ZECHARIAH 4
4
Sinayei Meitharl Heirou Olive Trungrap
1Heirouri keikou tlou kallangkril Thangring heiwane hanuikhi hungbine napawa khatne ipnarei fyoukur heinaksine keiya hungfyoukur. 2Heitoubi keinungei heikngai, “Nangne kouya muphaleiyo?” Heirouri keine loumallangbi kyun, “Thilak, sinayei meitharl#4.2: meitharl: meishar dunbaangna. khat, heiyei dourane meishar shirek-kok khat dunkhoubine, heitoubi heiyei doura meishar enitamkhi kyaone, heirou meishar enitam heirouwei meiruikhor khatsol mandokbine, heitoubi heirapya meitharl doura dunbaangbi klei keine muleime.” 3#Kre 11.4. Heitoubi heiyei pongra Olive trung khintamkhi pukbine klei, heirou trung khatne shirek kokyei thya lhangra, heirou khatneri thyoi lhangra katpukthutbine leilei. 4Heitounei ngammei keikou tlou kallangkril Thangring heiwanungei keine heikngai, “Heirapri kouwo, keiyei Upawa?” 5Heirouri keikou tlou kallangkril Thangring heiwane loumallangbi keinungei loushunpi, “Arapri kouwo touri nangne mumakhuiko?” Heirouri keine loushun, “Keiri mumakme, keiyei Upawa.” 6Heirou ane loumallangbi keinungei shun, “Awari Zerubbabel'nungei shunpikur Umpuei tloulhangme, touri, Awari mantrangnikhi nimak, heirou roushingnikhi nimak, heiya Keiyei Lhawaini toukur lhoume,” toubine Thangwan-Shimleiyei Pu Umpune shunlei. 7“Nangya kouwo, O Mane-Mantrang lhungdou? Zerubbabel'yei maibongra nangri phaitlai naksine hoirouwame; heirouri ane bi heirouwei lil'thlung khat, ‘Kringpi kheiyei kringpikhei!,’ toubi ungraochanei houle kalhonne yenthutpirou!”
8Heiyakhi duinara Umpuei tloulhang heiwari keinungei hanuikhi yongbine, 9Ane keinung shun, “Zerubbabel'yei hut rapri Pucheem heiyei cheemmun thulbangurla; heitoubi aiyei hutne Pucheem heiya sabaangbi luikhi-luilhakrou; heirouri Thangwan-Shimleiyei Pu Umpune Keiyari nanungei yenmalhet'pikurme touri nane murouwa.”
10 #
Kre 5.6. Hune put mandicha rapbei tlaini rapya lhou hoipimakko? Kouweiyo toulanungri thimi rapne Zerubbabel'yei hutra holmarkhena enitam shinbi klei heiwaya mubi haraorou.
“Ngamri yarap heiri tlaipangpal karyouni kyongle-kale karwaichabi klei Umpuei mitlung enitam rapme.”
11Heirouri keine loumallangbi anung kngai, “Meitharl mnaak thyoi-thyarei pukbi klei Olive trungrap heiri kouwo?” 12Heirou keine mallangbi anungei hanuikhi loukngai, “Olive ban khintamra sinayei meirui khor khintam mandokbi, yairouwei sinayei shirek mlhathutbi klei heiwari kouwo?”
13Heirouri ane loumallangbi keinungei loushunpi, “Arapri kouweiyo touri nangri mumakhuiko?” Heirouri Keine loushun, “Keiri mumakhuime, keiyei Upawa.”
14Heirouri ane shunpikur, “Arapri tlaipangpal namyerrei Pu Umpuei watlhou tounanungei shirek teipikur thimi napung-khni heirime.”
Currently Selected:
ZECHARIAH 4: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
