JOHN 20

Lhanding

(Mt 28.1-8; Mk 16.1-8; Lk 24.1-12)

1Hapta khatdei lamkri tlainiyei ningshun manma, meh'luplapbei kheenrou Mary Magdalene heine lhanbomra wabi thiyeinung, lhan'pingna tinglhing thlungpak heiri khaanglaatdurbi louklei ane wamukur. 2Heisi tounarouri ane chankallengurbi Simon Peter'le, heirou Jesu'ne beimak malungshikhou ruishikpa yakhuntanung atoubi hungshunpikur, “Upawaya yane lhanrouwei louheibi bi kourou khouwurlawo mumakkurame!” 3Heitounarouri Peter'le ruishik khatpane lhanranung wakur. 4Yakhuntane channi wanarouri, ruishik khatpari Peterya tladuine louchawurbi lhanbira ane loutlungrikur. 5Heirou ane sikhuplhakbi lhanrilla yukthinarou, khi'lhung lhomna phaikhring punsheltom yukmu, heiya rillari ane yuchangmak. 6Heirou aihilla Simon Peter'ne wa'tlungbi, pura taankhoumakne lhanrilla yuchangbi thinarouri, phaikhringei punshel'le, 7heirou Jesuei lu yumkhalna phimtumchakhi dabine louklei heiya ane yumukur. Phimtumcha heiri phaikhringei punshelkou pulne lokpa loukleiri nimak, heiya phimtum heichatom laichane khyophopbine louklei. 8Heirouri lhanbira lamkrine loutlungkur ruishik heiwakhi rilla yuchangkur; heitoubi anekhi heiya muwurbi uklumkur. 9#Lk 24.26,46. (Yari kheen heiramphanekhi Khyingei lailikra ‘A heiri khirouwei ringthutthurou’ toubi yunkhou heiya ningthutmakhui.) 10Heitoubi ruishik rapne cheemra yenkallengkur.

Jesu'ne Mary Magdalene'nung Muyerkur

(Mt 28.9-10; Mk 16.9-11)

11Mary'ne lhan'paalra chapbine mayungkur. Heirou ane chapmlomne lhanrilla sikhuplhakbi yukthinarouri, 12#Lk 24.4; Mt 28.5; Mk 16.5. lhan rilla khngouwei shambya mansambi Thangring khintamne, Jesuei khi'lhung phneikhouna bira, khatne luthakra heirou khatpane hoshung lhangra ombine louklei ane mukur. 13#Jn 20.2. “Puiyawi, nangri kouya tounei chapkurrawo?” toubi yane anung loukngai. Heirou ane loumallang, “Yane keiyei Upawaya louheilame, heitoubi bi koutamrou khouwurpilawo, keiri mumakurame!” 14#Mt 28.9; Jn 21.4. Heirouri ane loukallekbi thinarouri Jesu'ne aiyei pongra mayungbi heiklei ane mukur; heiya mayungbi klei heiri Jesume touri ane mumakur. 15“Puiyawi, nangri koutounei chapbi leikurrawo?” toubi Jesu'ne anung heikngai, “Nangri huya raphawo?” Aneri napawa heiri yekul kngaak thimisame toubi ningchakur, heitounei ane anungei loushun, “Keiteiyo, kounakpi nangne aya louheilanungri, bi koutamrou khouwurlawo, keinungei bei shunpilaklo, heirou Keine wabi aya walouweise.” 16Jesu'ne anung loushun, “Mary!” Heirouri ane loukallekthibi anung Hebrew tloune kyun, “Rabboni!”#20.16: Rabboni: Marnopi Pu. 17#Jn 20.27; Mt 28.10; Jn 7.33. Heirou Jesu'ne anung shun, “Keiyari thirpimakhuilo, ngamri Keiri Pawaei leinara kat'kallengmakhui. Heiya nangne hungbi Keiyei teinao rapnung, ‘Keine Keiyei Pawa, heirou yaiyeikhi Pa, Keiyeikhi Dunpu heirou yaikhi Dunpu hoibi klei Anungei katkallengeirou,’ toubi hungshunpilaka.” 18#Lk 24.10,23. Heitounei Mary Magdalene heine shaallurbi heirou ane Upawaya mukur heile Jesu'ne anung yunpikur nammaya ruishik rapnung hungshunpikur.

