MALACHI 3
3
1 #
Mt 11.10; Mk 1.2; Lk 1.17,76; 7.27. “Thilak, Keine Keiyei paocha thimi yenmalhetrou, heirou ani Keiyei maibongra lamtlun loumarshikrou; heitoubi naiyei rapha Pu Dunpu heiwane Aiyei Pucheemra loumuthungmakni yongchangeirou; heirou naiyei ukningra malungamne ningchabi klei lhangaiyei tlou mardingpi Pu, Paocha thimi heiwakhi yongeiroume,” toubine Thangwan-Shimleiyei Pu Umpune shunlei.
2 #
Kre 6.17. Heiya hune Aiyei yongrou kyou tlainiya loungaakchangrou? Heirou Ane yongeinung huni Aiyei maibongra loumayungchangrou? Ngamri A heiwari thirsheemna pungshangrei meinaksi, heirou phishu thimiyei sapor naksi hoirou. 3Heirou Ane thirsheem lhangsha naksi ombine, heitoubi Levi'yei chanao rapya lhangshane thirdee kangsouyerbi kulshan heirou sina khyingya shungthutkur heinaksine marthingyerpirou; heitoubi yani Umpuei bomra tharmu chimmei makat putrap urlhakbine wachangeirou. 4Heiyanungri bongei waiyoubi loutoukhou Puwatlhou naksine, Judah'le Jerusalemei thimi rapni Umpunung makat putya malanbine Aya malung pilkyer hoirou.
5“Heirouri Keine nai maibongra mayungbine naya pichar tourou. Lhangaimak thuiur thimi rapya, napuiya napawa chorit naimak thimi rapya, klalni tlou kantomkur thimi rapya, lhou churyerbi klah-manya nammangpikur thimi rapya, trulmei rapya heirou saracha rapya manthapimakni mareknapi thimi rapya, miram-mithril thimi rapya marhotpi thimi rapya heirou Keiya chi-rikraimak thimirap nammaya Keine tloumayungpi khoine yukthrillou” toubine Thangwan-Shimleiyei Pu Umpune shunlei.
UMrui Kanei lhou
6“Kouweiyo toulanungri, Keiri Umpu, Keiri chutnaimakei Pu. Heingamei Jacobei chanaorap nayari himaangyerkhoumak. 7Naiyei nutar-patar rapbei chaanrouwei waiyoubine nari Keiyei chaylam rapya chanthungmakni, heirap rouwei mai khreithutdurbi chawurkhou. Keinungei yenkallengalo, heiyanungri Keine nanungei kallenglhakrou,” toubi Thangwan-Shimleiyei Pu Umpune shunlei. “Heiya nane, ‘Kane koutoubi Neinungei yenkallengrou?’ toubi nane yunlei. 8Thimine Dunpuya muchakur manerouko? Heisiyanungkhi naneri Keirouwei muchabine leilei. Heiya nane yunthulei, ‘Koutoubi kane Neiya muchakuro? Heiwari nani Keinungei Umrui#3.8: Umrui: siruk chipbei siruk khat Dunpuei., heirou malanput makatnara muchalei.’ 9Naidoura manchokur leiyura, ngamri nanekhi heirou naiyei limrap nammanikhi Keiya muchabine leiyura. 10Nane naiyei pibomthuk Umrui heiwari reelmakni(chiremakne) namma chakeira heimarpeilhaklak; heiyanungri Keiyei cheemra chaanung-mainungei leraone heirou marthumni leirou; heisi toubine nane Keiya chaangh tirithilak,” toubi Thangwan-Shimleiyei Pu Umpune shunlei. “Heirou Keine Thangmunei cheemkhar latbine heitoubi nane loudongnanungei changmak ramphane Keine naidoura phor shungsundabi pimakleikou louthilak. 11Heitoubi naya marhotkur rapya Keine rakrou, heiyanungri yani naiyei trunwai rapya kontummakarou heitoubi naiyei yekulrei darkha heikhi rongtlungmakni trulkur toukhi makrou,” toubi Thangwan-Shimleiyei Pu Umpune shunlei. 12“Heirouri lim kantangne nayari likarsui lhangairap toubine ungrouwa, kouweiyo toulanungri, naiyei ram awari nungkngaine bilthimkur ram hoirouwame,” toubine Thangwan-Shimleiyei Pu Umpune shunlei.
13“Nane Keiyari thuithini yunlei,” toubi Umpune shunlei. “Heiya, ‘Kane koutoubi Neiya thuithini kyunno?’ toubi nane yunlei. 14Nane kyun, ‘Dunpuei watlhouya toubine kouya tounarouwo? Heitoubi Aiyei chaytlouya hil-chanthungbi kouya tungcharouwo? Heirou Thangwan-Shimleiyei Pu Umpuei maibongra kaiyei toukur heiri lalwurame toubi kanrelne chapbi shunchanungei bomri kou kleiyo?’ 15Heirou asinung kaiyei kmuri: ‘Tangcha thimi rapkhi nungkngaine paallei, heirou khril lhangaimakne lhoutou thimi rapkhi heisi katduilhakthil nimakne, yane Dunpuya chaangh thibikhi, yari kartleiwurlei.’ ”
16Heirouri Umpuya chi-rikraine cha thimi rapne khatle khat yunkril, ‘Umpune Aya chi-rikraine cha thimirap, heirou Aiyei minya uklum thimi rapbei shuncha-buchakurya ninglhakpilei, heitoubi Aiyei maibongrei klei ningthutnanungei lailikra yaiyei min rapya mayelhakpilei.’ 17Thangwan-Shimleiyei Pu Umpune shunlei, “Yari Keiyei thimirap, Keiyei lhoutouni tlainirouri yari Keiyei khalthutkur lilkhoi thimirap hoirouwa; heirou aiyei pawaya wattoupi chanapawa heiwaya pawani kringpi heinaksine, Keinekhi yayari kringpibi yaya kalpirou. 18Kheen heirouri nani tharmu chim thimile lhangaimak thimi rapbei kartlikril khaithutkur heiwaya mupharou; heitoubi Dunpuya watlhou tou thimile Aya watlhou toumak thimiyei tlakra kartlikrilkhi murouwa.”
Currently Selected:
MALACHI 3: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
