KANTHOUNA 29

Jacob'ne Laban'yei Cheemra Wa'tlungkur

1Heirou Jacob'ne aiyei lamtla chayouwura, heitoubi ani kulkung lhangei thimi rapbei ramra wa'tlungkur. 2Heirouri ani ramthrilbi thiyei kaalnung, ramhangra yuiphum khatcha louklei heiwaya ani mulhakkur, heirouri thilak, yuiphum heiyei pongra yao rulrap khyumtam thukni neikarhukbi louklei ani mukur, ngamri yuiphum heirouwei yui shukthutbini yaorul rapya pimongrilkur. Heirou yuiphum heiwari thlungpak tang khatpani pingkhalbini khou. 3Heirou yaorul rapya bi heitamrou yui pimongnungei hulmartilbini, yaosil thimi rapne yuiphummei khur pingkna thlungpakya khaanglaatbini, heitoubi yaorul rapnungei yui pimongkril; heitoubi thlungpak heiwari yuiphum purra hanui nampingbini khalkhouthu.

4Heirou Jacobne yanungei loukngai, “Keitei-keinaorap, nari koulhangreiyo?” Heirouri yani mallangbi loukyun, “Kari Haranreime.” 5Heirou ani yanungei hanui loungailhakthu, “Heiyanungri, nani Nahoryei chanapawa Labanya shak muko?” Heirouri yani loukyun, “Moi, kani ayari shak kmume.” 6Heirouri ani yanungei kngai, “Heiyanungri ari kousi-kousi paalleiyo?” Heirou yani loumallang, “Ari koukhi knasa makni nungkngaini paalleime; heirou thilak, aiyei cha nangakawi, Rachelkhi aiyei yaorul rapya heihulheibini walei.” 7Heirouri ani yanung shun, “Asinungri manrenleihui, yaorul rapya hulmarkumnei kheenri watleihui; heirou nani yaorul rapya yui pimongbini, hanuikhi namh pishairilaklo.” 8Heirouri yani loukyun, “Yaorul rapya kani hulmallongbi, heitoubi yuiphumrei thlungpakya khaanglaatbini yui pimongmanungri yamakme.”

9Heirou ani yakou heisi tlou kallangrilbi louleiyeinung, Rachel'ne aiyei pawaei yaorul rapya heihulheibini wa'tlungura; ngamri ani yaorulrap heiwaya silbini klei. 10Heirouri asitoubine thukkura, touri Jacob'ne aiyei puiwiyei trah Laban'yei cha nangaka Rachel'yale, aiyei puiwiyei trah Laban'yei yaorul rapya loumukur heirouri Jacobne loupokarsilkur, heitoubi yuiphum pingkhalna thlungpakya khaangthutpikur, heitoubi aiyei puiwiyei trah Laban'yei yaorul rapya yui pimongkur. 11Heirouri Jacobne Rachelya machuppikur, heitoubi aiyei hou chouni ungraobi chapkur. 12Heirou Jacobne Rachelnung yunthutpikur, “Keiri nai pawaei yume, heirou neiyei neeni Rebecahyei chanapawame.” Heisi tounarouri Rachelne cheemra chanwurbi aiyei pawanung pao hungtamkur.

13Heirouri asitoubi thukkura, touri Laban'ne aiyei charwiyei chanapawa Jacobei ngamrou paolhangai mayeknarouri, ani Jacobya murilnanungei louchanrokur; heitoubi aya rkolphopbi machuppikur, heitoubi Jacobya aicheemra yenruilhakkur. Heirouri ani Laban'nung heiyei warirap namma yunpikur. 14Heirou Laban'ne anungei kyun, “Tanghakpani nangri keiyei thruei-thru, heirou keiyei heeyei heeme.” Heisitoubi ani Labanyei cheemra tangla tlunkhatmal leiwurkhou.

