LUKE 21

Trulmei Khatpiyei Dunpunung Tuy Makat

(Mt 12.41-44)

1Jesu'ne thinarou laldun thimi rapne Pukhrumna Cheemwaira Dunpunung makatput marpeina bomra yaiyei put makat rapya Ane muthungkur. 2Heirou Ane trulmei khatpinikhi tuypik-mrao khintamcha laklhakurkhi muthungkur. 3Heirouri Ane kyun, “Keine tanghakne nanungei yunpilei touri, kanring trulmeiwine ya deirap nammaei makatkurya duine makatdurla. 4Ngamri ya dei rapbei makatkuri yai dunnarei maleikur rapya makatlei; heiya kanring trulmei heineri aiyei kleicha namyerya Dunpunung makatkur.”

Jesu'ne Pukhrumna Cheem Bairouyounei Ngamrou Yunkhou

(Mt 24.1-2; Mk 13.1-2)

5Heirou ruishik rapne Pukhrumna Cheemmei ngamrou, mansambangkur manklu thlungrap, heirou Dunpunung makatkur namyerwa heiya thilanung kounakei lhangai toubi yunrilnarouri, Jesu'ne kyun, 6#Lk 19.43-44; Mk 14.58; 15.29; Pao 6.14. “Naiyei mitne mubi klei putchei namma, touri- thlungrap heiri dasundawurbi bi khatrou khatchatomkhi karthorilmakne leiwurnei trum hungeirouhui.”

Mrim-knang Heirou Marhotnei Klah-Knang

(Mt 24.3-14; Mk 13.3-13)

7 # Lk 17.20; Pao 1.6. “Marnopi pu,” heirou yane kngai, “Heiri kouninung hoirou youleiyo? Heitoubi lhouthuk heinaksiya hungthukrou waiyouwame toulanungri kounaksi hutlhane loumurouwo?” 8#Lk 17.23; Mk 13.21; 1 Jn 2.18. Jesu'ne loushun, “Kanthrambi loungaklak, heitoubi naya lam tamungyermak. Keingamrou shunmatupi thimi chungne hungthukeirou, heirou yane yunheirou, ‘Keiri Ahakme,’ toubi, heirou ‘Kheen heikhi hungtlungurame,’ toubine yunrou. Heiya nane yai hilla chanthungpimak. 9Heitoubi nane raalpao heirou kngaal'ok thuknei paoya mayekbine ukningra plangurbi chiwurmaklo; lamkrini heinakei paoni hungthukrirou, heiya heinak heiwane tlaipang aya luilhaknei trum yennakkurame touneikhi nimak.” 10#2 Ch 15.6; Isa 19.2. Heitoubi ane daakrakhi yenyunthu, “Krungbom khatle-khat kngaal'ok thukbine raalkhi kardourilheirou, Krungbom khatne krungbom khatdei doura raalkhi daheirou. 11Heirouri beimakne chi'knayei shakrung hoini linglang khngaakhi thukkeirou, chamu-maimumaknei trumkhi heirou bi kantangrou phar-thrai knakhi thukkeirou; heitoubi nungthou lhangrei kngakei hutlhakhi chungne thukkeirou. 12#Pao 25.24; Jn 16.2. #Mt 10.17-21. Lhouthuk namyer heiya hungthukbongnungri naya manbi, heirou klah-knangkhi piyeirouhui: heitoubi naya Pukhrumna Cheemra urlhakbine tloukhi darheirou, heitoubi kulrilla chalphopnungei pithutdurheirou; heirou krung rapbei heirou raallui pu rapbei maibongra, keiyei minnung'tlim urthutdeirou. 13#Php 1.12. Kheen heirou nane Lhangaiyei Pao-laa rapya shunthutnanungei tlakcha hoirou. 14#Lk 12.11-12. Nane kousitoubi tlou mallangserouwo toubine ningcha'kna leimaknung asinung waiyoubi nai lhawai lahmakne leiyalo, 15ngamri Keine nai yunnungei tlou rapya heitoubi roukhi mukheine leiyerpirou, heirouri naiyei karhoukril thimi rapne naya thuithine marhotkur manemakrou, heitoubi nane tlou mallangnarou klalkhi dayerchangmarou. 16#Lk 12.52-53. Nayari nai pui-pa rapne, teinaowa rapne, nai cheemkhur-rokhur rapne, heirou nai palui rapne pithutdurheirou; heitoubi na thayari hatdurnungkhi pithutdeirou. 17#Mt 10.22; Jn 15.18-25. Keiyei ngamrou thimi napung kantangne naya machinrou. 18#Lk 12.7; Mt 10.30; Pao 27.34; 1 Sa 14.45. Heiyanungkhi nai lurei shampum khatchayakhi trulyerbi maangyermarou. 19#Mt 10.22; Kre 2.7. Kanthrambi mayungalo, heitoulanungri nai chaanrou kalpi pharou.”

