KANTHOUNA 34

Hamor'yei Chanapawa Shechem'ne Leah'yei Chanapuiya Dinah'ya Daimarekbi Touchopkur

1Heirou Leah'ni Jacob'nungei pukkhou cha'napuiya Dinah'ni ram heiyei nangaka palui rapya murilnanungei heikuithutkur. 2Heirouri Hivia cheemkhurrei Hamoryei chanapawa, ram heiyei Krungcha Shechem'ne Dinah'ya loumubi, heirou ani ruithutloubini ippibi daimarekkur, heitoubi aya touchopkur. 3Heirou ani Jacobei cha'napuiya Dinah'ya aiyei solungra kalthi maduni, nangaka heiwiya beimakni malungshikur, heitounei ani nangaka heiwinung tlou marnimni yunbini manelkur. 4Heitoubi Shechem'ne aiyei pa Hamor'ya shunbi, “Nangaka heiwiya keiyei nu'nungei loubaangpilaklo.” toubi buchakur. 5Heirouri Jacob'ne aiyei chawi Dinah'ya Shechem'ne ippiwurbi touchopburlame tounei paoya mayekurla; kheen heinungri aiyei chanapawa rapri ramhangra halsilbi klei; heiya Jacob'neri aiyei chanaorap yenkallengbongyen koukhi yunmakni mul'louklei. 6Heirou Shechem'yei pa Hamor'ne Jacobei leinara pao mallengrou toubi wachangura. 7Heirouri Jacobei chanapawa rapne tlouthuk heiya loumayekbi, heirou yani ramhangrei yenkallengkur; heitoubi tlouthuk heiyei ngamrou aiyei trah-pa rapri meithukni malungkhakur, ngamri Shechem'ne Jacobei chawiya ippiwurbi touchopkur heiri Israel rapya manthamakni chorit naiyermaknei toukur lhou khat.

8Heiya Hamor'ne yanungei rochabini kyun, “Keicha napawa Shechem'ne aiyei ukningra neichawi heiyatom ningchabini leiyurame, heineri keiyei shuncha'kniri, aya keicha napawaei nunungei bei pipilaklo toubine buchakurame. 9Heitoubi nale kale nulou-chalourilnei lhoukhi tourillase, heirou nai'chanapuiya rapkhi kanungei pilak, heitoubi kai'chanapuiya rapkhi nainungei loulak. 10Heisitoubi nale kale leimalnawase: heirou nani kairam arou leibini, truncha trunmailak, heitoubi lalkhi holbini naiyei lalthumkhi mallonglak.” 11Heirouri Shechem'ne Dinahyei pawale, aiyei trahpa rapnungkhi asitoubi yunbi, “Keiya nani bei kringpilak, heirou nai kyun namma heiri keine yamakri toumakrou. 12Nu mankhi heirou hutthulkhi naiyei pilaklo touwei'mkhei keine pinanungei tourou, heirou nai shun'mkheikhi keine pirouwa; heiya keiyei bucha'kniyo touri naiyei chawiya keiyei nunungei pipilaklo,” toubine buchakur.

13Heiya Jacobei chanapawa rapne Shechemle aiyei pa Hamornung rou'kyaoni mallangbi yanungei loushunkur, kouweiyo toulanungri Shechem'ne yai charwi Dinah'ya touchopburnei ngammei. 14Heitoubi yani Shechemyei thimi rapnung loushun, “Murdanmak thimi khatnungei kai charwiya shal dunnanungei kani pichangmakrou; heihakya toulanungri kanungei beimakni rikraiknayei lhou. 15Heiya nai kyunya kani yalhakchangrou khatri: Kounakpi nakhi kanaksi touri, naiyei napawa kantangni sermur danbi kanaksini hoiyanungri; 16kanikhi kaiyei chanapuiya rapya nanungei louyerrou, heirou kanikhi naiyei chanapuiya rapya kaiyei nunungei loupirou; heitoubi kani nai ramra leibini, nale kale Lim khatnakni paalmalnarou. 17Heiya nani kaiyei kyunya ninglhakmakni, naiyei sermur un danmakanungri, kani kaiyei chawiya ruilouthubi shaallouwa.”

