KANTHOUNA 30

Jacobei Chanaorap

1Heirouri Rachelni a heiri Jacob'nungei cha pommakurame toubi ningmuwurla, heirou ani aiyei teiwiya horthikur; heirou Jacob'nung shun, “Keiyakhi cha pomyerlaklo, nimanungri keiri hirouwa.” 2Heirou Jacobne Rachelya malungkhani shunkur, “Keiya cha pomyermakei shullam omtingbi klei Dunpuya keine khlangsil kyako?” 3Heirouri ani loukyun, “Keiyei shok-napuiya Bilhah leileime, aiyei leinara changalo, heiyanungri keinungei tlim ani cha pompirou, heitoubi aiyei ngamni keikhi cha pompharoume.” 4Heisitoubi Rachelni aiyei shok-napuiya Bilhah'ya Jacob'nungei nu hoinanungei pilhakkur; heirouri Jacobne aiyei leinara polhakbi rkhum phitho tilrilkur. 5Heirouri Bilhah nao urbi Jacob'nungei chanapawa khat pukkur. 6Heirou Rachelni kyun, “Dunpune keiya pichar toupiwurla; heirou keihoukhi Ane mayekpiwurla; heitoubi keinungei chanapawa khat piwurla,” heingammei ani nao heiyei min Dan toubi thulpikur. 7Heirou Rachelyei shok-napuiya Bilhahni hanuikhi nao urthubi, Jacob'nung chanapawa khintam tlung pukthula. 8Heirouri Rachelni kyun, “Keiyei mane urthutbini keiyei upawi kasini karshulnarou, asinungri keine manewurla,” heitounei ani nao heiyei min Naphtali toubi thulpikur.

9Heirou Leahni aheiri chapuk khammurame toubi ningmukur heirouri, ani Zilpah, aiyei shok-napuiya heiya ungbini Jacobei nu khoini pilhakurthu. 10Heirouri Leahyei shok-napuiya Zilpahni Jacob'nung chanapawa khat pukkur. 11Heirouri Leahni kyun, “Likarsui lhangailei,” heingammei ani nao heiyei min Gad#30.11: Likarsui lhangai. toubine thulpikur. 12Heitoubi Leah'yei shok-napuiya Zilpahni Jacob'nung khintam'tlung chanapawa khatkhi pukkur. 13Heirouri Leahni kyun, “Keiri nungwaiyura, kouweiyo toulanungri napuiya rapne keiyari likarsui lhangaiwi toubine ungrouwame.” Heingamei ani nao heiyei min Asher#30.13: Nungkngai. toubine thulpikur.

14Heirou Reuben'ne trunwai khumlumnang phailoura chanarouri, ani loutlaira Mandrake louh trungrap karthangbi, heirapya ani yenlaheibi aiyei puiwi Leah'nung hungmlanpikur. Heirouri Rachelni loumuwurbi Leah'nung shun, “Neiyei cha'napawaei yenlakhei mandrake louh trungrap heiri keinungkhi thacha khaipilaklo.” 15Heirouri Leahni Rachelnung loushun, “Nangni keiyei shalwaya neitam tomnungei kallouheibi leiphobpikur heiri klaiyei tloume toubi klouko? Heitoubi hanuikhi keicha napawaei mandrake heikhi louthurouwa touneiko?” Heirou Rachelni loukyun, “Heiyanungri neiyei chanapawaei mandrake heinung'tlim neishalwa heiri angtu masari nangkou iplakasu.” 16Heirou Jacobne rawainung phailourei yenkallengeinung, Leahni wathukbini lamra aya loumurilbini loushun, “Angtu masari nangri keiyei leinara hungchangbi shuimakni keikou ipmak yamakrou; ngamri keine neiyari keiyei chawayei mandrake'yei man khoini waiwurla.” Heisitoubi ani heiniyei masanung akou ipmalnakur. 17Heirou Dunpune Leahyei shunchakurya ninglhakpibi, heirou ani nao urwurthu, heitoubi Jacobnungei chanapawa phangatam tlung khatkhi pukthu. 18Heirouri Leahni kyun, “Dunpune keinungei wainei klah-man piwurla, ngamri keine keiyei shok-napuiya heiwiya keiyei shalnungei pilhakkur;” heitounei Leahni ayari min Issachar toubine thulpikur. 19Heirouri Leahni hanuikhi nao urthubi, heitoubi Jacobnung chanapawa thruktam tlung khatkhi pukpithu. 20Heirouri Leahni kyun, “Dunpune keinungei putmanthun lhangaini piwurla; asinungri keishalne keiya rikrai khrumpirouwa, ngamri keine anungei chanapawa napung'thruk pukpiwurla.” Heingammei Leahni aiyei chanapawa heiyei min Zebulun toubine thulpikur. 21Heirou hillouri ani chanapuiya khat pukbi, heirou aiyei min Dinah toubi thulpikur. 22Heirou Dunpune Rachelya ningthutpikur, heirou Dunpune aiyei buchakur heiya ninglhakpikur, heitoubi aiyei shullam laatpikur. 23Heirouri ani nao urbi, heitoubi chanapawa khat pukkur; heirouri ani kyun, “Dunpune keiyei rikraiya louthutdurpila.” 24Heingamei ani nao heiyei min Joseph#30.24: Ane tinsilpi. toubi thulpikur, heitoubi ani kyun, “Umpune keinungei chanapawa khatkhi pukyerthurou.”

