awui yāpang singkhuida khāngkhamathot eina ngalāngda awui phei, pheimikra̱ sheikasha̱ chi phāhaowa. 8Ngakarthuida ana ngalonglaga zatung zatvai; kala Vareli masot chikatta khorumshimli anili ngasozanga. 9Ana zatmamānda Vareli masot kachigat chi mi saikorana thei, 10kala khorumshimwui Khamathā Ngavei kaho chiwui pheili pokapama chipāna da theihaoda ali kathada rāshokmamei kahaikhala da mibingna phaninglaga matakhakhaowa.

Peterna khorumshimli Tamkachithei

11Ana Peter eina Johnli ngathānkazat chi theilaga mibingna matakhakhaida Solomonwui khamrei kaho chili yongra ngaroka. 12Chi theida Peterna hānga, “Isrealnaobing, hili khisāda matakhakhaokhala, iniwui pangshap lah khamathā eina ali zatngasak kahai thada khisāda inili matakhak eina yangtitlikhala? 13#Sho 3.6; Isa 52.13. Pilatena chihomihaoga kaji tharan nathumna mamayāmada khalan kahaia awui rao Jishuli, Abraham, Isaac, Jacob, kala ithumwui avāngarābingwui Varena tekmatei ngasakhaira. 14Kha nathumna Kathara kala Khangarongpali khalanhailaga mi shaokathatapāli chihomi khavai poi. 15Kharingawui akhavāli nathumna shaothathaowa, kha Varena kathiwui eina ali ringngasaka, hiwui shākhi ithumna. 16Awui mingli shitkasang china nathumna theida khalei mipa hili pangngasakhaira, kala Jishuwui mangā eina shitkasang china nathum saikorawui mangāli awui phasā pongngasakhaira.

17“Ara, ivānaobing, nathumwui kathānabingna sākahai thada, nathumnala matheimada sāhaira da ina thei. 18Kha Varena awui marānbing saikorawui khamor eina Khristana kachotkachāng phungphalungra da rida hāngkahai chi ana ungshung ngasakhaowa. 19Chiwui vang eina nathumwui morei pheomipai khavai mai ngareiungda ningngateilu. 20Chieina Prohowui eina manglāwui pangshap samphangra kala kapang kahaia Khristala kaho Jishuli nathumwui vang chihorāpaira. 21Achālakhawui eina thuida Varena awui kathara marānbingli shichinlaga hāngngasak kahai saikora chi maungshungranglakha eina tangda a kazingramli leisāphalungra. 22#Khal 18.15-16. Kaja Mosesna hānga, ‘Ili chihokharā thada Proho Varena nachinā marān akha chihorāra. Ana kahāng saikora nathum nganāphalungra. 23#Khal 18.19; Pāng 23.29. Marān chili manganākasang mi kachiva̱li yurwui eina katathaora.’ 24Samuelwui eina thuilaga maron maron eina kharā marān saikoranala atam hiwui tui hānghaisai. 25#Hao 22.18. Nathum marānbing kala Varena tuingashit mikahai navā ngarāwui naongarāna, kaja Abrahamli hithada hānga, ‘Nawui ara̱-azāwui mangā eina okathuili khalei shimkhur saikorali somira.’ 26Varena awui rao chi kapangkhuida, mi kachiva̱na makaphā-makhayāwui eina mai ngareiungda sokhami samphang khavai rimeikapta nathumwuili chihorai.”

Currently Selected:

OTSAK 3: TANGBSI

Highlight

Copy