LUKE 16

Malungamnamak Lhoushilla

1Jesu'ne Aiyei ruishik rapnung shun, “Bongnung chaan khatrou lalthumdun napawa napung-khatdei cheemra lhousilla khat leikhou. Heirouri Cheempu heiwanung tlou tlungura touri aiyei lhousilla heiwane aiyei cheemrei lalthum heiya lhou khoine thikulmakurame toubi ane mayekkur, 2heitounei ngamrou ane aiyei lhousilla heiwaya ungloubi kyun, ‘Neingamrou keiyei mayekri kousi touneiyo? Neihutra klei keiyei cheemrei lalthum namyerwaei mshing kansherthutbi keihutra pilhaklaka, ngamri neiyari keine lhousilla hoiyermarou.’ 3Heisi tounarouri lhousilla shok heiwane aitam ningchakur, ‘Keiyei cheempuni keiyari lhou urbi klei bom'rouwei hulthutnanungei waiyoukuralei. Heiyanung keiri koutouserou? Keiri thlei toubine lhouchurbi pangcha-pangmaikhi manemakrou, heitoubi minungei bucha-bu'kmaikhi rikraiknayei lhou. 4Heiyanungri arouri keine kouya touserouwo touri ningmuwurla! Heini keiya lhousillaei bom'rouwei hulthutdurbikhi, hillou keiyari yai cheemra wachangyernung keine palui yensaheirou dalei.’ 5Heisitoubi ane aiyei cheempurei tuy tulbi klei thimirap namyerwaya ungmarkumkur. Heitoubi ane lamkrini ya napung khatnung kngai, ‘Keiyei cheempurei neiyei pukloukheiri kounak chunglei?’ 6‘Olive shirek tungka macha khatme’ toubi ane loukyun. ‘Neinungei mayethutkur heiri arisoh, heirou nangne ombi heiyei doura tungka somngatom yukmayelhaklak’ toubi lhousilla heiwane heishun. 7Heirou ane napung khatnung hanui kngai, ‘Heitoubi nangne kounak chungne keiyei cheempuei lalya tullei?’ ‘Keiyei pukloukheiri gehu phikao macha khatme,’ toubi ane loukyun. ‘Neinungei mayethutri arime, nangne aya aei doura gehu phikao somshritom yukmayelaka,’ toubi lhousilla heine shunpikur. 8#1 Th 5.5; Eph 5.8; Lk 20.34; Jn 12.36. Heirouri cheempu heiwane ukning hyingmak lhousilla shok heiwane rou'kheiyei toukur lhou heirou chaytloune shunkur; ngamri angtuei tlaipang thimi rapri kwaarrei thimi rapya duine yaiyai tungchana lhoubomra rou'kheine churlei.”

9 # Lk 12.33; 18.22. Heirou Jesu'ne heisi yenkyun, “Arou Keiyei nanungei kyunri: Nane tlaipangei lalthum, sina-lapale palui hoinanung raphabine, heirou lalthum heine luiwurhillouri, nane klui naimakna khiya ramra yongdongrou tomngeiya. 10#Mt 25.21; Lk 19.17. Lhoubom mandicha khatrou malungamkna khoine leiyanungri, a heiri lhoubom tangnaroukhi malungamkna hoirou; hukhatne lhoubom mandicha heirou ukning hyingmakne lhou churlanungri, a heiri lhoubom tangnaroukhi ukning hyingne lhouchur manemakrou. 11Heinakrimne nane tlaipangei lalthumya shinyeiroukhi malungamna kleini toumanungri, nane koutoubi chimmei lalthumya shinchangrou? 12Heirou nane miyei lalthumya shinyeinung malungamkna hoimanungri, hune nanungei lalthumya pilhakrouwo? 13#Mt 6.24. Shok napung khatne Pu khintamei lhouchur manemak; ngamri ane Pu khatya malungshiyeinung ane pu khatyari machinrou; nimanung ane pu khatdei lhoura krakni churyeinung pu khatyari yorcharou. Nangne Dunpuyale tlaipangei lalthumya khintamrekya watlhou touri manemakrou.”