Jesu'ne Jerusalem Mangrou Younei Ngamrou Kyun

(Mt 24.15-21; Mk 13.14-19)

20 # Lk 19.41-44; 23.28-31; 17.31. “Heirou Jerusalem Khukarthil heiwaya Raallui rapne kuiphopkurya nane mulanungri, heirou Jerusalem mangnanungei trum heiri hungtlungurame toubi loumulaka. 21Heiyanungri Judeaei ramra klei thimi rapne lhungdoura trukbaanglakasu; heitoubi khukarthil rillei klei thimi rapri trukthutdurlaka, heitoubi purei klei thimi rapri khukarthil rilra wachangmakasu. 22Ngamri tlainirap heiri ‘Klah-knangei tantiyei tlainime.’ Heitoubi Khyingei Lailikrei mayelhakkurkhou nam heiya chimne tlungyernanungeime. 23#Lk 23.29. Heiyei tlaini heirouri, ulleiyo, kouya yunserouwo! Nao urbi klei napuiya rapnungri, heirou naodou pombi klei thimi rapnungri kounakei lah'kna hoirouwo! Tlaipang doura klah-knang hoirouwa heitoubi thimi rapbei doura Dunpuei malungkha yongtlungbi beimakne mrim nangrouwa. 24#Rom 11.25; Isa 63.18; Dan 8.13; Kre 11.2. Heitoubi thimi thari raalshonra hirouwa, heitoubi thimi deiyari ram deira kul chalphopnanungei manlouheirou; heirou lim deiyei thimi rapne Jerusalem Khukarthil heiwari yaichaan luibongyen tatphopbi leirouwa.”

Thimiyei Chanapawaei Yongrou Kyou

(Mt 24.29-31; Mk 13.24-27)

25 # Kre 6.12-13; Isa 13.10; Jol 2.10; Zep 1.15. “Heirouri kinni'rakhi, tangla'rakhi, heirou sorwa'rakhi kngakei hutlhane mutdeirou. Heitoubi tlaipangei khokul-khobung karyoune klah-knangne thim'rouwa, heirouri Samadru tangei yuilhou heine thimi rapya chi'kna hungthukyerrou. 26Thimi rapne tlaipang arou thukkur ari kouwo toubi loumunarouri chitekkurbi kanelrouwa, ngamri tlaipang-nungthou khintamei kanchekchanei mantrang heikhi makkurouwa. 27#Lk 9.27; Dan 7.13-14. Heirouri Thimiyei Chanapawa heine ramei doura mantrangle Aiyei thang'alle albine kyong yane loumupharou. 28#Lk 18.7-8. Heitoubi anaksi heiya hungthuknung heirou nane loumngalthilak, ngamri naya ralthutpinanungei tlaini heiri yennakkura.”

Khyudhei Trung Khatrei Marno'kna

(Mt 24.32-35; Mk 13.28-31)

29Heirouri Jesu'ne yanung anakei yailim tlou khat yunpikur: “Khyudhei trungle heirou heenglim namyeryakhi yukhalthilak, 30Yai heengbo heine heimchitrou waiyouwanungri, manthral hungthukame toubi nane loukmu. 31Heinakrimne, heinak namyerwa heiri hungthukheirou, heirouri Dunpuei Krungram heiri yongrou waiyouwame toubi nane loumulaka. 32#Lk 9.27. Keine nanung yunlei, touri, heinak namyerwa heiri angtuei tlaipang chaanyei thimirap namma hiwurchibongnung hungthukroume touri nane ningmulaka. 33#Lk 16.17. Thangwan heirou Tlaipang nammakhi mangeirou, heiya Keiyei tloulhang rapri maangkhoumarou.”

Karngeinungei Bom

34 # Lk 12.45; Mk 4.19; 1 Th 5.6-7. “Nane kanthrambi loungaklak. Heitoubi naitam khul'lhun thuknara nungrui kaei hakrao, chaa'malip-mai'malipbine heirou tlaipangei lhouyatom kardonbi leiwurmak, nimanungri loumuthungmakne tallengne naya chaangra mankurnakei tlaini khat hungeirou. 35Kouweiyo toulanungri heinaksi heiri tlaipangpal bi kantangra klei thimirap namyernung hungthukeirou. 36#Mk 13.33. Nane karyom, mukheine loukarngeilak, heine hungthukrou kyou lhouthuk namrouei nane kartleikur manenanungei nane kheenserou buchalak, heirou Thimiyei Chanapawaei maibongra mayungchangnung marshiklak.” 37#Lk 19.47; Mk 11.19. Jesu'ne tlainiser Pukhrumna Cheemra marnopibi leikur, heirou yenrawaikur heirouri Ane Olive lhungdoura kabine masanung yarekkur. 38Heitoubi ningshunser thimi rapne Pukhrumna cheemra wachangbine Aiyei marnopi rapya ningkur.

Currently Selected:

LUKE 21: MARIBSI

Highlight

Copy