ZECHARIAH 10
10
Umpune Judah'le Ephraim'ya Phor Piheirouhui
1“Manthralnung nung royerpina'nungei nani Umpunung buchalak; heiyanungri Umpune lhimnung fyouyerbi ramyei hukyerpirou, heitoubi Ane thimi rapnungei nung rosundayerou, heirou yanung'tlim ramtrung-loutrung shunyerpirou. 2Kouweiyo toulanungri, Teraphim thrailha rapne karsukmak minamnei tlouya yunthutlei, heirou meiruithi thiminekhi mandallei, heitoubi rmong kman thiminikhi klalya loumulei, yaiyei malung damnanungei kyun tloukhi koukhatkhi karsukmaklei; heingammei yari yaorulnak rachek'kurchiya; yari lahwurchiya, ngamri yari yaosilpu yaomakura. 3Yaosilpu rapbei doura Keine meithukni malungkha leiyura; heitoubi tlangpa rapya Keine tanti pirouwa; kouweiyo toulanungri, Thangwan-Shimleiyei Pu Umpune Aiyei yaorul, Judah'yei cheemmaira yongyilthiwurla; heitoubi yayari raal bomra hut-ho mantrang sapuk'naksine hoiyerwurla. 4Judah'rouwei Lilthlung khat thukkeirouhui, heitoubi airouwei khuiluphi msuina chuk'msui khat thukkeirouhui; airouwei raallei malaa-taak thukkeirou; airouwei lhouwa rapkhi thukkeirou; 5heitoubi ya nammane lokpa kartilbi toumani thimirap naksine yaiyei yeekna thimi rapya namsundawurbi, khullam tlairei rahui hangra tatmanuikur heinaksine raal bomra manirouwa. Yane raal kardourillou; ngamri Umpune yaya kalhonpilei; heitoubi sapuk tung raallui rapyakhi yani rikrai pirouwa. 6Heirou Keine Judah'yei cheemmaiya mantrangyerrou; heitoubi Josephbei cheemmai'ya kalpirou; heirou Keine yaya yaibira kallengyerrou; ngamri Keine yaya yamakne horthutkur thimi nimak naksine hoiyerrouwa; kouweiyo toulanungri, Keiri yaiyei Dunpu, Umpume, heirou yaiyei kyunya ninglhakpiroume. 7Heirouri Ephraim'khi lhouwa naksine mantrang thimirap hoirouwa; heirou yaiyei ukningra hakraoni tul malipkur thiminak hoirouwa; heihakya yaiyei chanao rapne mulhakbi, yanikhi nungwairou; heisitoubi Umpuei bomra yaiyei ukning nungkngaini haraorou. 8Keine huttungka shakhungbine yaya lokpani ungmarkumrou; kouweiyo toulanungri, Keine yaya kalthutpiwurla; heirouri yari haallei'naksine yaiyei thimi mshing katchunglhakthurou. 9Heitoubi yayari Keine limdei rapbei hangra chekyerrouwa; heitoubi ram tlatnarakhi yane Keiya ningthutrou, heirou yane yaiyei chanao raple kalhonne paalkhoubi hanui yenkallengthurou. 10Yayari Keine Egypt'rouwei hanui yenrui'mallengpithurou, heitoubi yaya Assyria rouwei ungmallengpithurou; heitoubi Keine yayari Gilead'le Lebanon'yei ramra yenruilhakbi, bi heirouwei thimbongyen yaya Keine leiyerrou. 11Heirouri Ane samadruya heiralbi klah dayerrou, heitoubi samadrurei yuilhouni yaya martlaoyerrou; heirou Nile Kungtangkhi namma taaryerrouwa; heitoubi Assyria'yei tangchabine kanyerchakhou heiwakhi taangsundapirou; heirou Egyptbei thang'allei cheishukhi deekyerrouwa. 12Heirouri Keine yaya Umpuei bomra mantrangyerbi, heitoubi yane Aiyei minra kyongle-kale thulchabine mathangbaangrouwa,” toubi Umpune shunthutpilei.
Currently Selected:
ZECHARIAH 10: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