Jesuei Yunthutkhou Mu'kna Tlourap

(Mt 11.12-13; 5.31-32; Mk 10.11-12)

14Heitoubi lhangai karsa thimi rapne heinaksi kyunya mayeknarou, yane Jesu'ya beimakne khremnakur, ngamri yari tuy khramtang thimirap. 15#1 Sa 16.7; Par 21.2; Pao 1.24; Lk 10.29. Heirou Jesu'ne yanung kyun, “Nariso, tlaipang thimi rapbei mit thinaratom chim hoikni, heiya Dunpune naiyei ukning muchilei. Ngamri tlaipang thimi rapbei thinara mit'thim heiri Dunpuei thinarari koukhi nimaklei.” 16#Mt 11.12-13. “Mosesnung piwurkhou Tloulam raple heirou Thimkhui rapbei mayethutkhou'rap heiri Yui luppi John'yei chaan bilnungtomni; heirouwei waiyoubi Dunpuei Krungramei ngamrou Lhangai paolaa rapya shunthutdurkhou, heibilroukhi thimi rapne ai'aiyei kningyatom toubine chanchakhou. 17#Mt 5.17-18; Lk 21.33. Heiya tloulamra mayewurkhou tloulhang mtumcha khat maangkuryari tlaipang, Thangmunram maangkurni dui klai.” 18#Mt 5.31-32; 19.9; Mk 10.11-12; 1 Co 7.10-11. “Hu napawa napung khatne aiyei nutirya karkhaiwurbi, heirou nukhu khat dunthulanungri, a heiri minu klal napawa; heitoubi aiyei shaltirya karkhaiwurbi klei napuiya klou napawa heikhi minu klal thimi hoirou.”

Dun Napawa Khatle Lazarus

19“Bongnung chaan khatrou dun napawa khatne, tlainiserou manklu phirulthirl kanshambine, heitoubi malehni kanyerchakhou. 20#Jn 11.1-44; 12.1,9. Heirou heiyei kheenrou Lazarus toubi ung, beimakne kanring napawa khatkhi louleikhou: a heiri sharung namma raichi paatnei mseini thimkur heirou aya dun napawaei cheemra karyomne heiruikhei. 21Ngamri dun napawaei cheemra lukturng daakra dalhakur hutchun rapya heirou chamalei rapya khulchanekur. Heiya'duine uini rampha wachangbi aiyei patnara leekmthaikurkhi klei. 22#Jn 13.23. Kanring napawa heiri hiyura, heirou Thangring rapne aya Thangmunra Abrahamei pongra omyernanung ruilouheila. Dun napawa heikhi hiwurbi heirou aya khi ruiwurla; 23heirouri a heiri khiya ramra, klah-mrimni doubi, heirou aiyei mitne katmangalbi thiyeinung, heirou ane tlatnarouwei Abrahamya, heitoubi aiyei pongra Lazaruskhi ombine klei ane katmukur. 24Heirouri ane ungraobine kyun, ‘Pawa, Abraham! Keiya bei kringpilaklo, heitoubi Lazarusya yenyilsundabine aiyei hutmayung msurchara yuitah chircha tipsundayerbi, heirou keiyei maleira beicha toudokyerpilaklo, ngamri keiri meikhur rilra beimak klah-mrimni leiyurame!’ 25#Lk 6.24. Heiya Abrahamne loumallang, ‘Ningmulako, Keichawa, nangri tlaipang dourei chaanrou lalthum lhangaiyathil dunkhoula, heiyei kheenrouri Lazarusri beimakne mrim knangne leiwurkhoula; heiya asinung ari bi arou nungkngaine leiyura, heirou nangri klah-mrimni meithlan doura leilaka. 26Heirou namyer heiya duine, bi heirou nangle kai tlakra beimak khyuk khur khatkhi leileihui, ngam heine ailhangrei thimi rapne ralnibikhi ralchangmakrou, heitoubi heilhangrei thimi rapnekhi aiyei lhangra heiralkur manemakrou.’ 27Dun napawa heine kyun, ‘Heiyanungri, Pawa Abraham, keine neinungei bucha'kniri, Lazarus heiso kai pawaei leinara bei yenyilpilaklo, 28heirou keiyei teinaorap napung phanga leithungleihui. Heini ane yai leinara chabine bei shunmatupilaksu, heiyanungri ya heirapri klah-mrim nangna bi arou wachangmakasu.’ 29#Jn 5.45-47; Pao 15.21; Lk 4.17. Abrahamne anung loushun, ‘Yanungei shunpirouri Moses'le Thimkhui rapkhi leileihui; heirou neiyei teinao rapne yai kyunya mayeklaksu.’ 30#Lk 3.8; 19.9. Dun napawa heine loushun, ‘heitomni romak, Pawa Abraham! Heiya hiwurnarei hukhatne katringthutbi yanungei shunpilanungri, yane yaiyei borh lhourouwei ukning hungrou.’ 31Heiya Abraham'ne loushun, ‘Yane Moses'le Thimkhui rapbei kyunya ninglhakpimanungri, ya heirapri kouniroukhi, hukhatne hiwurnarei katringthutbi shunpilanungkhi ukning hungchangmakrou.’ ”

Currently Selected:

LUKE 16: MARIBSI

Highlight

Copy