Jacobne Rachel'le Leahnung'tlim Laban'nungei Watlhou Toupikur

15Heirou Laban'ne Jacobnung shun, “Nangri keiyei yu khat hoiyabikhi neiyei klahman koukhi naimakni keinungei watlhou churpirouko? Heineri yunlak, neiyei watlhou tounei klahmanri kounak hoiyerserou?” 16Kheen heikaallouri Laban'yei cha nangaka napung'khni klei; heirou cha nangaka upawiyei minri Leah toubi ung, heirou cha'nangaka dongwiyei minri Rachel toubi ung. 17Heirou Leahri mit beicha shul touri muidai, heiya Rachelri shakrungkhi-shapaalkhi lhangai-karyuikna, heirou thiyeinungkhi malungshi'kna. 18Jacobneri Rachelya beimakni malungshikhou, heitounei ngamrou ani kyun, “Neiyei cha dongwi Rachel'nungtlim keine kum'eni neinungei watlhou paangeise.” 19Heitounei Laban'ne loukyun, “Keine ayari kartlanga deinungei pikurnung tlimri neinungei leiyerni lhangairoume toubine ningchalei; heineri nangri keipongra leilaka.” 20Heisitoubi Jacob'ne Rachel'nungtlim kum'eni watlhou churkur; heiya ani Rachel'ya malungshinei ngamrou, anungeiri kum'eni heiri lepchanakni khalkur.

21Heirouri Jacobne Laban'nung shun, “Keinungei keiyei nuya pilaka, ngamri keiyei nu trunnei kumri tlungura; heineri keine aya lourouwa.” 22Heisi tounarouri Laban'ne bi heirou klei thimirap namyerwaya ungmartilbi chak khaangpikur. 23Heirouri asitoubi hungthukkura, heiniyei rawainung Laban'ne aiyei chawi Leah'ya heiruilhakkur, heitoubi ani Jacob'nung nu khoini pikur, heirouri Jacob'ne aya rkhum tilrilkur. 24(Heirou Laban'ne aiyei shok-napuiya Zilpah'ya aiyei chawi Leah'yei shok khoini pithungkur.) 25Heirouri ningshunyei kheenrou Jacob'ne aiyei nu heiri Leahme toubi muwurla, heirouri ani Laban'nung shun, “Neiyei keinungei toupikur awaya kouwo? Keine Rachel'nungtlim neiyei watlhou toukur nimakko? Koutounei nangni keiya manthapimako?” 26Heirouri Laban'ne loukyun, “Kai ramrari upawine cheem paalbongnung naowine paalkri touri younamak. 27Neiyei nulounei knei tounei tangla tlunpul'khat awaya luilanungri, nangni hanuikhi kum'eni keinungei watlhou churlanungri, keine Rachel'yakhi neinungei pirou.” 28Heirouri Jacob'ne aiyei nu lounei knei luilhakbi, hanuikhi kum'eni khatkhi nu trunbi Laban'ne Rachel'yakhi aiyei nu khoini piwurthu. 29(Heitoubi Laban'ne aiyei shok-napuiya Bilhah'ya aiyei chawi Rachel'yei shok khoini manthunpikur.) 30Heirouri Jacob'ne Rachel'yei leinara changbini rkhum tilrilkur, heirou ani Leah'nung tlimri Rachel'ya duini malungshikur; heitounei ngamrou ani Laban'nung kum'eni khatkhi watlhou churkhouthu.

Jacobnung Pukkur Chanaorap

31Heirou Leahyari malungshipi'makurame tou heiri Umpune mukur heirouri, Ane Leah'ya cha pomnei shullam laatpiwurla; heiya Rachel'yari khungyerkur. 32Heirouri Leahni nao urbi, chanapawa khat pukkurla; heirou Leahni aiyei min Reuben toubi thulpikur; ngamri ani kyun, “Umpune tanghakpani keiyei klah-mrimkurya mupiwurla, ngam heineri asinungri keishalne keiyakhi malungshipirouwa.” 33Heirouri ani hanuikhi nao urthubi, heitoubi chanapawa khatkhi pukkur. Heirouri ani kyun, “Ngamri keiyari machinknane toupikurme touri Umpune mayekpibi, heirou Ane keinungei chanapawa awakhi piwurthula;” heirou ani nao heiyei min Simeon toubi thulpikur. 34Heirou ani hanuikhi nao urthubi, heirou chanapawa khatkhi pukkurthula; heirou ani kyun, “Arouri keishalne keikou leimalnanirouwa, ngamri keine anungei chanapawa napung'khyum pukpiwurla,” heingammei aiyei chawaei min Lev toubine thulpikur. 35Heirou ani hanuikhi nao urwurthu, heitoubi chanapawa khat pukthu; heirouri ani kyun, “Asinungri keine Umpuya mathangrouwa.” Heingammei ani aiyei min Judah toubine thulpikur; heirouri Leah chapuk'khammura.

Currently Selected:

KANTHOUNA 29: MARIBSI

Highlight

Copy