Jesu'ne Aiyei Ruishik Rapnung Mu'kyer

(Mt 28.16-20; Mk 16.14-18; Lk 24.36-49)

19Haptayei lamkri tlainiyei rawainung, ruishik rapne cheemkhar hang rotphopbi rilwaira kartilbi leikhou, ngamri yane Jehudi rapbei lhou'urpu upa rapya chikur. Heirouri Jesu'ne yaihangra wachangbi wamayungkur. Heitoubi ane, “Nanungei kying hoiniyasu,” toubi wakyun. 20Ane heisi yunbine hillouri yanungei aiyei hutmairap heirou aiyei onhimya mutpikur. Heirouri ruishik rapne Upawaya muwurnarou yane kalthi nungwaikur. 21#Jn 17.18; Mt 28.19. Jesu'ne hanuikhi yanungei, “Nanungei kying hoiniyasu. Pawane Keiya yenmalhetpikur heinakne naya malhetlei,” toubi yunthu. 22#Pao 2.4,33. Heirouri ane yaidoura nil shophangpibi kyun, “Lhawai Khying phalakasu. 23#Mt 16.19; 18.18. Hukounak khatdei borhya nane kukpilanungri, yanung borh heiri kukpiwurla; heitoubi hukounak khatdei borhya nane kukpimanungri, yanung borh heiri kukpimakhui.”

Jesu'le Thomas

24 # Jn 11.16. Ruishik chiple khniyei hangrei Thomas(ayari Kanfirwa toubikhi ungkna) heiwari Jesu'ne wachangei kalnungri yaihangra louyaomak. 25Heitounei ruishik dei rapne anungei pao louyunpikur, “Kane Upawaya muwurlame!” Heirouri Thomasni yanung loukyun, “Keiri keimitne Aiyei hutmairei thirmsui pur rapya mubi heirou Aiyei onhimrei chei'khmah heiwaya keiyei hut'myungni ronthibongyenri tekkhi malungammaklei.” 26Heirouri hapta khatdei hillou ruishik rapne hanuikhi cheemwaira cheemkhar thungphopbi kartilkur, heirouri yaihangra Thomaskhi kyao. Heitoubi cheemkhar heiri hang rotphopbi klei, heiya Jesu'ne yaihangra wamayungbi yanung kyun, “Naidoura kying hoiniyasu.” 27#Lk 24.40. Heitoubi Thomasnung shun, “Neiyei hutmayungni Keiyei hutmaira thunthilak; heitoubi neihut lamthutbi Keiyei onhimra thunthilaklo. Neiyei ukningrei khalchabi klei heiya lakurkhoubi malungamlaka!” 28Heitounei Thomasni loumallang, “Keiyei Upawa, Keiyei Dunpu.” 29#1 Pt 1.8. Heirou Jesu'ne anungei shun, “Nangne Keiya neimitne muwurnei ngamrou uklumko? Heiyanungri Keiya mitne mumakne uklum thimirap heiri kounakne nungkngai hoirou!”

Lailik Aya Mayewurnei Ngam

30 # Jn 21.25. Jesu'ne Aiyei ruishik rapbei maibongra Lailik arou mayelhakhoumak kngakkei lhourap deikhi chungwane touwurkhou. 31#Jn 3.15. Heiya arou mayelhakur nane mubi, Jesuri Messiah heirou Dunpuei Chanapawame toubi uklumheirou, heitoubi naiyei uklum heiyei ngamne nane khringei chaanya pharou.

Currently Selected:

JOHN 20: MARIBSI

Highlight

Copy