MALACHI 1
1
1Awari Israellei ngamrou Malachi'nung yukpisundakur put khritdei chaytlou.
2 #
Rom 9.13. #Isa 34; 63.1-6; Jer 49.7-22; Ezk 25.12-14; 35; Ams 1.11-12; Oba. “Keiri naya malungshi,” toubi Umpune shunlei. Heiya, “Koutoubi Nangne kaya malungshiyo?” toubi nani louyunlei. “Esau'ri Jacobei teinao nimako? Heiya Keineri Jacob'ya malungshi; 3heiya Esau'yari Keine machinkna, heirou aiyei molshang ramya Keine yultlai takyerwurla, heitoubi aiyei cheem-kei rapyakhi ramthingrei yekshang rapbei yarekna pur hoiyerwurla.” toubi Umpune shunlei. 4Kounakpi Edomni, “Kaya nangbaiwurbikhi, hanui kallengne kane sabangthurou,” toubi yunbinekhi, Umpune atoubi yunlei, “Yane sabangthurou heiya Keine nangbaiwurthurou; heirouri thimi rapne yayari lhangaimak thimi'lim, heirou Umpune klui naimakni manchokur thimi rapme toubine yaya yunnarou.” 5Heirouri naimit rungrungni heiwaya murou, heitoubi nane yunrou, “Umpuei thang'al Israel'rouweikhi duine wa'tlungne allei.”
Suipipu Rapbei Mral
6“Chanapawa khatne pawaya rikrai khrumkna, heirou shok khatne cheempuya chi-rikrailei. Heiyanungri Keine pa khat hoinei, Keiya rikrai khrumknari kourou leilei? Heirou Keine cheempu khat hoinei Keiya chi-rikrairi koura leilei? O Keiyei minya marmokyerkur thimi, Thangwan-Shimlei khintamei Pu Umpune nanungei shunlei. Heiya nani yunlei, ‘Koutoubi kane Neiyei minya marmokyerkuro?’ 7Nane Keiyei khrahpal doura marmokkur makatput rapya makatdurlame, heiya naneri, ‘Koutoubi kane Neiya marmokyerkuro?’ toubine yunlei. ‘Heiwari nane Umpuei khrahpalya manthapimaknei tlou.’ 8Heirou kounakpi nane mitdeo ui-waa rapya makatlanungri, yukningnungri chimrouwa? Kounakpi nane hodeek nimanung msei klei ui-waa rapya makatlanungri, thiyeinung lhangairouwa? Heitoubi heinaksi mitdeo-hodeek, kna msei knai heirou manthirkur ui-waaya nane nairamrei Pu Krungnungei makatbine pilak, heiyanungri naiyei Krungni heirapya lounirouko? Nimanung makatput heiwirou ane naya malungshine yapirouko?” toubine Thangwan-Shimleiyei Pu Umpune shunlei. 9“Heineri Suipi purap, asinungri nane Dunpuya raphalak, heiyanungri Ane kaya kringpikhi kya. Heirou nani heinaksiya makatbi, heirapya naihutrouwei Ane loulhakpimanungri, heiwari naiyei klal nimakka?” toubine Thangwan-Shimleiyei Pu Umpune shunlei. 10“Oh, naihangrei thimi hukhatni Pukhrumna cheemkhar rapya thungpirou leiyanungri, nane Keiyei khrahpal doura koukhi karsuknamak meisharya manshokmakrou. Heiwani Keinungei naidoura malung pilyerkur nimakme toubine Thangwan-Shimleiyei Pu Umpune shunlei touri ‘Keine naihutrei makat putya loulhakpimakrou.’ 11Ngamri kulkung lhangrei waiyoubine kulrel waphani Keiyei min heiwani Lim rapbei hangra tangdui-choudui hoirouwa, heitoubi bi kantangrou Keiyei minra khrim muiknam mroh ikbine, Khyingei makat putya makatrilbine leilei; ngamri Keiyei minri Lim rapbei hangrakhi tangdui-chouduilei,” toubine Thangwan-Shimleiyei Pu Umpune shunlei. 12“Heiya nane Umpuei khrahpal heiwari koukhi nimaklei heirou heiyei dourei makatkur chamai putrap heiwakhi borhyerkur kyame toubi yunbine nani tlou khoine manthapimaklei. 13Heirou nane asitoubikhi kyun, ‘Thilak, awari lah'knayei lhoume!’ toubine naiyei nar thuntakirlei, heitoubi nane Keinung makatnungei toubine minungei muloubine, hut-ho deek rapya, kna msei knai ui-waa rapya makatlei. Heinaksi put rapya nai hutrouwei Keine loulhakpirouko?” toubine Thangwan-Shimleiyei Pu Umpune shunlei. 14Heiya ai'mshaei yaorulla, yaopa lhangai leirerikhi Dunpunung heiwaya makatmakne, lhangaimakya makatbine Aiyei maibongra tlou kantom thimi heiyari manchorou. Ngamri Thangwan-Shimleiyei Pu Umpune shunlei, ‘Keiri yerrouwei tangdui Krungme, Keiyei minri Lim kantangne rikrai'chine khrumrou.’
Currently Selected:
MALACHI 1: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