18Heirouri yai'kyun tlou rapya mayeknarouri Hamorle aiyei chanapawa Shechem'nungeiri beimakni pillura. 19Heirouri kartlanga heinikhi kannganmakni yai kyun heinakrimni aiyei sermur un dankur; ngamri ani Jacobei chanapuiya heiwiya beimakni malungshikur; heisitoubi a heiri aiyei pawaei chanao rapbei hangra yerrouwei malungamkna cha khat hoikur. 20Heitoubi Hamor'ne aiyei chanapawa Shechem yasini yaiyei khukarthillei palshungra wathukbi, heirou khukarthilla klei thimi rapnung khulpaobi shunkur; 21“Thimirap heiri kaihangra kyingni leikalhon yaroume; ngam heineri yani kairam arou leibini, truncha-trunmaibi, heirou lal holbini paallakasu. Thilak, ram heiri beimakni maryalei, heineri yai leinanungeikhi rorou; heitoubi yaiyei chanapuiya rapya kaiyei nunungei louwase, heirou kaiyei chanapuiya rapkhi yai nunungei louyerrase. 22Heiya thimirap heini kaihangra Lim khatnakni kakou kantlangni leichok yarouri tloutlak khat leilei: Yari sermur undan thimirap, heineri kakhi yanakni napawa kantangni sermur un danrou dawa. 23Heitoubi yaiyei halrul-yaorulrap, ui-waa rapkhi heirou yaiyei klei lalthumrap nammakhi kaiyei hoimakrouwa? Heineri yai kyunyatom kani yapiyase, heiyanungri yani kakou leimalkna yaroume.” 24Heisitoubi khukarthil heirouwei palshungra wathukbi klei khulpam nammani Hamor'le aiyei chanapawa Shechemyei kyunya yawurchila; heitoubi khukarthil heirouwei palshungra wathukkur napawa napung kantangni yaiyei sermur un dankur.

25Heirou tlaini khyumnirouri asitoubi hungthukkura, touri yani mur dannei kna doubi leiyeinungri Jacobei chanapawa napung'khni, Dinahyei trahpa rapne yaiyei raalshon khatsol shinloubi, koukhatkhi chinaimakni khukarthilla wachangbini, napawarap nammaya hatdurpila. 26Heisitoubi yani Hamor'le aiyei chanapawa Shechem'yakhi raalshon'ne shaat'hatdurbi, heirou yaiyei charwi Dinah'ya Shechem'yei cheemrei ruithutloubi bi heirouwei shaalkur. 27Heirou Jacobei chanapawa rapne khilhung rapya karhoibi wachangurbi, khukarthil heikhi yaiyei charwiya touchopburnei khlanglhak khoini waiknaini kontumwurkhou. 28Heitoubi yani yaiyei yao rapkhi, halrul rapkhi, heirou yaiyei gadha rapkhi, heirou khukarthil heirouwei louklei lalthumrap nammakhi, heirou lourei klei trunwairap nammakhi waiknaini markumloukur. 29Heirou yaiyei lalthum rapkhi, heirou nuwa-chawarap, naoshun-naopar rapkhi nammaya raal manlouheikur; heitoubi yai cheemrei louklei putcheirap nammakhi konmaangurkhou. 30Heitounei ngamrou Jacob'ne Simeon'le Lev yakhuntaya shun, “Nane keiyari Canaania'le Perizzia heirou thimirap nammaei maibongra karhayernei lhouya touwurbi keiya mine machinrouwa; heirou keiyeiri thimikhi chungmaklei, heirou yani khatle khat yakantlangrilbi keidoura raal dalanungri, yani keiya hatdurbi, keile keiyei bommaiyari maangyerrouwa.” 31Heisi tounarouri yani loumallangkur, “Kaiyei charwiya koumankhi naimakni, chorit naimak napuiya'nakni touchopbi louheikur heiri kani yarouko?”

Currently Selected:

KANTHOUNA 34: MARIBSI

Highlight

Copy