MATTHEW 28

Jesu Ringthutkur

(Mk 16.1-10; Lk 24.1-12; Jn 20.1-10)

1 # Lk 8.2; Mt 27.56. Mathrilna tlainiyei hillouri, haptaei lamkri tlainiyei ningshun kul kayoueinung, Mary Magdalene'le kalhonne Mary khatle lhan yeelthirou toubi wakur. 2#Mt 27.51,60. Heirouri tallengne chi'knaei shakrung khoine linglang khngaakkur; heirou Dunpuei Thangring khatne Thangmunrei yongchumbi, lhanpurrei thlungpakya khaangmaletbine, heiyei doura ombine louklei. 3Aiyei shakrungri tliplai nakne alkur, heitoubi aiyei shamb heiwari thurnakne khngou. 4#Mt 27.62-66. Heirou lhanbom chakngaak raallui rapri chitekkurnei ngamrou khi thimi'nakne leikur. 5Heirouri Thangring heine napuiya rapnung loushun, “Nari chimak, nari manyarhatkur Jesu'ya raphame touri keine mulei. 6Ari bi arou makkura; ngamri Aiyei yunkhounakne Ari ringthutdura. Nane wachangbine Aya phneikhouna biya wathilak. 7#Mt 26.32; 28.16; Jn 21.1-23. Arouri nane khrangne shaallaka, heitoubi Aiyei ruishik rapnung asitoubi hungshunpilak, ‘Ari khirouwei ringthutbi, asinung nai maibongra lamkrine Galilee'ra louchawura; heitoubi nane bi'heirou Aya murillou!’ Keine nanungei kouya yunpikhou nane ningthutlak.” 8Heisi tounarouri yane chi'knale hakraoni thimmurbi, lhanbomya lakkurkhoubi khyangni shaalkur, heitoubi channe hungurbi Aiyei ruishik rapnung pao heiwaya hungshunpikur. 9#Jn 20.14-18. Heirouri thilak, tallengne Jesu'ne yaya rorilbine . “Nari malungdam hoiyalo!” toubi yanung loushun. Heisi tounarouri yane chanlhakbine Aihora palbine khrumrou waiyouweinung, 10“Nari chimak, heinung'tlim nane shaallurbine naiyei teinao rapya Galilee'ra wawalo toubi hungshunpilak, heitoubi yane bi heirou Keiya murillou,” toubi Jesu'ne yanung loukyun.

Lhanbom Kngaak Sipai Rapbei Pao Hungtam

11 # Mt 27.62-66. Napuiya rapne lamra wayeinungri, lhanbom chakngaak raalluirap thane shaallurbi Krungkulra klei Suipipu upa rapnung thukkur lhou namyerwaya pao hungtamkur. 12Heirouri Suipipu upa rapne yama upa rapya murilbi, yane tlou sikrilkur, heitoubi raallui rapnungei tuy chungwane rumlanwurbine, 13yaya shunmatukur, “Nane yunrouri, ‘Masanung kane ipbi leiyeinung, Aiyei ruishik rapne wabi khi'lhung heiwari mulouheila.’ 14Heitoubi Rome'yei Krungni pao heiya mayeklanungri, ayari kani manelrouwa, heitoubi nayari klah dayermakrou. Heirou nane heiyei ngamrou koukhi lhawai lahmaka.” 15Heirouri raallui rapne tuy louheibine, yanungei shunmatupikur heinakrimne yane toukur. Heisitounei ngamrou anakei pao awaya Jehudi rapne angtu ramphane yunrilbine leileihui.

Jesu'ne Aiyei Ruishik Rapnung Mu'kyer

(Mk 16.14-18; Lk 24.36-49; Jn 20.19-23; Pao 1.6-8)

16 # 1 Co 15.5; Jn 21.1-23. Ruishik napung chiple khatne yaya louchawalo toubi Jesu'ne shunpikhouna lhungdoura louchakur. 17Heirouri yane Aya muwurbi, khrumkur, heiyanungkhi ya thaneri khalcha'kna leileihui. 18#Mt 11.27; Lk 10.22; Php 2.9; Eph 1.20-22. Heirou Jesu'ne yenkarnakbi yanungei shun, “Thangmun-tlaipang namyerrei mantrangri Keinungei piwurkhoula. 19#Lk 24.47; Pao 1.8. Ngam heineri nane chabine heitoubi lim nammaei ruishik sheemlak; heitoubi yaya Pawa Dunpuei heirou Chanapawaei heirou Lhawai Khyingei minra yui luppilak; 20#Mt 13.39,49; 24.3; 18.20; Pao 18.10. heitoubi Keine nanungei chay pikur namyerwa heiya hilthungnanungei yanungei shunmatupilak; heirou thilak, Keine naya kheenserrou, tlaipang trimbongyen kalhonpirou.”

Currently Selected:

MATTHEW 28: MARIBSI

Highlight

Copy