25Heirouri asitoubi hungthukkura, Rachel'ni Joseph'ya pukkur heirouri, Jacob'ne Laban'nung shun, “Keiya shaalyerpilaklo, heiyanungri keine keiya pukna ram, keiyei cheemra kallengroume. 26Keiyei nu rapkhi heirou keiyei chanao rapkhi pithutlaka, yanung'tlim keine neinungei nu trunwurla, heitoubi keiya shaalyerpilaka; ngamri keine neinungei watlhou churtrungpikur heiri nangnikhi muchila.” 27Heirouri Laban'ne anungei loushun, “Keine neinungei bucha'kniri, nangni yapiyanungri shaalmakni beikhi yukleithurilak, kouweiyo toulanungri, neingamrou Umpune keiyakhi phor piwurlame touri Pu'tlou'rei keine muwurla.” 28Heirou ani hanuikhi shun, “Neiyei churtrungkhounei klah-manri koukouya loukniyo, yunlaka, heihakya keine neinungei pirouwa.” 29Heirouri Jacob'ne anungei loushun, “Keine neinungei koutoubi watlhou toupikurro touri nangnikhi kmu heiriya, heirou neiyei ui-waa'rap heirou yaorul-halrul rapne keihutra leikhouweinung kousibil pung-shaankuro toukhi nangni muwurla. 30Ngamri keine arou wabongnungri neiyei yaorul-halrulrap heiri thacha louklei; heirou asinungri yaorul-halrulrap heiri kounakbil chungduiyura; heineri keiyei wachangkur kheenrouwei waiyoubini Umpune neiya phor piwurla; heiya asinungri keine keiyei Bommainungei touri kou'kaallou pangbi sheembangserouwo?” 31Heirouri Laban'ne loukyun, “Heiyanungri keine neinungei kouya piserou?” Heirou Jacobne loushun, “Nangni keinungei deiri koukhi pinung nimakme, heiya keiyei kyun heiyatom nangni yapilanungri, keine hanui kallengni neiyei yaorul rapya silpithuweise. 32Angtu keine neiyei yaorul rapbei hangra karwaichabini, yaorul hangrei kyao phutkapbi bungrang yaorap, heirou khmong yao raple kalhonni tlang rapbei hangreikhi trik'trak bungrang heirou khmongdup kyao nammaya khalthutdurbi, heitoubi heirouwei mleithung thacha heiri keinungei silnei klah-man hoiyerpilaklo. 33Heineri neiyei ukning khyingni keinungei khaithutpikur yaosilnei klahman yao rapya thirou wayei kaalnung, keiyei tharmu chim-chimmaktou heiri nangni mupharou. Heirou kounakpi heirapbei hangra phutkapmak, bungrangmak, heirou mongmak yaorap heirou tlangrap louyaowanungri, keiya mucha thimime toubine theibaangpikur kya.” 34Heirou Laban'ne loukyun, “Heiyanungri lhangaiya, neiyei kyun heinakrimni heisi hoilakasu.” 35Heisitoubi heiyei tlainihakrou Laban'ne tlangparap heirou tlangpui rapkhi triktrak bungrang raple, khngou mankhanni phutkap rapyakhi, heirou yaopa khmongdup rapyakhi waiknaini khalthutbi aiyei chanapawa rapnungei silnakur. 36Heitoubi ani heirapya aiyei leina ramle Jacobei leina bi'le tlaini khyumnimal lamchana ramra tlatni toukarkhaibi khoukur; heitoubi mleithungkur Labanyei yaorul'rap heiri Jacobne hanui silthungthu.

37Heirouri Jacobne heengban khringrap touri khungma heeng, khaosir heeng, heirou khriheeng ban rapya kuideekbi, heitoubi heirapya heengkhor thiklaiwurbini rillei heengpum khngou rapya muyerkur. 38Heitoubi ani khor thiklaikur khngou heengpumrap heiri yaorul rapbei yuimongrou hungchangna lamtlairale, heirou heenglhing maibongrakhi pheini lamtatbi khoupikur. Heirou yao raple tlang rapne yui mongrou hungchangeinung heeng rapya kaihoibi puikhingkhi kyao, heitoubi cha urkanthoukhi yaowura. 39Heirou yaorul raple, tlangrul raprei pui rapne cha urkanthoubi, yaoshunrap, tlangshun rapkhi bungrang, phutkap heirou khmongdup rapkhi chungwani pukkur. 40Heisitoubi Jacobne yaoshun rapya hulkarkhaibi, heirou bungrangmak heirou mongmak yao rapya Labanyei yaoshangra hul'lhakkur; heitoubi aiyei yao rapyari laini humallongbi, Labanyei yaorul rapkouri pulni khouchokmakkur. 41Heirouri asitoubi hungthukkura, sharung lhangai touri cha urlum yaopui rapne cha uryeinang, Jacobne heengkhor thiklaiwurbi khngou heengpumrap heiri yao rapne yui hungmongna heenglhing maibongra loulamkhoukur. 42Heiya sharung lhangaimak touri cha urlum phamak yaopui rapbei maibongrari heengrap heiri lamkhoupimak; yarap heiri Labanyei yaorap, heirou sharung lhangai yaorap heiri Jacobei hoikur. 43Heisitoubi Jacobri nungkhat'nuinuiyei lalthum katduibi beimakni dun thimi khat hoiyura; heirou ui-waa, halrul, yaorul kounakhi, heirou shok napuiyakhi heirou shok napawa kounakhi, heirou utrap heirou gadha rapkhi chungwani dunkur.

Currently Selected:

KANTHOUNA 30: MARIBSI

Highlight

Copy