KANTHOUNA 28

Jacobya Malhetkur

1Heirouri Isaac'ne Jacob'ya ungloubini anungei phor pikur, heitoubi chaytlouni aya shun, “Nangni Canaanrei cha'nangaka rapya neiyei nunungei loulhakmakrou da. 2Kanthoulaka, heitoubi Padan-aram'ra neipuiyei pa, nai patar Bethuelyei cheemra walaka; heitoubi bi heirouwei neipuiyei trah, neiyei puwa Labanyei cha nangaka rapbei hangrouwei khatya nangni neiyei nunungei loulaka. 3Heirou Toumane Dunpune neiya phor pirou, heirou neiya lung punyerbini, yu-cha shunyerrou, heitoubi neirouwei thimichung kulyomkhi thukyerrou.” 4Heitoubi Mane-mantrang Dunpune Abraham'nung piwurkhou phor heiri neinungkhi heirou neiyei yu-charap'nungkhi pirou; heiyanungri Dunpune Abraham'nung piwurkhouna ram, heirou nangni ramtaangbi yenpaalheina ram heiwaya nangni hungkalheirouhui. 5Heisitoubi Isaac'ne Jacob'ya malhetdurbi, heirou ani Padan-aramra, Syria touri Aramea napawa Bethuel'yei chanapawa Laban, heirou Jacob'le Esau'wei puiwi Rebecah'yei trahwaei cheemra wa'tlungkur.

Esau'ne Napuiya Laikhatya Aiyei Nunungei Klou

6Isaacne Jacobya phor pibini, Padan-aram'ra heimalhetdurbi nu lounungei shunmatuyeinung Esaunekhi muthungkur. Heirou ani Jacob'ya phor piyeinung asitoubi chay pibi kyun, “Nangni Canaanrei cha nangaka rapya neiyei nunungei loumakrou da.” 7Heisitoubi Jacobne apui-apaei shunya chanthungbi, heirou Padan-aram'ra wakur. 8Heisitoubi Esau'nekhi Canaan'rei cha nangaka loukur heiri aiyei pawanikhi pammaklei touri muwurla. 9Heirouri Esaune Ishmael'nung wabi, heirou Abrahamei chanapawa Ishmael'yei chanapuiya, Nebajoth'yei charwi Mah-alath'ya, aiyei nudeikhi leina douroukhi nunungei hanui loulhakkur.

10Heirou Jacobne Beer-sheba lakurkhoubi Haran'ranung wakur. 11Heitoubi ani bi khatrou wa'tlungeinung Kinni yenchipburnei ngamrou, heiniyei masanungri bi heitamrou yarekkur. Heirou ani bi heitamrou louklei thlungtum khat khaanglouheibi aiyei lu'khaangna hoinabini iplhakkur. 12Heirouri ani rmong khat loukman, heirou thilak, aiyei rmong heiri: Bi heitamrou thlei'rouweini nungthou katokni khlaak khat matungbaangbi khoukur, heitoubi Dunpuei Thangring rapne heiyei doura yongchumle-kakale toubi karwaichakur heiya loukmu. 13Heirouri thilak, Umpune heiyei doura mayungbini, heirou ani shun, “Keiri neiyei pawa Abrahamei Umpu, heirou Isaacyei Dunpume. Asiyei neiyei kat'ipna bi heiri Keine neinungeikhi heirou neiyei yu-cha rapnungeikhi pirou'kyou ram heihakrime. 14Heirou neiyei yu-cha rapri thleirei rahuinakni chungrouwa; heitoubi nangni kulrel lhangroueini kulkung wa'tlungphani, heirou khalu lhang'roueini khate wa'tlungni karyourouwa; heirou neiyei ngamni heirou neiyei yu-cha rapbei ngamni tlaipangpallei cheemmai-bommai nammani phor phaheirou. 15Heirou thilak, Keine neiya kalhonpirou, heitoubi neiyei chana bi kantangrou neiya ngaaksilpirou; heirou neiyari ram arouwei hanui ruimallengpithurou; ngamri Keine neinungei shunpikurya tlungyerbongyenri Keine neiya tekkhi horkhoumakrou.” 16Heirouri Jacobne ipnarei kanthoubi ani kyun, “Umpuri tanghakpani bi arou leileime touri keine ningmukhoumak.” 17Heirouri ani chiwurbi asitoubi kyun, “Bi awari Dunpuya kounakei chi-rikrai'knayei bom khat hoilei, heirou bi ahakpari Dunpuei cheem nimakni dei hukhatdeikhi leinabomri nimaklei, heirou Thangmun rammei shumtrumhaklei.”

18Heitoubi Jacobne ningshun manma ipnarei kanthoubi, heirou aiyei ipnarei lu khangnakhou thlungtum heiya khaangloubi hutlhanungei bunkhoukur, heitoubi heiyei doura shirek shungphaangurkhou. 19Heitoubi ani bi heiyei min Bethel#28.19: Dunpuei Cheem. toubine thulkur; heiya lamkrini bi heiyei khukarthilyei minri Luz toubine ungkhou. 20Heirouri Jacob'ne tloubom khat mardingbi yunkhou, “Kounakpi Dunpune keiya tanghakpani kalhonpibi, heirou keiyei lam'tlanara Ane ngaaksilpilanungri, heirou keiyei chamainungkhi heirou upnungei phirulya thulpilanungri; 21keiyei pawaei cheemra keine kyingni yenkallengrou, heiyanungri Umpuri keiyei Dunpu hoirou. 22Heitoubi keiyei shutlai khoini bunbaangkur thlungtum awane Dunpuei cheem hoinarou, heitoubi Nangni keinungei pikur lalthumrap namyerrouei chiptamyei shiruk khatri keine Neinungei shuimakni makatrou.”

Currently Selected:

KANTHOUNA 28: MARIBSI

Highlight

Copy